ການສຶກສານັບມື້ເຕີບໃຫຍ່ຂະຫຍາຍຕົວ ຫັນ ໄປສູ່ການປ່ຽນແປງໃໝ່ທີ່ດີ ແລະ ມີ ຄຸນນະພາບ

0
9

ຕະຫລອດ 42 ປີ ​ແຫ່ງ​ການ​ສະຖາປະນາ​ເປັນ​ ສປປ ລາວ ກໍ​​ໄດ້​ມີການພັດທະນາໄປສູ່ຄວາມຈະ​ເລີນຮຸ່ງ​ເຮືອງສີວິໄລ ໃນຫລາຍໆດ້ານ, ​ປະຊາຊົນ​ບັນດາ​ເຜົ່າ​ຫລຸດ​ພົ້ນ ​ອອກ​ຈາກ​ຄວາມທຸກ​ຍາກ ແລະ ດ້ອຍ​ພັດທະນາ, ​ໂດຍສະ​ເພາະວຽກ​ງານ​ການ​ສຶກສາ​ ​​ກໍ​ຫັນໄປ​ສູ່ການ​ປ່ຽນ​​ແປງ​ໃໝ່ທີ່​ດີ ​ແລະ ​ມີ​ຄຸນ​ນະພາ​ບ ​ເປັນ​ຕົ້ນ​ແມ່ນ ການ​ປະ​ຕິຮູບ​ລະບົບການ​ສຶກສາ ​ແລະ ກິລາ ​ໄລຍະ 1 ​ແລະ ​ໄລຍະ 2 ກໍ​ຄື 5 ຫລັກ​ມູນ​ການ​ສຶກສາ ​​ເຊັ່ນ: ຄຸນສົມບັດສຶກສາ, ສິລະ​ປະ​ສຶກສາ, ພາລະ​ສຶກສາ, ປັນຍາ​ສຶກສາ ​ແລະ ​ແຮງ​ງານ​ສຶກສາ​ ໄດ້ຮັບ​ການ​ປະຕິບັດ​ສໍາ​ເລັດ​ຕາມ​ເປົ້າ​ໝາຍ. ຕໍ່​ກັບ​ຜົນ​ສໍາ​ເລັດ​ແຫ່ງ​ການ​ປົກ​ປັກ​ຮັກສາ ​ແລະ ພັດທະນາ​ປະ​ເທດ​ຊາດ ຜົນງານ​ດັ່ງກ່າວ​ນັ້ນ.

