ລົງທຶນໜ້ອຍກໍ່ສາມາດເປັນເຈົ້າຂອງກິດຈະການໄດ້

0
12

“ ໄກ່ງາມຍ້ອນຂົນ ຄົນງາມຍ້ອນແຕ່ງ ” ສຸພາສິດນີ້ຍັງຄົງໃຊ້ໄດ້ທຸກຍຸກທຸກສະໄໝ, ເມື່ອເວລາຜ່ານໄປ ວິວັດທະນາການດ້ານຄວາມງາມກໍ່ເພີ່ມຂຶ້ນເລື້ອຍໆ ເຊິ່ງທຸລະກິດເສີມ ຄວາມງາມນີ້ຕ່າງກໍ່ເກີດຂຶ້ນ ແລະ ນິຍົມກັນຢ່າງຫຼວງຫຼາຍ ເພາະມັນສາມາດຕອບໂຈດຄວາມປາຖະໜາຂອງຄົນຢູ່ໃນສັງຄົມທີ່ຕ້ອງການປ່ຽນແປງຕົນເອງໃຫ້ມີບຸກຄະລິກກະພາບທີ່ດີ, ໃຫ້ມີຄວາມໂດດເດັ່ນ ໂດຍທຸລະກິດດັ່ງກ່າວນີ້ສາມາດສ້າງກຳໄລໃຫ້ແກ່ຜູ້ປະກອບການເປັນຢ່າງດີ ບໍ່ວ່າຈະເຮັດເປັນອາຊີບເສີມ ຫຼື ອາຊີບຫຼັກ.
ນາງ ແວ່ນແກ້ວ ຜູ້ປະກອບອາຊີບເສີມຄວາມງາມ ໄດ້ໃຫ້ສຳພາດຕໍ່ນັກຂ່າວໜັງສືພິມ ເສດຖະກິດ – ການຄ້າ ວ່າ: ກ່ອນຈະມາເປັນຊ່າງເສີມຄວາມງາມຄືປັດຈຸບັນນີ້, ແຕ່ກ່ອນຕົນເອງເປັນພະນັກງານຕັດຫຍິບຂອງໂຮງງານແຫ່ງໜຶ່ງໃນນະຄອນຫຼວງວຽງຈັນ ເຊິ່ງເມື່ອອາຊີບຕັດຫຍິບບໍ່ສາມາດຕອບສະໜອງລາຍຈ່າຍຂອງຄອບຄົວໄດ້ ຂ້າພະເຈົ້າຈຶ່ງຕັດສິນໃຈອອກຈາກອາຊີບຕັດຫຍິບແລ້ວໄປຮຽນອາຊີບເສີມຄວາມງາມ ໂດຍໃຊ້ເວລາພຽງ 4 ເດືອນກໍ່ຈົບຫຼັກສູດພື້ນຖານ. ຫຼັງຈາກນັ້ນ, ກໍ່ມາປະກອບອາຊີບທີ່ຕົນໄດ້ຮຽນມາ ແລະ ປັດຈຸບັນນີ້ກໍ່ເປັນປີທີ 3 ແລ້ວທີ່ເຮັດອາຊີບເສີມຄວາມງາມ.
ນາງ ແວ່ນແກ້ວ ໄດ້ເວົ້າວ່າ: ໃນເບື້ອງຕົ້ນຂອງການເຮັດອາຊີບນີ້ຕົນເອງໄດ້ຊື້ກິດຈະການຕໍ່ນຳພີ່ນ້ອງໃນລາຄາຕໍ່າ ເຊິ່ງສາມາດສ້າງລາຍຮັບໃຫ້ຂ້າພະເຈົ້າໄດ້ຢ່າງໜ້າເພິ່ງພໍໃຈ ສະເລ່ຍລາຍຮັບໄດ້ປະມານ 7 – 8 ລ້ານກີບຕໍ່ເດືອນ. ທັງນີ້, ກໍ່ຍ້ອນວ່າໃນເມື່ອກ່ອນເສັ້ນທາງດອນກອຍ ຍັງບໍ່ທັນມີຮ້ານເສີມຄວາມງາມເກີດຂຶ້ນຫຼາຍ ເຊິ່ງມັນເປັນໂອກາດ ແລະ ຊ່ອງທາງທີ່ດີໃນການຫາລາຍໄດ້ຈາກອາຊີບດັ່ງກ່າວ.


