ມອບ-ຮັບສູນຂໍ້ມູນຂ່າວສານ ຊັບພະຍາກອນນ້ຳແຫ່ງຊາດ

    0
    12

    ພິທີ​ເປີດ​ສູນ​ຂໍ້​ມູນ-ຂ່າວສານ ຊັບພະຍາກອນ​ນ້ຳ​ແຫ່ງ​ຊາດ ກະຊວງ​ຊັບພະຍາກອນ​ທຳ​ມະ​ຊາດ ແລະ ສິ່ງແວດລ້ອມ (​ກຊສ) ຈັດຂຶ້ນ​ວັນ​ທີ 2 ກຸມພາ 2018 ທີ່​ກົມອຸຕຸນິຍົມ ແລະ ອຸ​ທົກ​ກະ​ສາດ ໃຫ້ກຽດ​ເຂົ້າ​ຮ່ວມ​ຂອງ​ທ່ານ ທອງລຸນ ສີ​ສຸ​ລິດ ນາຍົກລັດຖະມົນຕີ ແຫ່ງ ​ສປປ ລາວ ພ້ອມ​ດ້ວຍ ທ່ານ ສົມ​ມາດ ພົນ​ເສນາ ລັດ​ຖະມົນຕີ (​ກຊສ) ທ່ານ​ລັດ​ຖະ​ມົນຕີ​ກະຊວງ​ຊັບພະຍາກອນ​ນ້ຳ ​ສປ ຈີນ ບັນດາ​ລັດຖະມົນຕີ ທ່ານເອກ​ອັກ​ຄະ​ລັດ​ຖະ​ທູດ ​ສປ ຈີນ ປະຈຳ​ລາວ ບັນດາ​ຫົວໜ້າ​ກົມ ພະແນກການ ແລະ ພາກສ່ວນກ່ຽວຂ້ອງ​ທັງ​ສອງ​ຝ່າຍ​ເຂົ້າ​ຮ່ວມ.

    ທ່ານ ສົມ​ມາດ ພົນ​ເສນາ ກ່າວ​ວ່າ: ສູນ​ແຫ່ງ​ນີ້​ໄດ້​ຮັບ​ການຊ່ວຍເຫຼືອ​ຈາກ​ລັດຖະບານ ​ສປ ຈີນ ເປັນ​ການ​ຜັນ​ຂະຫຍາຍ​ບົດບັນທຶກ​ຄວາມ​ເຂົ້າໃຈ ວ່າ​ດ້ວຍການ​ຮ່ວມ​ກັນ​ຈັດ​ຕັ້ງ​ປະຕິບັດ​ໂຄງການ​ຕົວ​ແບບ ໃນ​ການ​ກໍ່ສ້າງ​ສູນຂໍ້​ມູນ-ຂ່າວສານ ຊັບພະຍາກອນທຳ​ມະ​ຊາດ ແລະ ການ​ສ້າງແຜນ​ແມ່​ບົດ ການ​ຄຸ້ມ​ຄອງ​ອ່າງຮັບ​ນ້ຳ ນ້ຳ​ອູ ແລະ ອ່າງ​ຮັບນ້ຳ ນ້ຳ​ເທີນ-ນ້ຳ​ກະດິງ ລະຫວ່າງກະຊວງ​ຊັບພະຍາກອນ​ທຳ​ມະຊາດ ແລະ ສິ່ງແວດລ້ອມ ​ສປປ ລາວ ແລະ ກະຊວງ​ຊັບ​ພະຍາກອນ​ນ້ຳ ​ສປ ຈີນ ໂດຍ​ມີ​ປະມຸກລັດ​ຂອງ​ສອງ​ປະເທດ​ເຂົ້າ​ຮ່ວມເປັນ​ສັກຂີ​ພິຍານ ໃນ​ທ້າຍ​ປີ 2017 ທີ່​ຜ່ານ​ມາ.

    ທ່ານ ປະສິດ ດີ​ມະນີ​ວົງ ຮອງຫົວໜ້າ​ພະ​ແນກ​ອຸ​ທົກ​ກະ​ສາດ ກົມ​ອຸຕຸນິຍົມ ອຸ​ທົກ​ກະ​ສາດ (​ກຊສ) ກ່າວ​ວ່າ: ສູນ​ແຫ່ງ​ນີ້ ແມ່ນ​ທຶນ​ຊ່ວຍເຫຼືອ​ລ້າ​ຈາກ​ລັດຖະ​ບານ ​ສປ ຈີນ ເພື່ອ​ສະໜັບ​ສະໜູນ​ທຶນ​ໃນ​ການ​ສ້າງ​ສູນ​ຂໍ້​ມູນ-ຂ່າວສານ ຊັບພະຍາກອນ​ນ້ຳແຫ່ງ​ຊາດ ເຊິ່ງ​ເລີ່ມ​ຈັດ​ຕັ້ງ​ປະຕິ​ບັດ​ໂຄງການ​ມາ​ແຕ່​ເດືອນ​ພະຈິກ 2017 ມາ​ເຖິງ​ກຸມພາ 2018 ແມ່ນ​ສຳເລັດ​ຜົນ ລວມ​ທັງ​ສະໜອງ​ເຄື່ອງ​ວັດແທກ​ລະດັບ​ນ້ຳ ອຸປະກອນ​ທີ່​ຈຳເປັນ​ຈຳນວນ​ໜຶ່ງ ເຊິ່ງ​ສູນ​ດັ່ງກ່າວ​ຈະ​ເປັນ​ບ່ອນ​ສັງລວມ​ບັນທຶກ​ຂໍ້​ມູນ​ຕ່າງໆ​ກ່ຽວ​ກັບຊັບພະຍາກອນ​ນ້ຳ ເພື່ອ​ເປັນ​ບ່ອນສຶກ​ສາ ເປັນ​ຂໍ້​ມູນ​ອ້າງ​ອີງ ແລະ ການ​ສະໜອງ​ຂໍ້​ມູນ​ຕ່າງໆ​ກ່ຽວກັບ​ຊັບພະຍາກອນ​ນ້ຳ​ໃຫ້​ກັບພາກສ່ວນ​ກ່ຽວຂ້ອງ.