ທ່ານ ອິນ​ຖາ ສຸ​ພັນ​ເດດ ຮອງ​ຫົວໜ້າ​ຫ້ອງການ​ສຶກສາ​ທິການ ​ແລະ ກິລາ ​ເມືອງ​ຈັນທະ​ບູລີ ​ໄດ້​ໃຫ້​ສໍາພາດ​ຕໍ່​ນັກ​ຂ່າວ​ ສໍານັກ​ຂ່າວສານ​ປະ​ເທດ​ລາວ ​​ໃນ​ວັນ​ທີ 30 ພະຈິກ 2017 ນີ້​ ວ່າ: ​ຕະຫລອດ​ໄລຍະ​ 42 ປີ​ ລະບົບ​ການ​ສຶກສາ​ຂອງ ສປປ ລາວ ດຳ​ເນີນ​ໄປ​ຢ່າງ​ຖືກ​ທິດ ​ແລະ ມີ​ບາດກ້າວ​ຂະຫຍາຍຕົວ​ຂຶ້ນ​ເລື້ອຍໆ. ທັງ​ນີ້, ​ກໍ​ຍ້ອນມີ​ພັກປະຊາຊົນປະຕິວັດ​ລາວ ທີ່​ປີ​ຊາ​ສາມາດ, ​ມີ​ວິ​ໄສ​ທັດ​ກວ້າງ​ໄກຊີ້​ນຳໆ ​ພາ​, ມີ​ລັດ​ຄຸ້ມ​ຄອງ ​ແລະ ປະຊາຊົນ​ເປັນ​​ເຈົ້າ ຕາມ​ທິດ​ປ່ຽນ​ແປງ​ໃໝ່. ຈາກ​ຜົນ​ສໍາ​ເລັດ ​ແລະ ການນໍາ​ພາ​ຂອງ​ພັກ​ປະຊາຊົນ ປະຕິວັດ​ລາວ​ ມາ​ຮອດ​ປັດຈຸ​ບັນ ຍິ່ງ​ເຫັນ​ໄດ້​ວ່າ ວຽກ​ງານ​ການ​ສຶກສາ ​ ມີ​ບາດກ້າວ​ເຕີບ​ໃຫຍ່​ຂະຫຍາຍຕົວ, ​ຕາໜ່າງການ​ສຶກສາ​​ໄດ້​ຂະຫຍາຍ​ລົງ ​ສູ່​ທ້ອງ​ຖິ່ນຮາກ​ຖານ, ​ເຂດ​ຫ່າງ​ໄກ​ສອກ ຫລີກ. ​ເດັກນ້ອຍ​ໃນ​ເກນ​ອາຍຸ​ໄວ​ຮຽນ ​ໄດ້​ເຂົ້າ​ໂຮງຮຽນ, ເງື່ອນ​ໄຂ​ຊີວິດ​ການ​ເປັນ​ຢູ່​ຂອງ​ປະຊາຊົນບັນດາ​ເຜົ່າ ກໍ​ໄດ້​ຮັບ​ການ​ຍົກ​ລະດັບດີ​ຂຶ້ນ​ ​ເຮັດ​ໃຫ້​ບົດບາດ​ການ​ນໍາພາ​ຂອງ​ພັກ​​ສູງ​ເດັ່ນ​ຂຶ້ນ​ໃນ​ເວທີ​ພາກ​ພື້ນ ​ແລະ ສາກົນ, ​ໂດຍໄດ້​ຮັບ​ການ​ຍ້ອງຍໍ​ຊົມ​ເຊີຍ ຈາກ​ປະຊາ​ຄົມ​ໂລກ. ​ໃນ​ນັ້ນ​, ວຽກງານການ​ສຶກສາກໍ​ມີ​ຫລາຍ​ດ້ານ​ ໄດ້​ຮັບ​ການ​ພັດທະນາ​ບໍ່​ວ່າ ​ທາງ​ດ້ານ​ປະລິມານ ​ແລະ ຄຸນ​ນະພາ​ບ. ນັກ​ສຶກສາ​ທີ່​ຮຽນ​ຈົບ​ປະລິນຍາ​ຕີ, ປະລິນຍາ​ໂທ ​ແລະ ປະລິນຍາເອກ ​ໄດ້​ມີ​ຈໍານວນ​ເພີ່ມ​ຂຶ້ນ, ຜູ້​ທີ່​ຈົບ​ການ​ສຶກສາ​ຈາກ​ຕ່າງປະ​ເທດ ​ໃນ​ແຕ່​ລະປີ ກໍ​ມີ​ຈໍານວນ​ເພີ່ມ​ຂຶ້ນ,​ ​ໂຮງຮຽນ​ທັງ​ພາກ​ລັດ ​ແລະ ​ເອກະ​ຊົນ ​ໄດ້ຂະຫຍາຍ​ໄປ​ທົ່ວ​ທຸກ​ຂົງເຂດ ​ໃນທົ່ວ​ປະ​ເທດ. ອັນ​ພົ້ນ​ເດັ່ນ​ ກໍ​ຄື​ ພັກ-ລັດຖະບານ ​ໄດ້​ເລັ່ງ​ໃສ່​ການ​ລົບ​ລ້າງ​ຄວາມ​ບໍ່​ຮູ້​ໜັງສື​ ໃຫ້​ປະຊາກອນ​ໃນ​ເກນ​ອາຍຸ 6-14 ປີ, 15-40 ​ທີ່​ບໍ່​ຮູ້​ໜັງສື ​ແລະ ບໍ່​ທັນ​ຈົບ​ປະຖົມ ​ໂດຍ​ສະ​ເພາະ​ແມ່ນ​​ເຂດ​ຫ່າງ​ໄກ​ສອກຫລີກ.

