ຍັງສອງບໍລິສັດບໍ່ທັນປະຕິບັດຄຳເຕືອນສຸຂະພາບ ຢູ່ຊອງຢາສູບ

0
16

ເຖິງ​ເວລາ​ທີ່​ຕ້ອງ​ເອົາໃຈໃສ່ຢ່າງ​ຈິງ​ຈັງ ເມື່ອ​ສອງ​ບໍລິສັດ​ຜູ້ຜະລິດ​ລາຍ​ໃຫຍ່​ພາຍ​ໃນ ​ຍັງ​ບໍ່ທັນ​ຈັດ​ຕັ້ງ​ປະຕິບັດ​ຂໍ້​ຕົກລົງ​ຂອງລັດຖະມົນຕີ ກະຊວງ​ສາ​ທາ​ລະນະ​ສຸກ ກ່ຽວ​ກັບ​ການຈັດຕັ້ງ​ປະຕິບັດ​ກົດໝາຍ​ວ່າ​ດ້ວຍ​ຢາສູບ ທີ່ລັດຖະບານ ກໍ່​ຄືກະຊວງ​ສາ​ທາລະນະ​ສຸກ ໄດ້​ວາງ​ອອກ ໃນ​ເດືອນພຶດສະພາ 2016.

ຂໍ້​ກຳນົດ​ດັ່ງກ່າວ ​ໄດ້​ລະບຸ​ໃຫ້ຢາສູບ​ທັງ​ຜະລິດ​ພາຍ​ໃນ ແລະ ນຳ​ເຂົ້າຈາກ​ຕ່າງປະເທດ ເພື່ອມາ​ຈຳໜ່າຍ​ຢູ່​ລາວ ​ຕ້ອງ​ພິມ​ຄຳເຕືອນ​ສຸຂະພາບ​ເປັນ​ຮູບ​ພາບຂະໜາດ 75% ໃສ່​ຊອງ ແລະ ຕຸດຢາສູບ ເຊິ່ງ​ການຈັດຕັ້ງ​ປະຕິບັດຜ່ານ​ມາ ບໍລິສັດ​ຜູ້ນຳ​ເຂົ້າ​ຢາສູບສ່ວນ​ໃຫຍ່ ​ແມ່ນ​ຈັດ​ຕັ້ງ​ປະຕິບັດ​ໄປເປັນ​ທີ່​ຮຽບ​ຮ້ອຍ​ແລ້ວ ທີ່​ເຫຼືອ​ກໍ່​ມີພຽງ​ແຕ່​ຜູ້​ຜະລິດ​ຢາສູບ​ລາຍ​ໃຫຍ່​ພາຍ​ໃນ​ປະເທດ ຄື: ບໍລິສັດ ຢາສູບ​ລາວ ຈຳກັດ ແລະ ບໍລິສັດ ຢາສູບຫົງ​ຖາ ໂຊກ​ດີ​ລາວ-ຈີນ ຈຳກັດ ບໍ່​ທັນ​ປະຕິບັດ​ຕາມ​ຂໍ້​ກຳນົດ​ດັ່ງກ່າວ.

ທ່ານ​ນາງ ຈູ​ຣຽດ ໄຟລ​ໂຊຄ໌ ຜູ້ຕາງໜ້າ​ອົງການ​ອະນາໄມ​ໂລກ ປະຈຳ​ລາວ ໄດ້​ຖະແຫຼງ​ຂ່າວ​ຕໍ່​ສື່ມວນ​ຊົນ ໃນ​ວັນ​ທີ 6 ກຸມພາ 2018 ວ່າ: ປິ 2016 ລັດຖະບານລາວ​ໄດ້​ສ້າງ​ຜົນສຳເລັດ​ອັນ​ໃຫຍ່ຫຼວງ ດ້ວຍ​ການ​ອອກ​ຂໍ້​ຕົກລົງຂອງ​ລັດຖະມົນຕີ​ກະຊວງ​ສາ​ທາລະນະ​ສຸກ ກ່ຽວ​ກັບ​ການຈັດຕັ້ງປະຕິບັດ​ກົດໝາຍວ່າ​ດ້ວຍ​ຢາສູບ ທີ່​ຜະລິດ​ຢູ່​ພາຍ​ໃນ ແລະ ນຳ​ເຂົ້າຈາກ​ຕ່າງປະເທດ ມາ​ຈຳໜ່າຍໃນ​ລາວ ​ຕ້ອງ​ມີ​ຄຳເຕືອນ​ສຸ​ຂະພາບ​ທີ່​ເປັນ​ຮູບ​ພາບ ເຊິ່ງ​ຂໍ້​ຕົກລົງ​ສະບັບ​ດັ່ງກ່າວ ມີ​ຜົນ​ສັກສິດ 120 ວັນ ພາຍຫຼັງ​ທີ່​ຈົດໝາຍເຫດ​ທາງ​ລັດ​ຖະ​ການ ມີ​ຜົນ​ບັງຄັບ​ໃຊ້​ແຕ່​ວັນ​ທີ 7 ພະຈິກ 2016.

ໃນ​ໄລຍະ​ຜ່ານ​ມາ ບໍລິສັດ ຢາສູບ​ລາວ ຈຳກັດ ແລະ ບໍລິສັດ ຢາສູບຫົງ​ຖາ ໂຊກ​ດີ​ລາວ-ຈີນ ຈຳກັດ ໄດ້​ຍື່ນ​ໜັງສື​ຕໍ່​ລັດ​ຖະບານ​ລາວ ໃຫ້​ເລື່ອນ​ຄຳເຕືອນ​ສຸຂະ​ພາບ​ເປັນ​ຮູບ​ພາບ​ອອກ​ໄປ​ຕື່ມອີກ 3 ຄັ້ງ ລວມ​ເປັນ​ເວລາ 19 ເດືອນ ເຊິ່ງ​ການ​ເລື່ອນ​ຄັ້ງ​ທີ 3 ແມ່ນ​ເລີ່ມ​ແຕ່​ວັນ​ທີ 30 ເມສາ 2017 ຫາວັນ​ທີ 1 ມັງກອນ 2018.

ທີ່ມາ ວຽງຈັນໃຫມ່