ພິທີຖະແຫຼງຂ່າວ TOYOTA MEKONG CLUB CHAMPIONSHIP 2017

    0
    9

           ໃນຕອນບ່າຍຂອງວັນຈັນ 13 ພະຈິກ 2017 ຢູ່ທີ່ໂຮງແຮມ ຄອນລາດ ນະຄອນຫລວງບາງກອກ ປະເທດໄທ ໄດ້ມີພິທີຖະແຫລງຂ່າວ ການແຂ່ງຂັນບານເຕະຊີງແຊ້ມແມ່ຂອງແຊ້ມປ້ຽນຊິບ 2017 ເປັນກຽດເຂົ້າຮ່ວມ ເປັນປະທານໃນພິທີດັ່ງກ່າວໂດຍມີ ທ່ານ ຮາວ ກວກ ທຽນ ( Mr. Hao Quoc Tien ) ກຳມະການຜູ້ຈັດການໃຫຍ່ ບໍລິສັດ ໂຕໂຢຕ້າ ມໍເຕີ້ ເອເຊຍ ປາຊີຟິກ, ພ້ອມດ້ວຍ ຜູ້ຕາງຫນ້າ ແຕ່ລະສະຫະພັນບານເຕະແຫ່ງຊາດ ຂອງບັນດາປະເທດໃນເຂດແມ່ນ້ຳຂອງ ພ້ອມດ້ວຍແຂກຖືກເຊີນ ແລະ ສື່ມວນຊົນເຂົ້າຮ່ວມ , ເຊິ່ງຕົວແທນຈາກ ສະຫະພັນບານເຕະແຫ່ງຊາດລາວ ເຂົ້າຮ່ວມ ໂດຍ ທ່ານ ປະສາດໄຊ ພິລາພັນເດຊ ຮອງປະທານ ສະຫະພັນບານເຕະແຫ່ງຊາດລາວ ແລະ ທ່ານ ປອ. ໄຊບັນດິດ ຣາຊະພົນ ເລຂາທິການ ສະຫະພັນບານເຕະແຫ່ງຊາດລາວ . ໂຕໂຢຕ້າ ໄດ້ເລີ່ມຈັດການແຂ່ງຂັນບານເຕະຊີງແຊ້ມແມ່ຂອງແຊ້ມປ້ຽນຊິບ ຕັ້ງແຕ່ປີ 2014 ເປັນຕົ້ນມາ, ໂດຍຈຸດປະສົງ ຮ່ວມສ້າງກິດຈະກຳໃຫ້ແກ່ຊຸມຊົນທ້ອງຖີ່ນ ຂອງປະເທດໃນເຂດແມ່ນ້ຳຂອງ ດ້ວຍກິລາ ບານເຕະ, ໂດຍລາຍການດັ່ງກ່າວ ໄດ້ຈັດຂຶ້ນ ທີ່ປະເທດຫວຽດນາມ ແລະ ມີທີມເຂົ້າແຂ່ງຂັນຈາກ 4 ປະເທດ ມີ ລາວ, ກຳປູເຈຍ, ມຽນມາ ແລະ ຫວຽດນາມ ເຊິ່ງທີມຊະນະເລີດຕົກເປັນຂອງ ສະໂມສອນ ບີຄາເມັກ ບິງເດືອງ ຈາກປະເທດຫວຽດນາມ, ຕໍ່ມາໃນປີ 2015 ທີມຈາກປະເທດໄທ ໄດ້ ເຂົ້າຮ່ວມແຂ່ງຂັນໃນລາຍການດັ່ງກ່າວ ແລະ ມີການ ຈັດການແຂ່ງຂັນໃນທຸກປະເທດ ທີ່ເຂົ້າຮ່ວມ ເຊິ່ງທີມຊະນະເລີດ ຕົກເປັນຂອງ ສະໂມສອນ ບູຣີຣຳ ຢູໄນເຕັດ ຈາກປະເທດໄທ. ໃນປີ 2016 ທີ່ຜ່ານມາ ສະໂມສອນ ບູລິຣຳ ຢູໄນເຕັດ ຕົວແທນ ຈາກປະເທດໄທ ແມ່ນທີມທີ່ຊະນະເລີດ ແລະ ຮອງຊະເລີດ ແມ່ນ ສະໂມສອນ ລ້ານຊ້າງ ຢູໄນເຕັດ ຕົວແທນຈາກ ປະເທດ ລາວ.

