ມອບ-ຮັບສູນເຝິກອົບຮົມພະນັກງານຄຸ້ມຄອງວິທະຍາສາດ-ເຕັກໂນໂລຊີ

    0
    8

    ພິທີ​ມອບ-ຮັບສູນ​ເຝິກອົບຮົມພະນັກງານ​ຄຸ້ມ​ຄອງ​ວິທະຍາສາດ ແລະ ເຕັກ​ໂນ​ໂລ​ຊີແຫ່ງ ​ສປປ ລາວ ໄດ້​ມີ​ຂຶ້ນໃນ​ວັນ​ທີ 4 ກຸມພາ 2018 ໂດຍ​ມີ​ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ແຫ່ງ ​ສປປ ລາວ ທ່ານ ຫງຽວນ ຊວນ ຟຸກ ນາຍົກລັດຖະມົນຕີ ແຫ່ງ ​ສສ ຫວຽດນາມ ມີ​ບັນດາ​ລັດ​ຖະມົນຕີ ຮອງ​ລັດຖະມົນຕີ ກົມ ພ້ອມ​ດ້ວຍ​ພາກສ່ວນ​ກ່ຽວຂ້ອງທັງ​ຝ່າຍ ລາວ ແລະ ຫວຽດນາມ ເຂົ້າ​ຮ່ວມ.

    ທ່ານ ຈູ ຫງອກ ແອັງ ລັດ​ຖະມົນຕີ​ກະຊວງ​ວິທະຍາສາດ ແລະ ເຕັກ​ໂນ​ໂລ​ຊີ ແຫ່ງ ​ສສ ຫວຽດນາມ ໄດ້​ໃຫ້​ຮູ້​ວ່າ: ໂຄງການ​ກໍ່ສ້າງ​ດັ່ງກ່າວ​ ໄດ້​ເລີ່ມ​ລົງມື​ກໍ່ສ້າງມາ​ແຕ່​ເດືອນ​ກັນຍາ 2015 ແລະ ສຳເລັດ​ໃນ​ເດືອນ​ທັນວາ 2017 ລວມ​ມູນ​ຄ່າ​ການ​ກໍ່ສ້າງທັງ​ໝົດ 98 ກວ່າ​ຕື້​ດົງ ໃນ​ນີ້ ງົບປະມານຊ່ວຍເຫຼືອ​ລ້າຈາກ​ລັດຖະບານຫວຽດນາມ ໃນ​ມູນ​ຄ່າ 89 ກວ່າຕື້​ດົງ ງົບປະມານ​ສົມທົບ​ຈາກ​ລັດຖະ​ບານ​ລາວ ມູນ​ຄ່າ​ເກືອບ 9 ຕື້ດົງ ໂຄງການ​ດັ່ງກ່າວ​ຈະ​ຮັບ​ປະກັນ​ທາງ​ດ້ານ​ໂຄງ​ລ່າງ ຮັບ​ໃຊ້ວຽກ​ງານ​ຄົ້ນຄວ້າ​ວິທະຍາສາດການ​ສິດສອນ​ພະນັກງານຄຸ້ມຄອງ​ວິທະຍາສາດ ແລະ ເຕັກ​ໂນໂລ​ຊີຂອງ ​ສປປ ລາວ ສາມາດຮອງ​ຮັບ​ຄົນ​ໄດ້ປະມານ 600-800 ເທື່ອ​ຄົນ/ປີ ໃນ​ນີ້ ມີສະຖານ​ທີ່​ເຮັດ​ວຽກໃຫ້​ແກ່​ພະນັກງານ​ຄູ​ອາຈານ ແລະ ນັກ​ຄົ້ນຄວ້າ​ໄດ້ປະມານ 70 ກວ່າ​ຄົນ ສູນ​ເຝິກອົບຮົມ​ດັ່ງກ່າວ ​ພາຍຫຼັງເປີດ​ນຳ​ໃຊ້​ຈະ​ເປັນ​ສະຖານທີ່ ໃຫ້ແກ່​ການ​ຄົ້ນຄວ້າ​ວິທະຍາສາດ ແລະ ເຝິກອົບຮົມ​ພະນັກງານທີ່​ມີລະດັບ​ມະຫາວິທະຍາໄລ ເໜືອມະຫາວິທະຍາໄລ ລົງ​ເລິກ​ຂະແໜງ​ການ​ກ່ຽວ​ກັບ​ການ​ຄຸ້ມຄອງ​ວິທະຍາສາດ​ທີ່​ສຳຄັນ ໃນການ​ພັດທະນາ​ຂອງ​ກະຊວງວິທະ​ຍາ​ສາດ-ເຕັກ​ໂນ​ໂລ​ຊີ ແລະ ອື່ນໆ.

    ທ່ານ ບໍ່​ວຽງ​ຄຳ ວົງ​ດາລາ ລັດຖະມົນຕີກະຊວງ​ວິທະຍາສາດ ແລະ ເຕັກ​ໂນ​ໂລ​ຊີ ແຫ່ງ ​ສປປ ລາວ ໄດ້​ຕີ​ລາຄາ​ສູງ​ຕໍ່​ໂຄງການ​ດັ່ງກ່າວ ແລະ ຖື​ເປັນ​ສັນ​ຍະລັກ​ແຫ່ງ​ການ​ຮ່ວມ​ມື​ທາງ​ດ້ານວິທະຍາສາດ ແລະ ເຕັກ​ໂນ​ໂລ​ຊີລະຫວ່າງ ​ສປປ ລາວ ແລະ ​ສສ ຫວຽດນາມ ສູນ​ເຝິກອົບຮົມ​ພະນັກ​ງານ​ຄຸ້ມ​ຄອງ​ວິທະຍາສາດ ແລະ ເຕັກ​ໂນ​ໂລ​ຊີ ຈະ​ເປັນ​ພື້ນຖານໃຫ້​ແກ່​ການ​ຄົ້ນຄວ້າ ແລະ ເຝິກອົບຮົມ​ພະນັກງານ​ຄຸ້ມ​ຄອງວິທະຍາສາດ-ເຕັກ​ໂນ​ໂລ​ຊີ ແລະ ນະ​ວັດຕະ​ກຳ ໃຫ້​ສາມາດ​ຕອບສະໜອງ​ໄດ້​ເທື່ອ​ລະ​ກ້າວ ພ້ອມນັ້ນ ທ່ານ​ຍັງ​ໄດ້​ສະແດງ​ຄວາມຂອບໃຈ​ຕໍ່​ລັດຖະບານ ກໍ່​ຄືກະຊວງ​ວິທະຍາສາດ ແລະ ເຕັກ​ໂນໂລ​ຊີຂອງ ​ສສ ຫວຽດນາມ ທີ່​ໄດ້​ໃຫ້ການ​ສະໜັບສະໜູນຊ່ວຍເຫຼືອ​ແກ່ ​ສປປ ລາວ ໃນ​ທຸກຂະແໜງການ ໂດຍ​ສະເພາະ ຂະແໜງ​ວິທະຍາສາດ ແລະ ເຕັກໂນ​ໂລ​ຊີ ໃຫ້​ໄດ້​ຮັບ​ການ​ພັດ​ທະນາ ແລະ ເຕີບ​ໃຫຍ່​ຂະຫຍາຍຕົວ​ຂຶ້ນ​ໄປ​ເລື້ອຍໆ.

    ທີ່ມາ ວຽງຈັນໃຫມ່