ໃນໄລຍະອອກພັນສາແມ່ນຈະມີລູກຄ້າເຂົ້າມາໃຊ້ບໍລິການຢ່າງຫຼວງຫຼາຍ ບໍ່ວ່າຈະເປັນການຕັດຜົມຍິງ – ຊາຍ, ສະຜົມ, ແຕ່ງໜ້າ ແລະ ອື່ນໆ ສະເລ່ຍລາຍໄດ້ຫຼາຍແສນກີບຕໍ່ມື້ ເຊິ່ງມັນເປັນການສ້າງລາຍຮັບໃຫ້ເສດຖະກິດຂອງຄອບຄົວຂອງຂ້າພະເຈົ້າໄດ້ເປັນຢ່າງດີ.
ເຖິງຈະມີລາຍໄດ້ດີ, ແຕ່ການເຮັດທຸລະກິດດັ່ງກ່າວກໍ່ມີຂໍ້ຫຍຸ້ງຍາກຫຼາຍຢ່າງ ເປັນຕົ້ນແມ່ນປັດຈຸບັນເສັ້ນທາງດອນກອຍ ຈະສັງເກດເຫັນວ່າມີຮ້ານເສີມຄວາມງາມເກີດຂຶ້ນຢ່າງຫຼວງຫຼາຍ ແລະ ເກີດມີການແຂ່ງຂັນກັນທາງດ້ານການຕະຫຼາດ, ການບໍລິການ ແລະ ອື່ນໆ ເຊິ່ງມັນເປັນສິ່ງທ້າທາຍອີກຢ່າງໜຶ່ງທີ່ເຮັດໃຫ້ບັນດາຜູ້ປະກອບອາຊີບນີ້ຕ້ອງໄດ້ປະເຊີນ ແລະ ຮັບມືກັບມັນໃຫ້ໄດ້. ນອກນັ້ນ, ກໍ່ຍັງມີສິ່ງທ້າທາຍອີກຢ່າງໜຶ່ງ ເຊິ່ງຂ້າພະເຈົ້າກໍ່ເຊື່ອວ່າຫຼາຍໆທ່ານທີ່ກຳລັງປະກອບອາຊີບນີ້ກໍ່ຄົງຈະປະເຊີນເຊັ່ນກັນ ນັ້ນກໍ່ຄືໃນລະດູຝົນແມ່ນມີລູກຄ້າເຂົ້າມາໃຊ້ບໍລິການໜ້ອຍ ຫຼື ບາງມື້ກໍ່ບໍ່ມີເລີຍ ເຊິ່ງເຮັດໃຫ້ຜູ້ປະກອບການຂາດລາຍຮັບຫຼາຍໃນໄລຍະນີ້.
“ ເຖິງແມ່ນວ່າມັນຈະມີອຸປະສັກ ຫຼື ມີສິ່ງທ້າທາຍຫຼາຍຢ່າງ, ຂ້າພະເຈົ້າກໍ່ຍັງຄິດວ່າການປະກອບອາຊີບນີ້ແມ່ນໃຫ້ສິ່ງທີ່ດີຫຼາຍຢ່າງ, ວຽກງານການບໍລິການສະເພາະແມ່ນຮ້ານເສີມຄວາມງາມ ສິ່ງສຳຄັນຜູ້ປະກອບການຈະຕ້ອງຮູ້ ແລະ ເຂົ້າໃຈການຕ້ອນຮັບທີ່ດີ, ການບໍລິການລູກຄ້າຕ້ອງດີ ແລະ ເປັນມິດ, ການທັກທາຍ ຫຼື ການໂອ້ລົມສົນທະນາຕ່າງໆຕ້ອງມີສິລະປະເພື່ອດຶງດູດລູກຄ້າ ເຊິ່ງຈະເຮັດໃຫ້ເຂົາເຈົ້າເຊື່ອໝັ້ນ ແລະ ກັບມາໃຊ້ບໍລິການຂອງເຮົາອີກ” ນາງແວ່ນແກ້ວ ກ່າວ.

 

Source: ເສດຖະກິດການຄ້າ