ຜູ້ນຳອາຊຽນເຂົ້າຮ່ວມງານສວນສະໜາມ ສະຫຼອງວັນຊາດອິນເດຍ

0
25

ພາຍຫຼັງ​ສຳເລັດ​ການ​ເຂົ້າຮ່ວມ​ກອງ​ປະຊຸມ​ສຸດ​ຍອດ​ສະເຫຼີມສະຫຼອງ ​ການ​ພົວພັນ​ອາ​ຊຽນ-ອິນ​ເດຍ ຄົບຮອບ 25 ປີ ເຊິ່ງຈັດ​ຂຶ້ນ​ໃນ​ວັນ​ທີ 25 ມັງກອນ 2018 ຢູ່​ນະຄອນຫຼວງນິວ​ເດັນ​ລີຂອງ​ອິນ​ເດຍ ວັນ​ທີ 26 ມັງກອນ 2018 ທ່ານ ​ທອງ​ລຸນ ສີ​ສຸ​ລິດ ນາຍົກລັດຖະມົນຕີ ໄດ້​ຮ່ວມ​ກັບ​ຜູ້ນຳ​ອາ​ຊຽນ​ອື່ນ ​ເຂົ້າ​ຮ່ວມ​ງານເດີນ​ສວນສະໜາມ ເພື່ອ​ສະເຫຼີມສະຫຼອງ​ວັນຊາດ​ອິນ​ເດຍ ຄົບຮອບ 69 ປີ ໃນ​ຖານະ​ແຂກ​ສູງສຸດ​ຂອງ​ລັດຖະບານ​ອິນ​ເດຍ ຕາມ​ການ​ເຊື້ອ​ເຊີນຂອງ​ທ່ານ ນາ​ເຣັນ​ດຣາ ໂມ​ດີ​ນາ ຍົກ​ລັດ​ຖະມົນຕີ​ອິນ​ເດຍ ງານ​ເດີນ​ສວນ​ສະໜາມ​ສະຫຼອງ​ວັນຊາດ​ອິນ​ເດຍຄັ້ງ​ນີ້​ ຈັດ​ຂຶ້ນ​ທີ່​ສະໜາມ​ຫຼວງຣາ​ຊະ​ພັດ ໂດຍ​ເປັນ​ປະທານ​ຂອງທ່ານ ຣາມ ນາດ ໂກ​ວິນ ປະ​ທານາ​ທິ​ບໍດີ​ອິນ​ເດຍ ມີ​ບັນດາ​ເຈົ້າໜ້າທີ່​ຂັ້ນ​ສູງ​ຂອງ​ອິນ​ເດຍ ທູຕານຸ​ທູດ​ຕ່າງປະເທດ ແຂກ​ພາຍ​ໃນ ແລະ ຕ່າງປະເທດ ເຂົ້າ​ຮ່ວມ.

ໃນ​ໂອກາດ​ເຂົ້າ​ຮ່ວມ​ງານ​ສະຫຼອງ​ວັນຊາດ​ຄັ້ງ​ນີ້ ບັນດາ​ຜູ້ນຳອາ​ຊຽນ​ ໄດ້​ຮ່ວມ​ຊົມ​ຂະ​ບວນ​ສວນສະໜາມ​ຂອງ​ບັນດາ​ກ້ອນ​ກຳລັງປະກອບ​ອາວຸດ​ຂອງ​ອິນ​ເດຍ ກ້ອນ​ກຳລັງ​ທຸງຊາດ​ຂອງ​ບັນດາປະເທດ​ອາ​ຊຽນ ກ້ອນ​ກຳລັງ​ຂອງນັກຮຽນ ທີ່​ສະທ້ອນ​ໃຫ້​ເຫັນ​ເຖິງຄວາມ​ອຸດົມສົມບູນ​ທາງ​ດ້ານ​ວັດທະນະ​ທຳ​ຂອງ​ບັນດາ​ປະເທດ​ອາຊຽນ ແລະ ການ​ເຊື່ອມ​ຕໍ່​ທາງດ້ານ​ວັດທະນະທຳ ແລະ ຄວາມສີວິໄລ ລະຫວ່າງອາ​ຊຽນ ແລະ ອິນ​ເດຍ ຈາກ​ນັ້ນ ທ່ານ ທອງ​ລຸນ ສີ​ສຸ​ລິດ ພ້ອມ​ບັນດາ​ຜູ້ນຳ​ອາ​ຊຽນ ໄດ້​ເຂົ້າ​ຮ່ວມ​ງານ​ພົບ​ປະ​ສ້າງສັນກັບ​ນັກທຸລະກິດ ແລະ ບຸກຄົນ​ສຳຄັນ​ຈາກ​ຂະແໜງການ​ຕ່າງໆຂອງ​ອິນ​ເດຍ ແລະ ງານ​ລ້ຽງ​ສະຫຼອງ​ວັນຊາດ​ອິນ​ເດຍ ໂດຍ​ເປັນເຈົ້າພາບ​ຂອງ​ປະທານາທິບໍດີອິນ​ເດຍ.

ໃນ​ວັນ​ດຽວ​ກັນ ທ່ານ ທອງ​ລຸນ ສີ​ສຸ​ລິດ ໄດ້​ພົບ​ປະ​ສອງ​ຝ່າຍກັບທ່ານ ນາ​ເຣັນ​ດຣາ ໂມ​ດີ ທີ່​ເຮືອນຮັບແຂກ​ລັດຖະບານ ເຊິ່ງ​ສອງຝ່າຍ​ໄດ້​ຕີ​ລາຄາ​ສູງ​ຕໍ່​ໝາກຜົນຂອງ​ການ​ຮ່ວມ​ມື​ໃນ​ຊຸມ​ປີ​ຜ່ານມາ ພ້ອມ​ທັງ​ໃຫ້​ຄວາມ​ໝາຍ​ໝັ້ນ ທີ່​ຈະ​ເສີມ​ຂະຫຍາຍ​ສາຍ​ພົວພັນທີ່​ດີ​ລະຫວ່າງ​ກັນໃຫ້​ແໜ້ນ​ແຟ້ນຂຶ້ນ​ກວ່າ​ເກົ່າ ເພື່ອ​ນຳ​ມາ​ເຊິ່ງ​ຜົນປະໂຫຍດ​ລວມ​ຂອງ​ສອງ​ປະເທດ ແລະ ຄວາມ​ສົມບູນ​ພູນ​ສຸກ​ຂອງປະຊາຊົນ​ສອງ​ຊາດ ລາວ-ອິນເດຍ.

ທີ່ມາ ວຽງຈັນໃຫມ່