ຈາກຄົນປະສົມພັນໝູ ກ້າວສູ່ຜູ້ນຳຈີນ ຜູ້ມີອິດທິພົນຂອງໂລກ

    0
    10

    ສີ ຈິ້ນຜິງ ເກີດເມື່ອວັນທີ 15 ມິຖຸນາ 1953 ເປັນຜູ້ນຳສູງສຸດແຫ່ງ ສາທາລະນະລັດ ປະຊາຊົນຈີນຄົນປັດຈຸບັນ, ປັດຈຸບັນດຳລົງຕຳແໜ່ງເລຂາທິການພັກຄອມມູນິດຈີນ, ປະທານປະເທດຈີນ, ປະທານຄະນະກຳມາທິການການທະຫານສູນກາງ, ອະທິການບໍດີໂຮງຮຽນສູນກາງຂອງພັກ. ເປັນສະມາຊິກລາຍຊື່ອັນດັບທຳອິດຂອງກົມການເມືອງສູນກາງພັກຄອມມູນິດຈີນ ເຊິ່ງເປັນອົງກອນບໍລິຫານສູງສຸດຂອງຈີນ.

    ສີ ຈິ້ນຜິງ ເປັນຫົວໜ້າຂອງຄະນະຜູ້ນຳຈີນລຸ້ນທີ່ຫ້າຂອງພັກຄອມມູນິດຈີນແລະເປັນຜູ້ນຳຈີນຄົນທຳອິດໃນປະຫວັດສາດທີ່ເກີດຫຼັງການສະຖານປະນາສາທາລະນະລັດປະຊາຊົນຈີນຢ່າງແທ້ຈິງ. ນິດໄສມີທ່າທີທີ່ແຂງກ້າຕໍ່ການສໍ້ລາດບັງຫຼວງແລະຄວາມເປີດເຜີຍກ່ຽວກັບການປະຕິຮູບການເມືອງແລະເສດຖະກິດແບບຕະຫຼາດ.

    ປະຫວັດ:
    ສີ ຈິ້ນຜິງ ເປັນລູກຂອງ ທ່ານ ສີ ຈົງຊຸນ ອະດີດຮອງນາຍົກລັດຖະມົນຕີຈີນ ຜູ້ເຊິ່ງເປັນຄົນໃກ້ຊິດຂອງປະທານເໝົາເຈີຕຸງ ແຕ່ກ່ອນການປະຕິວັດວັດທະນະທຳບໍ່ດົນ ຈົງຊຸນກໍຖືກປົດຕຳແໜ່ງລົງເປັນພຽງກຳມະກອນ ເນື່ອງຈາກເປັນຜູ້ອະນຸມັດໃຫ້ມີການຕີພິມໜັງສືທີ່ວິຈານປະທານເໝົາເຈີຕຸງ ຄອບຄົວ ສີ ກໍເຂົ້າສູ່ຄວາມທຸກຍາກ ແລະເນື່ອງຈາກປະຫວັດທີ່ມີຈຸດດ່າງດຳຂອງພໍ່ເຮັດໃຫ້ເຂົາເປັນນັກຮຽນທີ່ມັກຖືກກັ່ນແກ້ງຢູ່ຕະຫຼອດ ເອື້ອຍຂອງສີກໍຖືກກັ່ນແກ້ງຄືກັນ ດ້ວຍຄວາມທຸກຫຼາຍປະການສຸດທ້າຍເອື້ອຍກໍຂ້າໂຕຕາຍ ແລະແລ້ວ ສີ ຈິ້ນຜິງ ກໍກາຍເປັນໜຶ່ງໃນ 29,000 ປັນຍາຊົນຊຸດທຳອິດທີ່ຖືກເອົາໄປເຂົ້າຮັບການສຶກສາ ໃຊ້ຊີວິດຮຽນຮູ້ການເຮັດໄຮ່ເຮັດນາແລະລ້ຽງສັດ ອາໄສຢູ່ໃນຖໍ້າທີ່ຫຼຽງເຈ່ຍເຫີ ບ້ານນ້ອຍໆ ທາງເໜືອຂອງມົນທົນຊານຊີ ໃນປີ 1969 ເຖິງປານນັ້ນ ເຂົາກໍຍັງມີຄວາມມຸ່ງໝັ້ນຕັ້ງໃຈທີ່ຈະເປັນສະມາຊິກຂອງພັກຄອມມູນິດຈີນຢ່າງແຮງ. ສີ ຈິ້ນຜິງ ເຊິ່ງຍັງຄົງອາໄສຢູ່ໃນຖໍ້າ ໄດ້ຂຽນໃບສະໝັກເປັນສະມາຊິກພັກຄອມມູນິດຈີນ ຂຽນແລ້ວຂຽນອີກ ເຖິງຈະຖືກປະຕິເສດມາຕະຫຼອດ ແຕ່ໃນທີ່ສຸດຫຼັງຈາກຄວາມພະຍາຍາມຫຼາຍເທື່ອຕໍ່ຫຼາຍທີ ເຂົາກໍໄດ້ຮັບເຂົ້າເປັນສະມາຊິກພັກຄອມມູນິດຈີນ.

