ກະຊວງຍຸຕິທຳ ຊີ້ແຈງ! ການປະຕິບັດຄຳຕັດສິນຂອງສານ ຍັງຄ້າງ 20 ພັນເລື່ອງ

0
18

ໃນຕອນບ່າຍວັນທີ 26 ຕຸລາ 2017 ກະຊວງຍຸຕິທຳ ໄດ້ຂຶ້ນໃຫ້ຄຳຊີ້ແຈງຕໍ່ຂໍ້ສະເໜີ, ຂໍ້ຊັກຖາມ ແລະ ການປະກອບຄຳຄິດເຫັນຂອງບັນດາ ສສຊ ທີ່ໄດ້ປະກອບຄຳຄິດເຫັນໃນກ່ອນໜ້ານີ້.

ໂອກາດດຽວກັນ ທ່ານ ໄຊສີ ສັນຕິວົງ, ລັດຖະມົນຕີ ກະຊວງຍຸຕິທຳ ກໍ່ໄດ້ຂຶ້ນຊີ້ແຈງຕໍ່ຂໍ້ສະເໜີຂອງ ສສຊ ແລະ ຄຳສະເໜີຂອງປະຊາຊົນກ່ຽວກັບການຈັດຕັ້ງປະຕິບັດຄຳຕັດສິນຂອງສານທີ່ຍັງຄ້າງຄາ 20 ພັນ ກວ່າເລື່ອງ ໂດຍໃຫ້ເຫດຜົນວ່າ: ຕໍ່ກັບບັນຫານີ້ ທາງກະຊວງແມ່ນພວມເລັ່ງປະຕິບັດຕາມກົນໄກຮູບການ, ວິທີການ ແລະ ມາດຕະການຂອງຂະບວນການຍຸຕິທຳ; ສຳລັບບັນຫາທີ່ ສສຊ ໄດ້ສະເໜີໃນຄັ້ງນີ້ແມ່ນຈະນຳ ໄປປັບປຸງຂົງເຂດການຈັດຕັ້ງ ແລະ ແບບແຜນວິທີເຮັດວຽກຂອງວຽກງານຍຸຕິທຳ ໃຫ້ມີຄວາມສອດຄ່ອງຕາມລະບຽບກົດໝາຍ ເພື່ອເຮັດໃຫ້ສັງຄົມມີຄວາມສະຫງົບສຸກ ແລະ ມີຄວາມເປັນລະບຽບຮຽບຮ້ອຍ.

ຂະນະທີ່, ທ່ານ ຄຳສານ ສຸວົງ, ຫົວໜ້າອົງການໄອຍະການປະຊາຊົນສູງສຸດ ໄດ້ໃຫ້ຄຳຊີ້ແຈງວ່າ: ມີ 5 ບັນຫາຫຼັກໆທີ່ທາງອົງການປະຊາຊົນສູງສຸດຈະຕ້ອງໄດ້ເອົາໃຈໃສ່ແກ້ໄຂ ເປັນຕົ້ນແມ່ນຄວາມເຂັ້ມແຂງທາງດ້ານການປະຕິບັດໜ້າທີ່ຂອງບຸກຄະລາກອນ, ການຈັດຕັ້ງປະຕິບັດສິດ, ພາລະບົດບາດ, ກົນໄກ, ການປະສານງານໃນການດຳເນີນຍັງບໍ່ທັນກົມກຽວ, ບັນຫາຄ້າຍຄຸມຂັງດັດສ້າງ, ບັນຫາງົບປະມານ.

Source: ເສດຖະກິດການຄ້າ