ລາວ-ມຽນມາ ຮ່ວມມືແລກປ່ຽນວຽກງານທະນາຄານ

0
25

ໂດຍ​ຕອບ​ສະໜອງ​ຕາມ​ຄຳເຊີນ​ຂອງ​ທ່ານ​ຜູ້​ວ່າການ​ທະ​ນາຄານ ແຫ່ງ ​ສປປ ລາວ ທ່ານ Kyaw Kyaw Maung ຜູ້​ວ່າການ​ທະນາຄານ​ກາງມຽນ​ມາ ພ້ອມ​ດ້ວຍ​ຄະນະ ໄດ້​ເດີນທາງ​ມາຢ້ຽມຢາມ ແລະ ເຂົ້າ​ຮ່ວມ​ກອງປະຊຸມ​ທະວິ​ພາຄີ ຄັ້ງ​ທີ 3 ລະຫວ່າງທະນາຄານ​ແຫ່ງ ​ສປປ ລາວ ແລະ ທະນາຄານ​ກາງມຽນ​ມາ ໃນ​ວັນ​ທີ 31 ມັງກອນ ຫາ 2 ກຸມພາ ນີ້ ທີ່​ນະຄອນຫຼວງວຽງ​ຈັນ ກອງ​ປະຊຸມ​ຄັ້ງ​ນີ້​ສືບເນື່ອງ​ມາ​ຈາກ​ການ​ເຊັນ​ບົດ​ບັນທຶກ​ຄວາມ​ເຂົ້າໃຈ ວ່າ​ດ້ວຍ​ການຮ່ວມ​ມືລະຫວ່າງທະນາຄານ ແຫ່ງ ​ສປປ ລາວ ແລະ ທະ​ນາຄານ​ກາງມຽນ​ມາ ໃນ 2014 ໂດຍ​ຜັດປ່ຽນ​ກັນ​ຢ້ຽມຢາມ ແລະ ເປັນ​ເຈົ້າພາບ​ຈັດ​ກອງ​ປະຊຸມ​ທະວິພາ​ຄີໃນ​ແຕ່​ລະ​ປີ ເຊິ່ງ​ໃນ​ປີ​ນີ້ ທະນາຄານ ແຫ່ງ ​ສປປ ລາວ ໄດ້​ເປັນ​ເຈົ້າພາບ.

ໃນ​ວັນ​ທີ 1 ກຸມພາ 2018 ທີ່​ໂຮງແຮມ​ລາວ​ພລາ​ຊາ ໄດ້​ຈັດກອງ​ປະຊຸມ​ທະວິ​ພາຄີ ຄັ້ງ​ທີ 3 ລະຫວ່າງທະນາຄານ​ແຫ່ງ ​ສປປ ລາວ ແລະ ທະນາຄານ​ກາງມຽນ​ມາ ໂດຍ​ເປັນ​ປະທານ​ຮ່ວມຂອງ​ທ່ານ ສົມ​ພາວ ໄຟ​ສິດ ຜູ້​ວ່າການ​ທະນາຄານ​ແຫ່ງ ​ສປປ ລາວ ແລະ ທ່ານ Kyaw Kyaw Maung ຜູ້​ວ່າການ​ທະນາຄານກາງມຽນ​ມາ ມີ​ພາກສ່ວນ​ກ່ຽວຂ້ອງ​ທັງ​ສອງ​ຝ່າຍ​ເຂົ້າ​ຮ່ວມ.

ກອງ​ປະຊຸມ​ຄັ້ງ​ນີ້​ທັງ​ສອງຝ່າຍ​ໄດ້​ປຶກສາ​ຫາລື ແລະ ແລກປ່ຽນ​ປະສົບ​ປະການ​ກ່ຽວ​ກັບ​ການຄຸ້ມ​ຄອງ​ເງິນຕາ​ຕ່າງປະເທດ ການ​ຄຸ້ມ​ຄອງ​ທະນາຄານ​ທຸລະກິດ ລະບຽບ​ການ​ຄຸ້ມ​ຄອງ​ຂອງສະ​ຖາ​ບັນ​ການ​ເງິນ ແລະ ກົດໝາຍວ່າ​ດ້ວຍ​ທະນາຄານ​ກາງມຽນ​ມາ ແລະ ບັນຫາ​ອື່ນໆທີ່ຕິດ​ພັນ​ກັບ​ວຽກ​ງານ​ວິຊາ​ສະເພາະ ​ທີ່​ທັງ​ສອງ​ຝ່າຍ​ມີ​ຄວາມ​ສົນໃຈ ພ້ອມ​ທັງ​ມີ​ການ​ແລກປ່ຽນບົດຮຽນ​ເຊິ່ງ​ກັນ ແລະ ກັນ ຢ່າງກົງ​ໄປ​ກົງ​ມາ​ໃນ​ຫຼາຍ​ບັນຫາ ເຮັດໃຫ້​ກອງ​ປະຊຸມ​ຄັ້ງ​ນີ້ ສາມາດ​ບັນລຸ​ຜົນສຳເລັດ ເພື່ອ​ເສີມ​ສ້າງ​ສາຍພົວພັນ​ການ​ຮ່ວມ​ມື​ຂອງ​ສອງ​ທະນະ​ຄານໃຫ້​ຂະຫຍາຍຕົວ ແລະ ກາຍເປັນ​ຮູບ​ປະ​ທຳ​ໃນ​ອະນາຄົດ.