ຄາຊູ ຍິງ 2 ປະຕູຊ່ວຍໃຫ້ ລາວໂຕໂຢຕ້າ ບຸກໄປຕີສະເໝີ ບຶງເກດຄາຖິ່ນ 3-3 AFC Cup 2018

    0
    19

          ຫຼັງຈາກທີ່ສະໂມສອນ ລາວໂຕໂຢຕ້າ ໄດ້ສິດກັບມາລົງແຂ່ງຂັນ ລາຍການ  AFC Cup 2018, ໃນມື້ວານນີ້ ວັນທີ 29 / 01 / 2018 ທີ່ສະຫນາມກິລາໂອແລມປິກ ສະເຕດ້ຽມ ພະນົມເປັນ ປະເທດກຳປູເຈຍ ໄດ້ມີການແຂ່ງຂັນ ບານເຕະ AFC Cup 2018 ຮອບຄັດເລືອກ ນັດທີ 1 . ພໍແຕ່ສຽງໝາກຫວີດເລີ່ມຂຶ້ນ ກໍ່ເປັນທາງເຈົ້າບ້ານ ບຶງເກດ ທີ່ເປີດເກມບຸກເຂົ້າໃຈ ແລະໄດ້ຈຸດໂທດຈາກຈັງວະທີ່ ບານໄປຖືກມື ຂອງ ມະໂນລົມ ພົມສຸວັນ ແບບບໍ່ໄດ້ຕັ້ງໃຈ ເຊິ່ງຈາກພາບຊ້າ ແມ່ນມະໂນລົມປິ່ນຫຼັງໃຫ້ກັບທິດທາງຂອງບານ ແຕ່ຜູ້ຕັດສິນ ກໍ່ເປົ່າໃຫ້ເປັນຈຸດໂທດ ແລະ MAYCON ກໍ່ຮັບໜ້າທີ່ສັງຫານຍິງຈຸດໂທດເຂົ້າໄປເຮັດໃຫ້ ບຶງເກດ ຂຶ້ນນຳຕັ້ງແຕ່ນາທີ ທີ 6, ຫຼັງຈາກນັ້ນ ຄືກັບບານໄດ້ໃຈ ບຶງເກດຍັງບຸກເຂົ້າໃສ່ ລາວໂຕໂຢຕ້າ ອີກຫຼາຍຈັງວະ ແຕ່ບໍ່ສາມາດຜ່ານມືຂອງແສງພະຈັນໄປໄດ້. ເກມຜ່ານໄປໄລຍະ 15 ນາທີ ລາວໂຕໂຢຕ້າເລີ່ມກັບມາສູ່ເກມຂອງຕົນເອງໄດ້ ແລະ ໄດ້ສ້າງເກມບຸກ ຕອບໂຕ ທີມເຈົ້າຖິ່ນ ແລະ ກໍ່ມາປະສົບຜົນສຳ ເລັດ ຈາກການຍິງຢ່າງສວຍງາມ ຂອງກອງໜ້າຈອມປະສົບການ ຄາຊູໂອະ ຮົມມະ ໃນນາທີທີ 30 ສ່ວນເວລາທີ່ເຫຼືອໃນເຄິ່ງເວລາທຳອິດທັງ 2 ທີມບໍ່ສາມາດເຮັດຫຍັງກັນໄດ້ເພີ່ມ ເຮັດໃຫ້ຈົບ ເຄິ່ງເວລາທຳອິດທັງ 2 ທີມສະເໝີ ກັນ 1-1​.

