ອາຊຽນຮ່ວມກັນຄວບຄຸມບັນຫາຢາປາບສັດຕູພືດ

    0
    12

    ກອງ​ປະຊຸມ​ຄັ້ງ​ທີ 22 ຂອງໜ່ວຍ​ງານ​ຊ່ຽວຊານ ກ່ຽວ​ກັບການ​ເຊື່ອມ​ໂຍງ​ການ​ຄວບ​ຄຸມການ​ຕົກ​ຄ້າງ​ສູງ​ສຸດ​ຂອງ​ຢາ​ປາບສັດຕູ​ພືດ ແລະ ກອງ​ປະຊຸມ​ປືກສາ​ຫາລື​ກ່ຽວ​ກັບ​ຄວບ​ຄຸມ​ການຕົກ​ຄ້າງ​ສູງ​ສຸດ​ຂອງ​ຢາ​ປາບ​ສັດຕູພືດ ທີ່​ໂຮງແຮມ​ລາວ​ພລາ​ຊາ ນະຄອນຫຼວງ​ວຽງ​ຈັນ ຈັດ​ໃນ​ລະຫວ່າງ​ວັນ​ທີ 22-25 ມັງກອນ 2018 ໂດຍ​ການ​ເປັນ​ປະທານຂອງ​ທ່ານ ວິໄລ​ສຸກ ເຄນ​ນະ​ວົງ ຫົວໜ້າ​ກົມ​ປູກຝັງ ກະຊວງ​ກະ​ສິກຳ ແລະ ປ່າໄມ້ ມີ​ຜູ້ຕາງໜ້າຈາກ​ກອງ​ເລຂາ​ອາ​ຊຽນ ບັນດາຜູ້ຕາງໜ້າ​ຄູ່​ຮ່ວມ ແລະ ຜູ້​ແທນຈາກ​ບັນດາ​ປະເທດ​ສະມາຊິກ​ອາຊຽນ​ ເຂົ້າ​ຮ່ວມ.

    ເພື່ອ​ທົບ​ທວນຄືນ​ການຈັດຕັ້ງປະຕິບັດ​ວຽກ​ງານ​ຂອງ​ໜ່ວຍງານດັ່ງກ່າວ​ໃນ​ປີ 2017 ຜ່ານມາ ໂດຍ​ສະເພາະແມ່ນ​ການ​ຈັດຕັ້ງ​ປະຕິບັດ​ຜົນ​ຂອງ​ກອງ​ປະຊຸມ ຄັ້ງ​ທີ 21 ທີ່​ປະເທດມາ​ເລ​ເຊຍ ນອກ​ນັ້ນ ກອງ​ປະຊຸມ​ຄັ້ງ​ນີ້ ບັນດາ​ຜູ້​ຊ່ຽວຊານ​ຈາກ​ປະເທດ​ສະມາ​ຊິກ ຍັງ​ຈະ​ໄດ້​ປຶກສາ​ຫາລືກ່ຽວ​ກັບ​ການ​ຄວບ​ຄຸມ​ການ​ຕົກຄ້າງ​ສູງ​ສຸດ​ຂອງ​ຢາ​ປາບ​ສັດຕູ​ພືດ ແລະ ຜະລິດ​ຕະ​ພັນ​ພືດ ທີ່​ມີ​ການຄ້າຂາຍ​ຮ່ວມ​ກັນ​ໃນ​ອາ​ຊຽນ ເປັນຕົ້ນ​ແມ່ນ ໝາກ​ເພັດ ໝາກເຂືອ ໝາກ​ມັງກອນ ມັງຄຸດ ລຳໄຍ ໝາກມ່ວງ ໝາກ​ຮຸ່ງ ແລະ ອື່ນໆ.

    ທ່ານ ວິໄລ​ສຸກ ເຄນ​ນະ​ວົງ ໄດ້ກ່າວ​ວ່າ: ການຈັດຕັ້ງ​ປະຕິບັດຂອບ​ວຽກ​ດ້ານ​ຄວາມ​ປອດ​ໄພຂອງ​ອາຫານ​ອາ​ຊຽນ ໃຫ້​ປາກົດຜົນ​ເປັນ​ຈິງ ສຳລັບ​ການ​ເຊື່ອມໂຍງ​ດ້ານ​ການ​ຄວບ​ຄຸມ​ການ​ຕົກຄ້າງ​ສູງ​ສຸດ​ຂອງ​ຢາ​ປາບ​ສັດຕູ​ພືດອາ​ຊຽນ ແມ່ນ​ກົມ​ປູກຝັງ ກະຊວງ​ກະສິກຳ ແລະ ປ່າໄມ້ຂອງ ​ສປປ ລາວ ເປັນ​ຈຸດ​ປະສານ​ງານ ເພື່ອ​ເປັນ​ການ​ຄຸ້ມ​ຄອງ​ຢາ​ປາບສັດຕູ​ພືດຢູ່ ​ສປປ ລາວ ກໍ່​ຄືອາຊຽນ ເພື່ອ​ປະກອບສ່ວນ​ເຂົ້າ​ໃນວຽກ​ງານ​ຄວາມ​ປອດ​ໄພ​ຂອງ​ອາຫານ ຜ່ານ​ມາ​ກົມ​ປູກຝັງ​ກະຊວງກະສິກຳ ແລະ ປ່າໄມ້ ໄດ້​ເອົາໃຈໃສ່​ຈັດ​ຕັ້ງ​ປະຕິບັດ​ຫຼາຍ​ໜ້າ​ວຽກ ຕາມ​ພາລະ​ບົດບາດ ເປັນຕົ້ນແມ່ນ​ສຳເລັດ​ການ​ສ້າງ ແລະ ເຜີຍແຜ່​ດຳລັດ​ຂອງ​ນາຍົກ​ລັດຖະ​ມົນຕີ ວ່າ​ດ້ວຍ​ການ​ຄຸ້ມ​ຄອງຢາ​ປາບ​ສັດຕູ​ພືດ ແລະ ກົດໝາຍວ່າ​ດ້ວຍ​ການ​ປ້ອງ​ກັນ ແລະ ກັກກັນ​ພືດ ແລະ ສ້າງ​ລະບຽບ​ການ​ທີ່​ກ່ຽວຂ້ອງ ພ້ອມ​ທັງໄດ້​ຈັດ​ເຝິກອົບຮົມ​ໃຫ້​ແກ່​ພະນັກງານ​ກະສິກຳ ຜູ້​ປະກອບ​ການ ແລະ ຊາວ​ກະສິກອນ ກ່ຽວ​ກັບການ​ນຳ​ໃຊ້​ຢາ​ປາບ​ສັດຕູ​ພືດ ທີ່ຖືກຕ້ອງ​ຕາມ​ຫຼັກ​ວິຊາ​ການ​ປູກພືດ.