ພ້ອມກັນກ້າວໄປສູ່ການຫັນປ່ຽນເປັນສັງຄົມດິຈິຕອນ

0
17

ກະຊວງ​ໄປສະນີ ໂທລະ​ຄົມ​ມະນາ​ຄົມ ແລະ ການ​ສື່ສານ ຮ່ວມກັບ​ສະມາຄົມ​ການ​ຄ້າໄອ​ຊີ​ທີລາວ ແລະ ກົມ​ສົ່ງເສີມ​ການ​ຄ້າຈັດ​ງານ​ວາງສະແດງ​ເຕັກ​ໂນ​ໂລຊີ ສື່ສານ ຂໍ້​ມູນ​ຂ່າວສານ (Lao ICT EXPO 2018) ຂຶ້ນ​ວັນ​ທີ 24-28 ມັງກອນ 2018 ທີ່​ສູນການ​ຄ້າ​ລາວ-ໄອ​ເຕັກ ນະຄອນຫຼວງ​ວຽງ​ຈັນ ມີ​ທ່ານ ສົມ​ດີ ດວງ​ດີ ຮອງ​ນາຍົກລັດຖະມົນຕີ ລັດ​ຖະມົນຕີ​ກະຊວງ​ການ​ເງິນ ທ່ານ ທັນສະໄໝ ກົມ​ມະ​ສິດ ລັດຖະມົນຕີກະຊວງ​ໄປສະນີ ໂທລະ​ຄົມ​ມະ​ນາຄົມ ແລະ ການ​ສື່ສານ ພ້ອມດ້ວຍ​ຜູ້ຕາງໜ້າ​ຈາກ​ກະຊວງ ອົງການ ແລະ ຫ້າງ​ຮ້ານ ຜູ້​ປະກອບການ​ດ້ານ​ໄອ​ຊີ​ທີ​ທັງ​ພາຍ​ໃນ ແລະ ຕ່າງປະເທດ​ເຂົ້າ​ຮ່ວມ.

ງານ​ວາງສະແດງ​ພາຍ​ໃຕ້​ຫົວຂໍ້ “ພ້ອມ​ກັນ​ກ້າວ​ໄປ​ສູ່​ການ​ຫັນປ່ຽນ​ເປັນ​ສັງຄົມ​ດິ​ຈິ​ຕອນ” ເຊິ່ງສັງຄົມ​ດັ່ງກ່າວ​ແມ່ນ​ປັດ​ໄຈ​ພື້ນຖານ​ຂອງ​ການ​ຫັນ​ເປັນ​ສັງຄົມ​ທັນສະໄໝ ແລະ ສີວິໄລ ທ່ານ ທັນສະໄໝ ກົມ​ມະ​ສິດ ກ່າວ​ວ່າ: ການ​ຈັດ​ງານ​ຄັ້ງ​ນີ້ ​ເພື່ອ​ໃຫ້​ທຸກພາກສ່ວນ​ໃນ​ສັງຄົມ​ໄດ້​ຮັບ​ຮູ້​ເຖິງ ການ​ພັດທະນາ​ທາງ​ດ້ານ​ເຕັກ​ໂນໂລ​ຊີ ສື່ສານ ແລະ ຂໍ້​ມູນ​ຂ່າວສານ​ຢູ່​ລາວ ທັງ​ເປັນ​ເວທີ​ທີ່​ໃຫ້​ບັນດາ​ຜູ້​ປະກອບ​ການ ຜູ້​ຜະລິດ ນຳໃຊ້ ຕະຫຼອດ​ຮອດ​ຜູ້​ບໍລິການ​ໄດ້ແລກປ່ຽນ​ປະສົບ​ການ ສ້າງຄວາມ​ເຂົ້າໃຈ ແລະ ສ້າງ​ສາຍພົວພັນ​ຮ່ວມ​ມື​ໃນ​ການ​ພັດທະນາເຕັກ​ໂນ​ໂລ​ຊີ​ຮ່ວມ​ກັນ​ໃນ​ອະ​ນາຄົດ ໂດຍ​ປັດຈຸບັນ​ລາວ​ເຮົາ ມີ​ຜູ້ປະກອບ​ການ​ດ້ານ​ໄອ​ຊີ​ທີຫຼາຍກວ່າ 5 ພັນ​ບໍລິສັດ ເຮັດ​ໃຫ້​ສັນຍານ​ໂທລະສັບ​ມື​ຖື ກວມ​ເອົາ 91% ເຊິ່ງ​ກະຊວງ​ໄປສະນີ ໂທລະຄົມມະນາຄົມ ແລະ ການ​ສື່ສານ ມີ​ວິໄສ​ທັດ​ຮອດ​ປີ 2030 ແລະ ຍຸດ​ທະ​ສາດ 10 ປີ (2015-2025) ແຜນ​ພັດທະນາ​ຮອດ​ປີ 2020 ລວມ​ທັງ​ແຜນ​ພັດທະນາລະບົບ​ບໍລິຫານ​ລັດ​ດ້ວຍ​ເອ​ເລັກໂຕຣ​ນິກ ຮອດ​ປີ 2020 ໄດ້​ສ້າງບັນດາ​ນິຕິ​ກຳ ໂດຍ​ສະເພາະແມ່ນ​ກົດໝາຍໄອ​ຊີ​ທີ ກົດໝາຍການ​ຕ້ານ​ອາ​ຊະ​ຍາ​ກຳ​ທາງ​ດ້ານຄອມ​ພີວ​ເຕີ ແລະ ກົດໝາຍ​ປົກປ້ອງ​ຂໍ້​ມູນ​ຂ່າວສານ ເພື່ອ​ຮອງຮັບ​ການ​ຂະຫຍາຍຕົວ ແລະ ຊົມໃຊ້​ທາງ​ດ້ານ​ເຕັກ​ໂນ​ໂລ​ຊີ​ທັນ​ສະໄໝ​ໃນ​ອະນາຄົດ​ໃຫ້​ມີ​ຄວາມ​ຖືກຕ້ອງ ແລະ ສອດຄ່ອງ​ກັບ​ການພັດທະນາ​ເສດຖະກິດ-ສັງຄົມຂອງ​ປະເທດ.

