ປະຊາຊົນບ້ານຫົວຫາດ ເມືອງໄຊພູທອງ ສົມ ທົບທຶນສ້າງທາງເບຕົງເສີມເຫລັກ 420 ແມັດ

0
4

ປະຊາຊົນບ້ານຫົວຫາດ ​ເມືອງ​ໄຊ​ພູ​ທອງ ​ແຂວງ​ສະຫວັນ​ນະ​ເຂດ ​ໄດ້​ສົມທົບ​ທຶນ​ສ້າງ​ເບ​ຕົງ​ເສີມ​ເຫລັກ ​ເຊິ່ງ​ເປັນ​ທາງ​ຊອຍ ມີຄວາມຍາວ 420 ແມັດ, ກວ້າງ 5,60 ແມັດ, ລວມມູນຄ່າກໍ່ສ້າງ 77 ລ້ານ​ກວ່າກີບ ເຊິ່ງເປັນທຶນຂອງປະຊາຊົນ 100%. ທັງນີ້ ກໍເພື່ອເຮັດໃຫ້ການສັນຈອນໄປມາຂອງພໍ່ແມ່ປະຊາ ຊົນສະດວກຂຶ້ນຕື່ມ.

​ໂຄງການ​ດັ່ງກ່າວ​ໄດ້​ເລີ່​ມລົງມື​ກໍ່ສ້າງ​ມາ​ແຕ່​ວັນ​ທີ 13 ພະຈິກ 2017 ​ແລະ ຄາດ​ວ່າ​ຈະໃຫ້ສໍາເລັດໃນວັນທີ 15 ມັງກອນ 2018 ​ເຊິ່ງ​ແຫ​ລ່ງທຶນດັ່ງກ່າວ ແມ່ນໄດ້ຈາກການລະດົມທຶນ ນໍາພໍ່ແມ່ປະຊາຊົນ, ນັກທຸລະກິດ, ຫ້າງຮ້ານພາຍໃນບ້ານ ຕາມຄວາມອາດສາມາດຕາມແຮງສັດທາ ຂອງປະຊາຊົນ ​ໂດຍບໍ່ໄດ້ບັງຄັບ​ແຕ່ໃຫ້ເຫັນແກ່ສ່ວນລວມ ເພື່ອຄວາມສາມັກຄີ ເປັນກຸ່ມກ້ອນ ​ແລະ ​ເພື່ອຜົນປະໂຫຍດສ່ວນລວມ ບວກກັບແຫລ່ງທຶນ ຈາກລາຍຮັບງານບຸນປະຈໍາປີພາຍໃນບ້ານ.

ໃນປີຜ່ານມາບ້ານຫົວຫາດ ແມ່ນໄດ້ສໍາເລັດການກໍ່ສ້າງເສັ້ນທາງເບຕົງ ຜ່ານບ້ານໄປແລ້ວ 1 ເສັນລົງໄປຫາວັດສົມສະອາດ ມີຄວາມຍາວ 250 ແມັດ, ກວ້າງ 5,10 ຊັງຕີແມັດ, ມີມູນຄ່າກໍ່ສ້າງທັງໝົດ 52 ລ້ານກວ່າກີບ ໂດຍແມ່ນທຶນລະດົມຂອງພໍ່ແມ່ປະຊາຊົນຂອງບ້ານເອງ.

ທີ່ມາ ສຳນັກຂ່າວສານປະເທດລາວ