ທ່ານ ອິນ​ຖາ ສຸ​ພັນ​ເດດ ​ກ່າວ​ຕື່ມ​ວ່າ: ຖ້າ​ທຽບ​ໃສ່​ໄລຍະ​ກ່ອນ​ ມາ​ຮອດ​ປັດຈຸບັນ​ເຫັນໄດ້​ວ່າ​ ການສຶກສາມີ​ການ​ເຕີບ​ໃຫຍ່​ຂະຫຍາຍຕົວ​ເປັນ​ກ້າວໆ ​ໂດຍ​ສະ​ເພາະໂຮງຮຽນ​ເຫັນ​ວ່າ​ ມີຈໍານວນ​ເພີ່ມ​ຂຶ້ນ ສໍາລັບເມືອງ​ຈັນທະ​ບູລີ​ ໄດ້​ແບ່ງ​ເປັນ 4 ​ເຂດ​ການ​ສຶກສາ ​ຄື: ​ເຂດ​ບ້ານ​ມີ​ໄຊ, ​ເຂດ​ນາ​ໄຮ່​ດຽວ, ​ເຂດ​ບ້ານ​ສະຫວ່າງ ​ແລະ ​ເຂດ​ໜອງ​ທາ​ເໜືອ ມີ​ໂຮງຮຽນ​ທັງ​ໝົດ 90 ກວ່າ​ແຫ່ງ, ພາກ​ລັດ 34 ​ແຫ່ງ, ຄູ​ສອນ​ທັງ​ໝົດ 1.200 ກວ່າ​ຄົນ; ຍິງ 900 ກວ່າ​ຄົນ, ພາກ​ລັດ​ເກືອບ 500 ຄົນ; ຈໍານວນນັກຮຽນທັງ​ໝົດ​ທົ່ວ​ເມືອງ ມີ 24.300 ກວ່າ​ຄົນ, ຍິງ 12.000 ກວ່າ​ຄົນ; ພາກ​ລັດ 8.800 ກວ່າ​ຄົນ, ຍິງ 4.500 ກວ່າ​ຄົນ. ຄຽງ​ຄູ່​ກັບ​ການ​ປະຕິບັດ​ ແຜ​ນພັດທະນາ​ເສດຖະກິດ-ສັງຄົມ​ຂອງ​ເ​ມື​ອງຈັນທະ​ບູລີ, ​ໂດຍ​ອີງ​ຕາມ 5 ຫລັກ​ມູນ​ ຂອງ​ການ​ສຶກສາ ​ແລະ 3 ຂໍ້​ແຂ່ງຂັນ ​ທີ​ກະຊວງ​ສຶກສາ​ທິການ ​ແລະ ກິລາ​ ວາງ​ອອກ​ນັ້ນ ກໍ​ໄດ້​ມີ​ຜົນ​ສໍາ​ເລັດ​ຫລາຍ​ໆດ້ານ​ ເຊັ່ນ: ອັດຕາ​ເຂົ້າຮຽນຂອງ​ເດັກ​ ໃນ​ເກນ​ອາຍຸ 0-2 ປີ ບັນລຸ 26,84%; ອັດຕາ​ເຂົ້າຮຽນຂອງ​ເດັກ​ໃນ​ເກນ​ອາຍຸ 3-4 ປີ ບັນລຸ 84,48%; ອັດຕາ​ເຂົ້າ​ຮຽນ​ຂອງ​ເດັກ​ໃນ​ເກນ​ອາຍຸ 5 ປີ ບັນລຸ 99,59%; ອັດຕາ​ເຂົ້າ​ຮຽນ​ຂອງ​ເດັກ​ໃນ​ເກນ​ອາຍຸ 3-5 ປີ​ບັນລຸ​ 88,46%; ສໍາລັບ​ຊັ້ນ​ປະຖົມ​ອັດຕາ​ເຂົ້າ​ຮຽນ ​ແມ່ນກວ່າ 100%; ສ່ວນ​ໃນ​ຊັ້ນ​ມັດທະຍົມ​ຕົ້ນ​ອັດຕາ​ເຂົ້າ​ຮຽນ​ລວມຊັ້ນ 104,38%, ​ມັດທະຍົມ​ປາຍ 90,28%; ອັດຕາ​ເລື່ອນ​ຂັ້ນ-​ຈົບ​ຊັ້ນ 90,76% ​ແລະ 92,74%.

ທີ່ມາ ສຳນັກຂ່າວສານປະເທດລາວ