          ກັບເຂົ້າສູ່ເຄິ່ງເວລາທີ 2 ຮູບເກມຄ້າຍໆ ກັບ ເຄິ່ງເວລາທຳອິດຄືໃນຕົ້ນເກມ ເຈົ້າບ້ານເປີດເກມບຸກເຂົ້າໃສ່, ແລະກໍ່ສາມາດຍິງປະຕູຂຶ້ນນຳລາວໂຕໂຢຕ້າ ໄດ້ ເຖິງ 2​ ປະຕູ ຈາກຈັງວະຍິງໄກນອກເຂດໂທດຂອງ  MAYCON ໃນນາທີ ທີ 53 ແລະ ໄດ້ອີກ 1 ປະຕູຈາກ LABORLAVY ໃນນາທີທີ 60 ເກມເບິ່ງຄືວ່າ ເຈົ້າບານຈະສາມາດເກັບໄຊຊະນະໃນບ້ານໄດ້, ແຕ່ຖ້າວ່າ ນັກເຕະຂອງລາວໂຕໂຢຕ້າຍັງບໍ່ຍອມແພ້ ແລະໄດ້ເປີດເກມບຸກເຂົ້າໃສ່ ເຈົ້າບ້ານຢ່າງເຕັມທີ່ ແລະກໍ່ມາໄດ້ປະຕູໄລ່ ມາເປັນ 2-1​ປະຕູ ຈາກການຍິງໄກນອກເຂດໂທດ ສຽບເສົາເຂົ້າໄປຢ່າງສວຍງາມຊະນິດທີ່ວ່າ ຜູ້ຮັກສາປະຕູ ຂອງບຶງເກດໄດ້ ແຕ່ໃຊ້ສາຍຕາແຊັບ ຂອງ FEDERIC POODA ໃນນາທີໆ 79. ກ່ອນຈະໝົດເວລາ 3 ນາທີ ຄາຊູ ເປັນຮີໂຣ ຂອງທີມດ້ວຍການຍິງປະຕູທີ 2 ຂອງຕົນເອງ ດ້ວຍການເອົາຫົວຕີບານຈໍ່ໆ ເຂົ້າໄປໃນນາທີທີ 87 ເຮັດໃຫ້ ລາວໂຕໂຢຕ້າ ບຸກມາແບ່ງແຕ້ມ ຄາຖິ່ນຂອງບຶງເກດດ້ວຍ ສະກໍ 3-3. ເຮັດໃຫ້ລາວໂຕໂຢຕ້າ ກຳຄວາມໄດ້ປຽບເລັກນ້ອຍກ່ອນຈະກັບມາແຂ່ງຂັນກັນ ທີ່ສະໜາມກິລາແຫ່ງຊາດ ຫຼັກ 16 ໃນວັນສຸກທີ 2 ກຸມພາ 2018 , ເວລາ 18:00 ນີ້.   
        ຫວັງວ່າບັນດາແຟນບານຈະເຂົ້າໄປຊົມແລະໃຫ້ກຳລັງໃຈ ສະໂມສອນ 1 ດຽວຈາກລາວທີ່ລົງແຂ່ງຂັນ AFC Cup 2018 ດ້ວຍ

    ລາຍຊື່ 11 ຕົວຈິງ ນັກກິລາ ລາວໂຕໂຢຕ້າ ລົງສະຫນາມ
    ຜູ້ຮັກສາປະຕູ
    ເບີ 1 ແສງພະຈັນ ບຸນທິສານ
    ກອງຫລັງ
    ເບີ 2 ບຸນພິທັກ ຈັນທະລັງສີ ( ເບີ 9Ballo ນາທີ 59 )
    ເບີ 4 ປີຍະພົງ ປະຖຳມະວົງ
    ເບີ 6 Renshi Yamgushi
    ເບີ 23 ເກດສະດາ ສຸກສະຫວັນ
    ກອງກາງ
    ເບີ 14 ກ້ອນຄຳ ອິນທຳມະວົງ ( ເບີ 25 ໂສພາ ໄຊຊະນະ ນາທີ 90+4 )
    ເບິ 15 FEDERIC POODA
    ເບີ 17 ມະໂນລົມ ພົມສຸວັນ
    ເບີ 8 ແກ້ວວຽງເພັດ ລິດທິເດດ
    ເບີ 10 ລັດທະໄຊ ລຸນລາສີ ( ເບີ 22 ເລັກໂຕຊາ ທອງສະຫວັດ ນາທີ 89 )
    ກອງຫນ້າ
    ເບີ 18 KAZUO HOMMA

     

    ໂດຍ: ເພລເມັກເກີ

    ພາບຈາກ: ສະໂມສອນ ລາວໂຕໂຢຕ້າ

     

     

    ທີ່ມາ LaosportNews