ກຸ່ມຄົນຮັກລົດຈັກ ຈັດກິດຈະກຳຮ່ວມແບ່ງປັນນ້ຳໃຈຕ້ານໄພໜາວ

0
22

ວັນ​ທີ 23 ມັງກອນ 2018 ກຸ່ມຄົນ​ຮັກ​ລົດຈັກ​ເກົ່າ​ຄາດ​ຊິກ ນະຄອນ​ຫຼວງ​ວຽງ​ຈັນ ໄດ້​ຈັດ​ກິດ​ຈະກຳ​ຮ່ວມ​ແບ່ງປັນ​ນ້ຳໃຈ​ຕ້ານ​ໄພໜາວ​ຢູ່​ເມືອງ​ວຽງ​ທອງ ແຂວງບໍ​ລິ​ຄຳ​ໄຊ ນຳ​ທີມ​ໂດຍ​ທ່ານ ບຸນສົ່ງ ພິມ​ມະ​ສອນ ແລະ ທ່ານ ແຫຼມ​ເທວີ ສິງຫາ​ລາດ ນຳ​ທາງໂດຍ​ທ່ານ ແກ້ວ​ອຸດອນ ໄຊ​ປະເສີດ ຮອງ​ເລຂາ​ຄະນະ​ບໍລິຫານງານ​ຊາວ​ໜຸ່ມ ແຂວງ​ບໍ​ລິ​ຄຳ​ໄຊ ພ້ອມ​ດ້ວຍ​ຄະນະ ຖືກ​ຕ້ອນຮັບໂດຍ​ທ່ານ ອາ​ລຸນ​ສັກ ປະ​ທຳ​ມະວົງ ຮອງ​ເຈົ້າເມືອງ​ວຽງ​ທອງ ອຳນາດ​ການ​ປົກຄອງ​ບ້ານ ຄະນະອຳນວຍ​ການ​ໂຮງຮຽນ ປະຊາຊົນ ແລະ ນັກຮຽນ​ເຂົ້າ​ຮ່ວມ.

ກິດຈະກຳ​ຄັ້ງ​ນີ້ ກຸ່ມ​ຄົນ​ຮັກລົດຈັກ​ເກົ່າ​ຄາດ​ຊິກ ນະຄອນຫຼວງ​ວຽງ​ຈັນ ໄດ້​ນຳ​ເອົາ​ເຄື່ອງນຸ່ງ​ຫົ່ມ​ກັນ​ໜາວ ອຸປະກອນ​ການສຶກ​ສາ ແລະ ອຸປະກອນ​ເຄື່ອງ​ກີລາ ທີ່​ໄດ້​ມາ​ຈາກ​ການ​ປະກອບສ່ວນ​ຂອງ​ບັນດາ​ຫົວໜ່ວຍ​ທຸລະກິດ ບໍລິສັດ​ຫ້າງ​ຮ້ານ ຊາວ​ຄ້າຂາຍ ນັກຮຽນ ນັກ​ສຶກ​ສາ ກໍ່​ຄືຜູ້ໃຈ​ບຸນ​ຢູ່ນະຄອນຫຼວງ​ວຽງ​ຈັນ ແລະ ຕ່າງ​ແຂວງ​ຈຳນວນ​ໜຶ່ງ ​ທີ່​ນຳ​ມາ​ມອບ​ໃຫ້​ທີມ​ກຸ່ມ​ຄົນ​ຮັກ​ລົດຈັກ​ເກົ່າ​ຄາດ​ຊິກ ນະຄອນຫຼວງວຽງ​ຈັນ ໃນ​ໄລຍະ​ຜ່ານ​ມາ​ປະກອບ​ມີ ໂສ້ງ ເສື້ອ ເກີບ ຊີມັງ ກະດານ​ດຳ ເຄື່ອງ​ກີລາ ແລະ ອື່ນໆຈຳນວນ​ຫຼາຍ​ລາຍການ ເພື່ອ​ນຳໄປ​ມອບ​ໃຫ້​ຄອບຄົວ​ຜູ້​ທີ່​ຂາດເຂີນ ອານາ​ຖາ ແລະ ໂຮງຮຽນ​ມີ ຄື: ບ້ານ​ວັງ​ແປ້ນ ບ້ານ​ໄຊ​ບົວທອງ ບ້ານ​ມີ​ໄຊ ໂຮງຮຽນ​ປະຖົມສົມບູນ​ຜາ​ທອງ ໂຮງຮຽນ​ປະຖົມສົມບູນ​ກົກ​ຂາມ ແລະ ໂຮງຮຽນປະຖົມ​ສົມບູນ​ຫ້ວຍ​ຫອຍ.

ທີ່ມາ ວຽງຈັນໃຫມ່