ສູນຄະນິດຄິດໄວ ກຽມຈັດໂຄງການເພື່ອສັງຄົມ

0
5

ສູນຄະນິດຄິດໄວ ສະມາດແມ໊ດ ເຫັນໄດ້ເຖິງຄວາມສຳຄັນການສຶກສາຂອງເດັກນ້ອຍລາວ ແລະ ຢາກໃຫ້ໄດ້ຮຽນຮູ້ກ່ຽວກັບຫຼັກສູດ ສະມາດແມ໊ດ ເພາະວ່າຫຼັກສູດນີ້ໃຊ້ເພື່ອພັດທະນາສັກກະຍະພາບທາງສະໝອງຂອງຜູ້ຮຽນ ໂດຍການປັບຄວາມສົມດຸນຂອງສະໝອງທັງເບື້ອງຊ້າຍ ແລະ ເບື້ອງຂວາ. ສະນັ້ນ, ທາງສູນຈຶ່ງໄດ້ພ້ອມກັນຈັດຕັ້ງໂຄງການ ສະມາດແມ໊ດ ເພື່ອສັງຄົມ ໂດຍຫວັງວ່າຈະຊ່ວຍເຫຼືອຜູ້ດ້ອຍໂອກາດ.
ທ່ານ ສຸລິໄຊ ຈົງຈິດໄພສານ ຜູ້ອຳນວຍການສູນຄະນິດຄິດໄວ ສະມາດແມ໊ດ ບ້ານໂພນທັນ ໄດ້ໃຫ້ສຳພາດຕໍ່ທີມຂ່າວໜັງສືພິມ ເສດຖະກິດ – ການຄ້າ ວ່າ: ຄອບຄົວ ທ່ານ ນາງ ແສງດາວັນ ສີພັນດອນ ປະທານໃຫຍ່ສູນຄະນິດຄິດໄວ ສະມາດແມ໊ດ ເຫັນໄດ້ເຖິງຄວາມສຳຄັນຂອງເດັກນ້ອຍຈຶ່ງຕັດສິນໃຈສ້າງໂຄງການເພື່ອສັງຄົມຂຶ້ນມາ ເພາະວ່າຢູ່ໃນເມືອງໄດ້ມີໂອກາດຮຽນ ແລະ ປະສົບຜົນສຳເລັດສູງ, ແຕ່ວ່າຢູ່ເຂດຊົນນະບົດຫ່າງໄກສອກຫຼີກໂອກາດທີ່ຈະມາຮຽນແມ່ນຍາກ ແລະ ບໍ່ມີເງິນຮຽນ. ສະນັ້ນ, ພວກເຮົາຈຶ່ງຫາຊ່ອງທາງໃຫ້ເດັກທີ່ດ້ອຍໂອກາດໄດ້ຮຽນ ເພື່ອໃຫ້ເດັກນ້ອຍທີ່ຢູ່ຫ່າງໄກສອກຫຼີກໄດ້ສຶກສາຮຽນຮູ້ຫຼັກສູດ ສະມາດແມ໊ດ ໂດຍການນຳເອົາຫຼັກສູດໄປມອບໃຫ້ກັບໂຮງຮຽນທີ່ທຸກຍາກ ແລະ ຈະສົ່ງຄູຢູ່ສູນ ສະມາດແມ໊ດ ລົງໄປຝຶກໃຫ້ໂດຍບໍ່ເສຍຄ່າ.


ທ່ານ ສຸລະໄຊ ກ່າວຕື່ມວ່າ: ຂັ້ນຕອນຂອງຫຼັກສູດແມ່ນການຖ່າຍຮູບສະພາບແວດລ້ອມໂຮງຮຽນສົ່ງເຂົ້າມາຫາສູນພວກເຮົາ, ປະຫວັດຂອງໂຮງຮຽນ, ຂຽນໃບສະເໜີຂໍຫຼັກສູດ? ເຊິ່ງຖ້າຫາກໂຮງຮຽນໃດທີ່ສົນໃຈຢາກໄດ້ຫຼັກສູດຄະນິດຄິດໄວ ສະມາດແມ໊ດ ໄປຝຶກໃຫ້ເດັກນ້ອຍເປັນນັກຮຽນດີ – ຮຽນເກັ່ງແມ່ນສາມາດຕິດຕໍ່ພົວພັນເຂົ້າມາໄດ້ທີ່ສູນຄະນິດຄິດໄວທັງ 6 ແຫ່ງ ຄື: ສູນໂພນທັນ, ສູນຈອມເພັດ, ສູນໜອງບອນ, ສູນດົງໂດກ, ສູນນາເລົ່າ ( ທົ່ງປົ່ງ ) ແລະ ສູນປາກເຊ, ຖ້າໂຮງຮຽນໃດສົນໃຈກໍ່ສາມາດຕິດຕໍ່ ຫຼື ເຂົ້າມາພົວພັນນຳສູນພວກເຮົາໄດ້ໃນໂມງລັດຖະການ, ແຕ່ວ່າຖ້າໄດ້ຫຼັກສູດໄປແລ້ວແມ່ນບໍ່ໃຫ້ທາງໂຮງຮຽນເກັບເງິນນຳນັກຮຽນເດັດຂາດ.
ທ່ານ ດາວເດືອນ ເຮືອງສະຫວັດ ຜູ້ອຳນວຍການສູນຈອມເພັດ ໃຫ້ຮູ້ວ່າ: ສູນຄະນິດຄິດໄວ ສະມາດແມ໊ດ ໄດ້ຮັບອະນຸຍາດເປີດການຮຽນ – ການສອນຈາກພະແນກສຶກສາທິການ ແລະ ກີລາ ຕັ້ງແຕ່ປີ 2015 ເປັນຕົ້ນມາ ໂດຍທຳອິດເປັນພຽງສູນນ້ອຍໆ, ແຕ່ຍ້ອນຄວາມຮຽກຮ້ອງຕ້ອງການຂອງພໍ່ແມ່ຜູ້ປົກຄອງຊາວນະຄອນຫຼວງ ແລະ ເຫັນໄດ້ເຖິງຄວາມສຳຄັນຂອງຫຼັກສູດ ສະມາດແມ໊ດ ພວກເຮົາຈຶ່ງໄດ້ຂະຫຍາຍສາຂາ ເຊິ່ງມາຮອດປັດຈຸບັນມີ 6 ສາຂາແລ້ວ, ແຕ່ກໍ່ຍັງບໍ່ພຽງພໍ. ສະນັ້ນ, ພວກເຮົາຈະສືບຕໍ່ຂະຫຍາຍສາຂາອອກຕື່ມອີກ ແລະ ຍັງໄດ້ຈັດໂຄງການຊ່ວຍເຫຼືອສັງຄົມຢູ່ເຂດຫ່າງໄກສອກຫຼີກນຳອີກ.

Source: ເສດຖະກິດການຄ້າ