ລັດຖະບານຍີ່ປຸ່ນ ໃຫ້ການສະໜັບສະໜູນວຽກງານສຸຂະພາບເດັກ

0
30

ພິທີ​ເຊັນ​ສັນຍາ​ໂຄງການ​ຊ່ວຍເຫຼືອ​ລ້າ ຈາກ​ລັດຖະບານ​ຍີ່ປຸ່ນ ມູນ​ຄ່າ 265.971 ໂດ​ລາ​ສະຫະລັດ ປະມານ 2 ຕື້​ກວ່າ​ກີບ ລະຫວ່າງທ່ານ ຄູ​ໂນະ ຄາ​ຊູ​ຮິ​ໂລະ ອຸປະ​ທູດ​ຍີ່ປຸ່ນ​ປະຈຳ​ລາວ ແລະ ທ່ານ ໂຄ​ອິ​ຈິ ທາ​ມາ​ເຕະ ຜູ້​ດຳເນີນ​ໂຄງການ​ອາວຸໂສຂອງ​ອົງການ​ແພດ​ໂລກຍີ່ປຸ່ນ (MdMJ) ຈັດ​ໃນ​ວັນ​ທີ 30 ມັງກອນ 2018 ທີ່​ສະຖານທູດ​ຍີ່ປຸ່ນ ປະຈຳ​ລາວ ໂດຍ​ມີ​ທ່ານ ພູ​ໂຊນ ທຳ​ມະ​ວິ​ໄຊ ຮອງ​ເຈົ້າແຂວງ​ຫົວພັນ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ໂຄງການ​ນີ້ ຈັດ​ຕັ້ງ​ປະຕິບັດໂດຍ​ອົງການ​ແພດ​ໂລກ​ຍີ່ປຸ່ນ (MdMJ) ເພື່ອ​ສ້າງ​ຄວາມ​ສາມາດ​ໃຫ້​ພະນັກງານ​ຢູ່​ໂຮງໝໍເມືອງ ສຸກສາລາ ແລະ ຄະນະກຳມະການ​ຮັກສາ​ສຸຂະພາບ​ຂັ້ນບ້ານ ເຊິ່ງ​ໂຄງການ​ນີ້​ໄດ້​ດຳເນີນມາ​ແຕ່ 2017 ສ່ວນ​ການ​ສະໜັບສະ​ໜູນ​ຄັ້ງ​ນີ້ ແມ່ນ​ນອນ​ໃນ​ປີ​ທີ 2 ຂອງ​ໂຄງການເປົ້າ​ໝາຍ ​ເພື່ອ​ຫຼຸດຜ່ອນ​ອັດຕາ​ການ​ເສຍ​ຊີວິດ​ຂອງເດັກນ້ອຍ ທີ່​ມີ​ອາຍຸ​ຕ່ຳ​ກວ່າ 5 ປີ ທີ່​ເມືອງ​ຊ່ອນ ແລະ ເມືອງ​ຫົວເມືອງ ໂດຍ​ການ​ພັດທະນາ​ລະບົບ​ການ​ບໍລິການ​ຮັກສາ​ສຸ​ຂະພາບ​ເດັກນ້ອຍ​ທີ່​ສຸກສາລາ.

ອົງການ​ແພດ​ໂລກຍີ່ປຸ່ນ ແມ່ນ​ເຄືອ​ຄ່າຍ​ການ​ແພດ​ລະດັບໂລກ ທີ່​ໄດ້​ຮ່ວມ​ວຽກ​ກັບ​ບັນດາແພດ​ຊ່ຽວຊານ ເພື່ອ​ໃຫ້​ປະຊາຊົນ​ໄດ້​ເຂົ້າ​ເຖິງ​ການ​ບໍລິການ​ທາງການ​ແພດ ນັບ​ແຕ່ 2012-2015 ອົງການ​ແພດ​ໂລກ ເຄີຍ​ໄດ້​ຮ່ວມມື​ກັບ​ອົງການ​ແພດ​ຝຣັ່ງ ດຳເນີນໂຄງການ​ສຸຂະພາບ​ແມ່ ແລະ ເດັກ ທີ່​ແຂວງ​ຈຳປາ​ສັກ ເປັນ​ຄັ້ງທຳ​ອິດ​ ທີ່​ໄດ້​ມີ​ການ​ບໍລິການ​ທາງການ​ແພດ ໂດຍ​ບໍ່​ເສຍ​ຄ່າ​ໃຊ້ຈ່າຍ​ໃຫ້​ແກ່​ແມ່ ແລະ ເດັກນ້ອຍ ທີ່​ມີ​ອາຍຸ​ຕ່ຳ​ກວ່າ 5 ປີ.