ຫາລືການປູກເຂົ້າໃນລະດັບພາກພື້ນ

0
23

ກະຊວງ​ກະສິກຳ ແລະ ປ່າໄມ້ ແລະ ອົງການ​ອາຫານ ແລະ ການ​ກະເສດ (FAO) ໄດ້​ຮ່ວມ​ມືຫຼາຍ​ໂຄງການ​ທີ່​ກ່ຽວຂ້ອງ​ກັບການ​ຄຸ້ມ​ຄອງ ແລະ ການ​ເຂົ້າ​ມາມີ​ສ່ວນ​ຮ່ວມ​ໃນ​ການ​ແກ້​ໄຂ​ຢູ່​ໃນສະພາບ​ແວດ​ລ້ອມ​ຂອງ​ທົ່ງ​ນາ ເຕັກນິກ​ການ​ປູກ​ເຂົ້າ ແລະ ສັດນ້ຳ​ຢູ່​ໃນ​ທົ່ງ​ນາ ບາດກ້າວ​ຂອງການ​ດຳເນີນ​ເຫຼົ່າ​ນີ້ ເປັນ​ສ່ວນໜຶ່ງ​ຂອງ​ແນວ​ຄິດ​ລິ​ເລີ່ມ​ການ​ປູກເຂົ້າ​ໃນ​ລະດັບ​ພາກ​ພື້ນ (RRI) ເຊິ່ງ​ໄດ້​ຈັດ​ຕັ້ງ​ປະຕິບັດ​ໂດຍ​ອົງການ FAO ພາຍ​ໃຕ້​ການ​ຮ່ວມ​ມື​ກັບ​ບັນດາກະຊວງ​ຕ່າງໆ​ທີ່​ກ່ຽວຂ້ອງ​ຢູ່​ໃນລາວ ອິນ​ໂດ​ເນ​ເຊຍ ແລະ ຟີ​ລິບ​ປີນ ແຕ່​ປີ 2014-2017.

ໂຄງການ RRI ຢູ່​ລາວ​ໄດ້ຖືກ​ຈັດ​ຕັ້ງ​ປະຕິບັດ ແລະ ສະ​ສົມປະສົບ​ການ​ມາ​ແລ້ວ​ໃນ​ໄລຍະເວລາ 4 ປີ ການ​ປູກ​ເຂົ້າ​ໃນ​ທົ່ງນາ​ເຂດ​ທົ່ງພຽງ ແນໃສ່​ເພີ່ມ​ທະວີ​ຜົນ​ກຳໄລ ແລະ ຄວາມ​ຍືນ​ຍົງຂອງ​ລະບົບ​ຜະລິດ​ກະສິກຳ ປັດ​ຈຸບັນ ເຫັນ​ວ່າ​ຍັງ​ມີ​ຄວາມ​ຕ້ອງການ​ໃຊ້​ປະໂຫຍດ​ຈາກ​ຄວາມ​ຮູ້​ທີ່ໄດ້​ຮຽນ​ມາ ໂດຍ​ການ​ສ້າງ​ອຸປະກອນ​ການ​ສື່ສານ​ອັນ​ໃໝ່ ພ້ອມດຽວ​ກັນ​ນັ້ນຍັງ​ຕ້ອງ​ໄດ້​ທົບ​ທວນຄືນ​ ຄວາມ​ສອດຄ່ອງ​ຂອງ​ບັນດາອຸປະກອນ​ສື່ສານ​ທີ່​ມີ​ຢູ່​ແລ້ວ ເພື່ອໃຫ້​ເຂົ້າ​ເຖິງ​ກຸ່ມ​ເປົ້າ​ໝາຍ​ຫຼາຍຂຶ້ນ​ກວ່າ​ເກົ່າ​ໄດ້​ຮັບ​ຊາບ.

ເປົ້າ​ໝາຍ​ເພື່ອ​ພັດທະນາ​ຍຸດທະ​ສາດ​ການ​ສື່ສານ ​ທີ່​ຈະ​ເອື້ອ​ອຳນວຍ​ໃຫ້​ອົງ​ການຈັດຕັ້ງ​ຂອງ​ລັດຖະ​ບານ ແລະ ອົງການ FAO ໄດ້ສາມາດ​ສື່ສານ​ບັນດາ​ຫົວຂໍ້ຄວາມ​ສຳຄັນ​ໄປ​ສູ່​ກຸ່ມ​ເປົ້າ​ໝາຍ ອັນ​ຈະ​ເຮັດ​ໃຫ້​ຄວາມ​ມຸ່ງ​ຫວັງ​ດັ່ງກ່າວ​ນີ້ ​ໄດ້​ປະສົບ​ຜົນສຳເລັດ​ຢູ່​ໃນລະດັບ​ຮາກ​ຖານ ແລະ ເສີມ​ຂະຫຍາຍ​ໃຫ້​ສາມາດ​ປົກ​ຄຸມ​ໄດ້​ພື້ນ ທີ່​ການ​ປູກ​ເຂົ້າ​ໃນ​ທົ່ວ​ປະເທດ.

ກະຊວງ​ກະສິກຳ ແລະ ປ່າໄມ້ ແລະ ອົງການ FAO ຈັດ​ກອງປະຊຸມ​ການ​ສື່ສານ​ບົດຮຽນ ​ທີ່ຖອດ​ຖອນ​ໄດ້​ຈາກ​ແນວ​ຄວາມຄິດ​ລິ​ເລີ່ມ​ການ​ປູກ​ເຂົ້າ​ໃນ​ລະດັບພາກ​ພື້ນ ຂຶ້ນ​ວັນ​ທີ 8 ກຸມພາ 2018 ທີ່​ໂຮງແຮມລາວ​ພລາ​ຊາ ໂດຍ​ເປັນ​ປະທານ​ຮ່ວມ​ຂອງ​ທ່ານ ໄຊ​ປລາ​ເດດ ຈຸ​ລະ​ມະນີ ຫົວໜ້າກົມ​ແຜນການ ແລະ ການ​ເງິນ ກະຊວງ​ກະສິກຳ ແລະ ປ່າໄມ້ ແລະ ທ່ານ Stephen Rudgard ຜູ້ຕາງໜ້າ​ອົງການ FAO ມີ​ພະນັກງານ​ວິຊາ​ການ.

ທີ່ມາ ວຽງຈັນໃຫມ່