ສຳລັບ​ງານ​ວາງສະແດງ​ຄັ້ງ​ນີ້ ຜູ້​ເຂົ້າ​ຮ່ວມ​ຈະ​ໄດ້​ພົບ​ກັບ​ຜະລິດຕະ​ພັນ​ກ່ຽວ​ກັບ​ເຕັກ​ໂນ​ໂລ​ຊີ ສື່ສານ ຂໍ້​ມູນ​ຂ່າວສານ ຄວາມ​ຮູ້ກ່ຽວ​ກັບ​ການ​ນຳ​ໃຊ້​ຄອມ​ພິວ​ເຕີ ຊອບ​ແວ​ຕ່າງໆ ເຕັກ​ໂນ​ໂລ​ຊີ​ລະບົບ ການ​ຮັກສາ​ຄວາມ​ປອດ​ໄພເອ​ເລັກ​ໂຕຣ​ນິກ ຕະຫຼອດ​ຮອດການ​ນຳ​ໃຊ້​ເຕັກ​ໂນ​ໂລ​ຊີ​ທັນ​ສະໄໝ​ ເຂົ້າ​ໃນ​ການ​ບໍລິຫານ​ວຽກງານ​ຕາມ​ອົງການ ສະ​ຖາ​ບັນການ​ສຶກ​ສາ​ຕ່າງໆ ຈາກ​ບັນດາ​ຜູ້ປະກອບ​ການ​ດ້ານ​ໄອ​ຊີ​ທີ​ທັງ​ພາຍໃນ ແລະ ຕ່າງປະເທດ​ທີ່​ເຂົ້າ​ຮ່ວມງານ​ວາງສະແດງ ພ້ອມ​ກັນ​ນັ້ນ ພາຍ​ໃນ​ງານ​ຍັງ​ມີ​ການ​ຈັດ​ກິດ​ຈະກຳ ​ເພື່ອ​ສົ່ງເສີມ​ຄວາມ​ຮູ້​ດ້ານ​ໄອຊີ​ທີ ໂດຍ​ສະເພາະແມ່ນ​ການຈັດ​ກິດຈະກຳ​ແຂ່ງຂັນ​ກີລາດິ​ຈິຕອນ (E-Sports) ເປັນຕົ້ນ.