ນັກທ່ອງທ່ຽວສາມາດມາສຳຜັດຮຽນຮູ້ ການເຮັດອາຫານລາວທີ່ບ້ານສວນມະນີຈັນ

0
53

ບ້ານ​ສວນ​ມະນີ​ຈັນ ຕັ້ງ​ຢູ່​ບ້ານດ່ານ​ຊ້າງ ເມືອງ​ໄຊ​ທານີ ນະຄອນ​ຫລວງ​ວຽງ​ຈັນ ເປັນ​ຂອງເອກະ​ຊົນ​ຄົນ​ລາວ​ ຢາກ​ປູກ​ຈິດ​ສຳນຶກ​ໃຫ້​ແກ່​ລູກ​ຫຼານ​ຜູ້​ສືບ​ທອດ ​ໄດ້ຮຽນ​ຮູ້​ເຖິງ​ວັດທະນາ​ທຳ​ການ​ດຳລົງ​ຊີວິດ​ຮີດຄອງ​ປະເພນີ ເຄື່ອງມື​ການ​ທຳ​ມາ​ຫາ​ກິນ ແລະ ວິຖີ​ຊີວິດ​ຂອງ​ບັນພະບຸລຸດ​ໃຫ້​ໄດ້​ຢູ່​ຄຽງຄູ່​ກັນ​ຕະຫຼອດ​ໄປ ເພື່ອ​ເປັນ​ການສົ່ງເສີມ ແລະ ສະໜັບສະໜູນວຽກ​ງານ​ດັ່ງກ່າວ​ໃຫ້​ຢູ່​ຄົງ​ໄວ້​ຕະຫຼອດ​ໄປ ໃນ​ໂອກາດ​ທີ່​ລັດ​ຖະບານ​ເປີດ​ປີ​ທ່ອງ​ທ່ຽວ​ລາວ 2018 ສະຖານທີ່​ແຫ່ງ​ນີ້ ຈະ​ເປັນ​ແຫຼ່ງທ່ອງ​ທ່ຽວ​ແຫ່ງ​ໜຶ່ງ​ທີ່​ຈະ​ດຶງ​ດູດນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງປະເທດ​ ເຂົ້າ​ມາ​ສຳຜັດ​ທ່ຽວຊົມ​ຫຼາຍ​ກິດຈະກຳ ແລະ ຮຽນ​ຮູ້ການ​ເຮັດ​ອາຫານ​ລາວ.

