ຄະນະຜູ້ແທນຂັ້ນສູງນະຄອນໂຮ່ຈີມິງ ສຳເລັດຢ້ຽມຢາມນະຄອນຫຼວງ

0
22

ວັນ​ທີ 26 ມັງກອນ 2018 ທີ່​ໂຮງແຮມ​ເໝືອງ​ແທງ ນະຄອນຫຼວງ​ວຽງ​ຈັນ (ນວ) ທ່ານ ສິນ​ລະວົງ ຄຸດ​ໄພທູນ ກຳມະການ​ກົມການເມືອງ​ສູນ​ກາງ​ພັກ ເລຂາ​ຄະນະ​ພັກ ເຈົ້າ​ຄອງ ນວ ພ້ອມ​ຄະນະ ໃຫ້​ກຽດ​ສົ່ງ​ຄະນະ​ຜູ້​ແທນ​ຂັ້ນສູງ​ນະຄອນ​ໂຮ່​ຈີ​ມິງ ​ສສ ຫວຽດນາມ ນຳ​ໂດຍ​ທ່ານ ຫງວຽນ ທ້ຽນ ເຍີນ ກຳມະການ​ກົມ​ການເມືອງ​ສູນ​ກາງ​ພັກ ເລຂາ​ຄະນະພັກ ຫົວໜ້າ​ຄະນະ​ສະມາຊິກ​ສະພາ​ແຫ່ງ​ຊາດ ນະຄອນ​ໂຮ່​ຈີ​ມິງ ໂອກາດ​ທີ່​ຄະນະ​ຜູ້​ແທນ​ສຳເລັດ ການເຄື່ອນໄຫວ​ຢ້ຽມຢາມ ແລະ ເຮັດ​ວຽກ​ຢູ່ ນວ ວັນ​ທີ 22-26 ມັງກອນ.

ການ​ຢ້ຽມຢາມ ແລະ ເຮັດວຽກ​ຂອງ​ຄະນະ​ຜູ້​ແທນ​ຄັ້ງ​ນີ້ ເປັນການ​ເສີມ​ຂະຫຍາຍ​ສາຍ​ພົວພັນມິດຕະພາບ ແລະ ຄວາມ​ສາ​ມັກຄີ​ແບບ​ພິເສດ ລະຫວ່າງສອງພັກ-ສອງ​ລັດ ກໍ່​ຄື ນວ ແລະ ນະຄອນ​ໂຮ່​ຈີ​ມິງ ໃຫ້​ນັບ​ມື​ກ້າວ​ເຂົ້າສູ່​ລວງ​ເລິກ ເຊິ່ງ​ຕະຫຼອດ​ໄລຍະ 5 ວັນ ຄະນະ​ຜູ້​ແທນ​ຂັ້ນ​ສູງ​ຂອງສອງ​ນະຄອນ ​ໄດ້​ເຄື່ອນ​ໄຫວ​ເຮັດວຽກ​ຮ່ວມ​ກັນ​ມີ​ຜົນສຳເລັດ​ຫຼາຍດ້ານ ເປັນຕົ້ນ ການ​ພົບ​ປະ​ສອງຝ່າຍ ເຊັນ​ບົດ​ບັນທຶກ​ການ​ຮ່ວມມືລະຫວ່າງ​ເມືອງ​ສີ​ໂຄດ​ຕະບອງ ແລະ ເມືອງ​ຫ້າ ສຳ​ມະ​ນາ​ແບ່ງປັນ​ບົດຮຽນ​ການ​ພັດທະນາ​ເສດຖະ​ກິດ ການ​ເກັບ ແລະ ຈ່າຍ​ງົບປະມານ ການ​ເກັບ​ອາກອນ ຕ້ານການ​ຮົ່ວ​ໄຫຼ​ໃນ​ການ​ໃຊ້​ຈ່າຍ​ງົບປະມານ ດຶງ​ດູດ​ການ​ລົງທຶນ​ຕ່າງປະເທດ ນະຄອນ​ອັດ​ສະ​ຣິ​ຍະ ການ​ປະຕິບັດ​ກົນ​ໄກ​ນະໂຍບາຍ ສະເພາະ​ຂອງ​ສອງ​ນະຄອນ ແລະ ການ​ເຊັນ​ບົດ​ບັນທຶກ​ຮ່ວມ​ມື ລະຫວ່າງມະຫາວິທະຍາໄລ​ແຫ່ງຊາດ​ລາວ ແລະ ມະຫາ​ວິທະຍາໄລ​ແຫ່ງ​ຊາດ ນະຄອນ​ໂຮ່​ຈີ​ມິງ ໄດ້​ທ່ຽວ​ຊົມ​ສະຖານທີ່​ທ່ອງທ່ຽວ​ທີ່​ສຳຄັນ​ພາຍ​ໃນ ນວ ແຂວງ​ສະຫວັນ​ນະ​ເຂດ ແລະ ແຂວງ​ຈຳປາ​ສັກ​ຈຳ​ຕື່ມ​ອີກ ເພື່ອແນໃສ່​ຊຸກຍູ້​ສົ່ງເສີມ​ປີ​ທ່ອງ​ທ່ຽວລາວ 2018 ດຶງ​ດູດ​ນັກ​ທ່ອງ​ທ່ຽວຫວຽດນາມ​ມາ​ທ່ຽວ​ຊົມ ສປປ ລາວ ໃຫ້​ນັບ​ມື້​ຫຼາຍ​ຂຶ້ນ.

ທີ່ມາ ວຽງຈັນໃຫມ່