          ສຳລັບ ການແຂ່ງຂັນບານເຕະຊີງແຊ້ມແມ່ຂອງແຊ້ມປ້ຽນຊິບ 2017 (TMCC) ປີນີ້ເປັນປີທີ 4 ເຊິ່ງຈະແຂ່ງຂັນ ໃນວັນທີ 09 ທັນວາ 2017 ຫາ ວັນທີ 06 ມັງກອນ 2018, ໂດຍມີຕົວແທນຈາກສະໂມສອນແຊ້ມບານເຕະ 4 ປະເທດເຂົ້າຮ່ວມແຂ່ງຂັນ ຄື: ລາວພຣີເມຍລີກ ສະໂມສອນ ລາວໂຕໂຢຕ້າ, ເມັດໂຟນ ກຳປູເຈຍ ພຣີເມຍລີກ, ໂຕໂຢຕ້າລີກຄັບ ແລະ ໂຕໂຢຕາວີລີກ 1 .

    ຕາຕະລາງການແຂ່ງຂັນແມ່ນແບ່ງອອກເປັນ 3 ຮອບຄື :

    – ຮອບທຳອິດ ນັດທີ 1 ວັນທີ 09 ທັນວາ 2017 ຕົວແທນ ສະໂມສອນ ຫວຽດນາມ ພົບ ຕົວແທນ ສະໂມສອນ ຈາກ ກຳປູເຈຍ ແລະ ນັດທີ 2 ວັນທີ 13 ທັນວາ 2017 ຕົວແທນ ສະໂມສອນ ຈາກ ກຳປູເຈຍ ພົບ ສະໂມສອນ ຈາກ ຫວຽດນາມ.

    – ຮອບຮອງຊະນະເລີດ ຈະມີຂຶ້ນຢູ່ ສປປ ລາວ ໃນວັນທີ 17 ທັນວາ 2017 ເວລາ 18:30 ແຂ່ງຂັນຢູ່ທີ່ສະນາມກິລາແຫ່ງຊາດຫລັກ 16 , ເຊິ່ງ ລາວໂຕໂຢຕ້າ ເອຟຊີ ແຊ້ມຈາກລາວພຣີເມຍລີກ ຈະພົບກັບ ທີມທີ່ຊະນະ ໃນຮອບທຳອິດ.

    – ຮອບຊີງຊະນະເລີດ ນັດທີ 1 ຈະໄດ້ຈັດຂຶນໃນວັນທີ 23 ທັນວາ 2017 ທີມທີ່ຊະນະໃນຮອບຮອງຊະນະເລີດ ຈະພົບກັບ ທີມແຊ້ມໂຕໂຢຕ້າລີກຄັບ ຈາກປະເທດ ໄທ ແຂ່ງຂັນຢູ່ທີ່ປະເທດ ທີ່ຊະນະ ໃນຮອບຮອງຊະນະເລີດ ແລະ ນັດທີ 2 ຈະແຂ່ງຂັນຢູ່ໄທ ໃນວັນທີ 06 ມັງກອນ 2017 ທີມແຊ້ມໂຕໂຢຕ້າລີກຄັບ ຈາກປະເທດ ໄທ ພົບ ທີມທີ່ຊະນະໃນຮອບຮອງຊະນະເລີດ ແຂ່ງຂັນຢູ່ທີ່ປະເທດໄທ.         
            ເງິນລາງວັນການແຂ່ງຂັນຄັ້ງນີ້ອັນດັບແມ່ນອັນດັບ 1 ໄດ້ຮັບເງິນ 75.000 ໂດລາສະຫະລັດ , ອັນດັບ 2 ໄດ້ຮັບເງິນ 50.000 ໂດລາສະຫະລັດ , ອັນດັບ 3 ໄດ້ຮັບເງິນ 30.000 ໂດລາສະຫະລັດ , ອັນດັບ 4 ໄດ້ຮັບເງິນ 10.000 ໂດລາສະຫະລັດ. ນອກຈາກນັ້ນຍັງມີລາງວັນຜູ້ຫລິ້ນດີເດັ່ນ ໄດ້ຮັບເງິນ 3000 ໂດລາສະຫະລັດ . ທຸກໆນັດແມ່ນຈະມີການຖ່າຍທອດສົດໂດຍຜ່ານທາງຊ່ອງ Foxsports asia, ໂທລະພາບທ້ອງຖິ່ນຂອງແຕ່ລະປະເທດ ແລະ ເຟສບຸກທາງການ ຂອງ Toyota Mekong Club Championship.

    ໂດຍ: Mee Ansenal

    ຮູບຈາກເພສ Fair, ຈາກເພສ Mekong club

    ທີ່ມາ LaosportNews