ທ່ານ​ນາງ ມະນີ​ຈັນ ຜັນ​ຫວາດວົງ​ສຸກ ເຈົ້າ​ຂອງ​ບ້ານ​ສວນ​ມະນີ​ຈັນ ໄດ້​ໃຫ້​ສຳພາດ​ວັນ​ທີ 1 ກຸມພາ 2018 ວ່າ: ບ້ານ​ສວນ​ແຫ່ງນີ້ ສ້າງຕັ້ງ​ຂຶ້ນ​ວັນ​ທີ 20 ພຶດ​ສະພາ 2015 ເກີດ​ຂຶ້ນ​ມາ​ໂດຍ​ແນວຄວາມ​ຄິດ​ຂອງ​ຜູ້ຍິງ​ຄົນ​ໜຶ່ງ ​ທີ່ເກີດ​ມາ​ເປັນ​ລູກ​ຊາວ​ທົ່ງ​ທີ່​ມີຄວາມ​ຜູກ​ພັນ​ກັບ​ການ​ດຳລົງ​ຊີວິດ​ແບບ​ລຽບ​ງ່າຍ ​ຜູກ​ພັນ​ກັບ​ຮີດຄອງ​ປະເພນີ ແລະ ວັດທະນາ​ທຳຂອງ​ຊາວນາ​ຊາວ​ໄຮ່​ແບບ​ທຳ​ມະຊາດ ແລະ ອົບ​ອຸ່ນ​ກັບ​ຊີວິດ​ແບບສະບາຍ ແບບ​ເສດຖະກິດ​ພໍ​ພຽງ ແນວ​ຄວາມ​ຄິດ​ດັ່ງກ່າວ​ຈຶ່ງ​ເກີດມີ​ສວນ​ແຫ່ງ​ນີ້​ຂຶ້ນ ໂດຍ​ພື້ນຖານຂອງ​ສວນ​ແມ່ນ​ມີ​ຫຼາຍ​ກິດ​ຈະກຳ​ທີ່​ນັກ​ທ່ອງ​ທ່ຽວ​ສາມາດເຂົ້າ​ຮ່ວມ​ໄດ້ ເຊັ່ນ: ການ​ສຶກ​ສາຕົ້ນໄມ້​ຫຼາຍ​ຊະນິດ​ທີ່​ໄດ້​ນຳ​ມາ​ປູກໄວ້ ຮູ້​ໄດ້​ສັບພະ​ຄຸນ​ຂອງ​ຕົ້ນໄມ້ນາໆ​ຊະນິດ​ທີ່​ຫາ​ຍາກ ແລະ ໃກ້ຈະ​ສູນພັນ ການ​ຮຽນ​ຮູ້​ກ່ຽວ​ກັບການ​ເຮັດ​ອາຫານ​ລາວ​ຫຼາຍ​ພາກ ການ​ນຸ່ງ​ຖື​ແບບ​ຮີດຄອງ​ປະເພນີລາວ​ຫຼາຍ​ຊົນເຜົ່າ ການ​ຮຽນ​ຮູ້ກ່ຽວ​ກັບ​ການ​ເຮັດ​ພາ​ຂວັນ ຕ່ຳຫູກ ຕຳ​ເຂົ້າ ການ​ຮຽນ​ຮູ້​ກ່ຽວ​ກັບການ​ປະດິດ ແລະ ການ​ກະກຽມງານ​ບຸນ​ສຳຄັນ​ຕ່າງໆ​ຂອງ​ປະ​ເພນີ​ລາວ ການ​ຫຼິ້ນ​ຕ່າງໆ​ຂອງ​ເດັກນ້ອຍ​ທີ່​ຈະ​ສູນຫາຍ ເຊັ່ນ: ການຫຼິ້ນ​ໝາກບີ່ ເຕັ້ນ​ຢາງ ຍິງ​ບັ້ງ​ໂພະ ໄມ້​ຫົວ​ປາ​ຄໍ່ ຫຼິ້ນ​ຄິດ​ແກ່ນ​ໝາກຂາມ ແລະ ອື່ນໆ ການ​ສາທິດການ​ປູກຝັງ-ລ້ຽງສັດ​ບາງ​ປະເພດໂດຍ​ພື້ນຖານ​ໃຫ້​ແກ່​ເຍົາວະ​ຊົນຜູ້​ສືບ​ທອດ ແລະ ນັກ​ທ່ອງ​ທ່ຽວທົ່ວ​ໄປ ການ​ຊົມ​ເຄື່ອງມື​ການ​ທຳມາ​ຫາ​ກິນ ເຄື່ອງໃຊ້​ສອຍ​ປະຈຳວັນ ແລະ ກິດຈະກຳ​ຕ່າງໆ ພ້ອມນີ້ຍັງ​ມີ​ນ້ຳ​ສະ​ໝູນ​ໄພ​ຫຼາຍ​ຊະນິດ ທີ່​ປຸງ​ແຕ່ງ​ຈາກ​ພືດ​ທີ່​ມີ​ໃນ​ສວນ ເພື່ອ​ເປັນ​ການ​ຕ້ອນຮັບ​ນັກ​ທ່ອງທ່ຽວ ເຊັ່ນ: ນ້ຳ​ໃບ​ເຕີຍ ນ້ຳ​ຫົວສີ​ໄຄ ນ້ຳ​ສົ້ມພໍດີ ນ້ຳ​ດອກ​ອັນ​ຊັນ ນ້ຳ​ຂີງ ນ້ຳໝາກ​ນອດ ນ້ຳໝາກຂາມ ນ້ຳ​ຜັກໜອກ ນ້ຳ​ຊາ​ໃບມອນ ຈືນ​ໃບຊາ​ກິນ​ກັບ​ນ້ຳເຜີ້ງ ສ່ວນ​ປະເພດ​ອາຫານ​ລາວ ທີ່​ເປັນ​ລາຍການ​ໃຫ້​ກັບ​ນັກ​ທ່ອງທ່ຽວ​ສາມາດ​ເຂົ້າ​ໄປ​ປຸງ​ແຕ່ງ​ເອົາເອງ​ ໄດ້​ຕາມ​ການ​ສັ່ງ​ຈອງ​ລາຍການ​ໄວ້​ລ່ວງ​ໜ້າ ເຊັ່ນ: ປະເພດແກງ ລາບ ຕຳ​ແຈ່ວ ໝົກ​ປາ ຊຸບຜັກ ເອາະ ອ່ອມ ຍຳ​ແບບ​ລາວໆ ເຂົ້າປຸ້ນ ການ​ເຮັດ​ເຂົ້າປາດ​ໃນງານ​ບຸນ​ພະ​ເຫວດ ການ​ເຮັດ​ເຂົ້າຫຼາມ ການ​ຄັ້ນ​ສົ້ມ​ຜັກ ການ​ເຮັດໜໍ່ໄມ້​ສົ້ມ ການ​ເຮັດ​ໂອດ​ບອນ ແລະ ອື່ນໆ.