    ປີ 1972 ເຂົາໄດ້ພົບກັບພໍ່ອີກເທື່ອໜຶ່ງດ້ວຍນໍ້າຕາ ພໍ່ຂອງເຂົາເຊິ່ງຜ່ານການໃຊ້ແຮງງານມາຢ່າງໜັກກວ່າ 10 ປີ ບໍ່ສາມາດຈື່ໜ້າລູກຊາຍຂອງຕົນເອງໄດ້ ຕ້ອງຜ່ານການໂອ້ລົມສົນທະນາຫຼາຍເລື່ອງພໍ່ຈຶ່ງຮູ້ວ່າແມ່ນລູກຂອງຕົນ.

    ເມື່ອຊື່ສຽງຂອງພໍ່ໄດ້ຮັບການເຊີດຊູຂຶ້ນມາໃໝ່ ພາຍຫຼັງການມໍລະນະກຳຂອງ ເໝົາ ເຈີຕຸງ ເຂົາກັບມາສຶກສາຕໍ່ຈົນກະທັ່ງສຳເລັດການສຶກສາດ້ານເຄມີສາດຈາກມະຫາວິທະຍາໄລຊິງຫວາ ແລະເລິ່ມມີສາຍສຳພັນກັບບຸກຄົນສຳຄັນໃນກອງທັບ ຫຼັງຈາກນັ້ນ ເຂົາກໍເຮັດວຽກຮັບໃຊ້ພັກທີ່ມົນທົນເຫີເປີ່ຍ ໃນຖານະຜູ້ຊ່ຽວຊານໃນການປະສົມພັນໝູ.

    ທີ່ຝູຈ້ຽນ ສີ ຈິ້ນຜິງ ເປັນຜູ້ລິເລິ່ມພັດທະນາຄວາມສຳຄັນທາງເສດຖະກິດກັບໄຕ້ຫວັນ ຈົນໄດ້ເປັນຮັກສາການເລຂາທິການພັກຄອມມູນິດຈີນ ສາຂາຊ່ຽງໄຮ້ ໃນລະຫວ່າງ 7 ເດືອນທີ່ຮັກສາການ ເຂົາພັດທະນາຄວາມສຳພັນກັບ ຈຽງ ເຈີໝິນ ອະດີດເລຂາທິການພັກແລະແກນນຳຄົນສຳຄັນຂອງກຸ່ມຜູ້ນຳລຸ້ນທີ 3 ຂອງຈີນ.

    ສີ ຈິ້ນຜິງ ຂຶ້ນດຳລົງຕຳແໜ່ງເປັນເລຂາທິການພັກຄອມມູນິດຈີນແລະປະທານຄະນະກຳມາທິການທະຫານສູນກາງຂອງຈີນ ຫຼັງຈາກການປະຊຸມໃຫຍ່ຂອງພັກຄັ້ງທີ 18 ໃນເດືອນພຶດສະພາ 2012 ແລະຂຶ້ນດຳລົງຕຳແໜ່ງປະທານປະເທດແລະປະທານຄະນະກຳມາທິການທະຫານສູນກາງແຫ່ງສາທາລະນະລັດປະຊາຊົນຈີນໃນເດືອນ ມີນາ 2013.

    ແຫຼ່ງຂໍ້ມູນ: ວິກິພິເດຍ

    Source