ຜູ້ໃຊ້ເບີ ”ບີລາຍ” ຕ້ອງຕົກໃຈໄປຕາມໆກັນ! ພາຍຫຼັງລັດຖະບານລາວກຽມເຂົ້າບໍລິຫານເອງໃນໄວໆນີ້

0
8

ການເຊັນສັນຍາ ຊື້-ຂາຍຫຸ້ນ ລະຫວ່າງລັດຖະບານແຫ່ງ ສປປ ລາວ ກັບ ບໍລິສັດວິມເປວຄອມລາວ ຈຳກັດ ໄດ້ມີຂຶ້ນ ໃນວັນທີ 27 ຕຸລາ ຜ່ານມາ ທີ່ໂຮງແຮມຄຣາວພາຊາ ນະຄອນຫລວງວຽງຈັນ ໂດຍທ່ານ ສີລາ ວຽງແກ້ວ ຮອງລັດຖະມົນຕີກະຊວງການເງິນຕາງໜ້າລັດຖະບານ ກັບ ທ່ານ ລິຊາ ເຈມ (RICHARD JAMES) ຜູ້ອຳນວຍການກຸ່ມການເງິນ ບໍລິສັດ ວິມເປວຄອມລາວຈຳກັດ ເຂົ້າຮ່ວມ.

ທ່ານ ພູຂົງ ຈິດຮູບໂລກ ຫົວໜ້າກົມແຜນການ ແລະ ການຮ່ວມມື ກະຊວງໄປສະນີ, ໂທລະຄົມ ມະນາຄົມ ແລະ ການສື່ສານໄດ້ລາຍງານວ່າ: ຂາຫຸ້ນຝ່າຍຕ່າງປະເທດກໍ່ຄືບໍລິສັດ ວິມເປວຄອມ ໂຮນດິ່ງ ລາວບີວີ ໃນກິດຈະການບໍລິສັດ ວິມເປວຄອມລາວ ຈຳກັດ ໄດ້ສະເໜີຂາຍຫຸ້ນທີ່ຕົນເອງຖືຫຸ້ນ 78% ໃຫ້ລັດຖະບານແຫ່ງ ສປປ ລາວ ໃນນາມຄູ່ຮ່ວມທຶນເປັນບູລິມະສິດທຳອິດ 78% ໃນລາຄາການຊື້-ຂາຍຫຸ້ນແມ່ນ 22 ລ້ານໂດລາສະຫະລັດ ແລະ ພາຍໃຕ້ເງື່ອນໄຂບໍລິສັດບໍ່ມີໜີ້ສິນ ແລະ ການຊຳລະແບ່ງອອກເປັນ 02 ງວດຄື: ງວດທຳອິດຊຳລະ 13 ລ້ານໂດລາສະຫະລັດພາຍໃນ 60 ວັນນັບແຕ່ມື້ເຊັນສັນຍາ ແລະ ງວດທີສອງຈຳນວນ 9 ລ້ານໂດລາສະຫະລັດກຳນົດ 120 ວັນ ແລະ ໃນອີກສອງ-ສາມເດືອນຂ້າງໜ້າພາຍຫລັງຊໍາລະເງິນທັງສອງງວດສຳເລັດໃຫ້ແກ່ຜູ້ຂາຍຫຸ້ນກໍ່ຄືບໍລິສັດ ວິມເປວຄອມ ໂຮນດິ່ງ ລາວບີວີ ໃນກິດຈະການບໍລິສັດ ວິມເປວຄອມລາວ ຈຳກັດ ລັດຖະບານກໍ່ຄືກະຊວງການເງິນຈະເຂົ້າໄປບໍລິຫານທັງນີ້, ກໍ່ເພື່ອພັດທະນາການບໍລິການດ້ານໂທລະຄົມມະນາຄົມໃຫ້ແກ່ປະຊາຊົນບັນດາເຜົ່າຢ່າງເຕັມຮູບແບບ.

ມີບໍລິສັດ ວິມເປວຄອມລາວ ຈຳກັດ ທີ່ສ້າງຂຶ້ນກ່ອນໜ້ານີ້ ແລະ ຮູ້ກັນດີໃນນາມຂອງບໍລິສັດມິລິຄອມລາວ (Tigo) ທີ່ໃຫ້ບໍລິການກ່ຽວກັບການສື່ສານໂທລະສັບມືຖື ແລະ ອິນເຕີເນັດໃນ ສປປ ລາວ ໂດຍລັດຖະບານລາວຖືຫຸ້ນ 22% ແລະ ບໍລິສັດວິມເປວຄອມລາວຈຳກັດຖືຫຸ້ນ 78%. ໂດຍແມ່ນນັກລົງທຶນຂອງສະຫະພັນຣັດເຊຍລົງທຶນໃນບໍລິສັດດັ່ງກ່າວເພື່ອມາລົງທຶນໃນລາວ.

ອີງຕາມສະຖິຕິຮອດທ້າຍເດືອນກັນຍາ 2017 ບໍລິສັດເປັນຜູ້ສະໜອງບໍລິການໃຫ້ແກ່ລຸກຄ້າໂທລະສັບມືຖືຫລາຍກວ່າ 260,000 ໝາຍເລກ ແລະ ມີລູກຄ້າທີ່ໃຊ້ອິນເຕີເນັດແບບໃຊ້ສາຍຈຳນວນ 2,200 ຈຸດບໍລິການ.

 

Source: ເສດຖະກິດການຄ້າ