ຂາຍເຄື່ອງກໍ່ສ້າງ ແລະ ເຄື່ອງໃຊ້ໄຟຟ້າທົ່ວໄປ ສ້າງລາຍໄດ້ສູ່ຄອບຄົວ

0
15

ຖ້າເວົ້າເຖິງການຄ້າຂາຍກໍ່ແມ່ນອີກຂະແໜງການໜຶ່ງທີ່ສາມາດສ້າງລາຍຮັບໄດ້ເປັນຢ່າງດີແກ່ຜູ້ປະກອບການໃນທຸລະກິດດັ່ງກ່າວ ແລະ ຢູ່ໃນສັງຄົມບ້ານເຮົາປັດຈຸບັນກໍ່ຖືໄດ້ວ່າເປັນທຸລະກິດທີ່ເຕີບໂຕຢ່າງກວ້າງ ຂວາງຄຽງຄູ່ກັບຂະແໜງການອື່ນໆ ເຊິ່ງອາຊີບນີ້ສາມາດສ້າງລາຍຮັບໃຫ້ແກ່ຜູ້ປະກອບການເຊັ່ນກັນ.
ມື້ນີ້ຄໍລຳ ອາຊີບ – ວຽກງານ ຈະພາທ່ານຜູ້ອ່ານມາຮູ້ຈັກກັບອາຊີບຄ້າຂາຍທີ່ໄດ້ຮັບຄວາມນິຍົມໃນປັດຈຸບັນ ນັ້ນກໍ່ຄືການຂາຍເຄື່ອງກໍ່ສ້າງ ແລະ ເຄື່ອງໃຊ້ໄຟຟ້າທົ່ວໄປ ທີ່ສາມາດສ້າງເສດຖະກິດຄອບຄົວໃຫ້ດີຂຶ້ນ ບໍ່ສະເພາະແຕ່ທຸລະກິດຂະໜາດໃຫຍ່ເທົ່ານັ້ນ, ແຕ່ຍັງມີທຸລະກິດຂະໜາດນ້ອຍທີ່ເປັນທຸລະກິດຂອງຄອບຄົວ ເຊິ່ງສາມາດສ້າງລາຍຮັບໄດ້ເປັນຢ່າງດີເຊັ່ນກັນ ໂດຍໃນປັດຈຸບັນອາຊີບດັ່ງກ່າວແມ່ນກຳລັງໄປໄດ້ດີ ແລະ ຕອບສະໜອງຕາມຄວາມຕ້ອງການຂອງສັງຄົມໄດ້.

ທ່ານ ບຸນລື ສີລາເພັດ

ຈາກການສຳພາດ ທ່ານ ບຸນລື ສີລາເພັດ ຜູ້ບໍລິຫານຮ້ານທອງແກ້ວ ຂາຍເຄື່ອງກໍ່ສ້າງ ແລະ ເຄື່ອງໃຊ້ໄຟຟ້າທົ່ວໄປ ໃຫ້ຮູ້ວ່າ: ແຕ່ກ່ອນຂ້າພະເຈົ້າເປັນພະນັກງານວິສະວະກອນໄຟຟ້າ ປະຈຳຢູ່ເຂື່ອນນໍ້າເທີນ – ຫີນບູນ ຫຼາຍກວ່າ 10 ປີ ເຊິ່ງຫຼັງຈາກໄດ້ມາເຫັນເສດຖະກິດໃນຕົວເມືອງນະຄອນຫຼວງວຽງຈັນ ກໍ່ສັງເກດເຫັນວ່າທຸລະກິດໃນຂະແໜງການດັ່ງກ່າວນີ້ຍັງເປັນທີ່ຕ້ອງການຂອງຕະຫຼາດ ແລະ ຍັງເປີດຊ່ອງວ່າງຫຼາຍໃຫ້ແກ່ຜູ້ປະກອບການ ເຊິ່ງຂ້າພະເຈົ້າກໍ່ແມ່ນຄົນໜຶ່ງທີ່ມັກຮັກໃນອາຊີບນີ້ ແລະ ມີຄວາມສົນໃຈຢາກເຮັດທຸລະກິດການຈຳໜ່າຍຢູ່ແລ້ວ ໂດຍເມື່ອເຫັນໄດ້ເຖິງໂອກາດ ແລະ ຄວາມເປັນໄປໄດ້ສູງໃນການເຮັດທຸລະກິດປະເພດນີ້ ຂ້າພະເຈົ້າຈຶ່ງໄດ້ຕັດສິນໃຈເຂົ້າມາດຳເນີນທຸລະກິດ ແລະ ປັດຈຸບັນສັງເກດເຫັນວ່າການຂາຍເຄື່ອງກໍ່ສ້າງກໍ່ກຳລັງໄປໄດ້ດີ.


ຈາກການດຳເນີນທຸລະກິດນີ້ມາບໍ່ພໍເທົ່າໃດເດືອນກໍ່ສັງເກດເຫັນວ່າຜົນຕອບຮັບຈາກລູກຄ້າທີ່ເຂົ້າມາໃຊ້ບໍລິການແມ່ນໜ້າພໍໃຈຫຼາຍ ແລະ ໄດ້ຕາມເປົ້າໝາຍທີ່ວາງໄວ້ ເຊິ່ງສະເລ່ຍຍອດຂາຍແມ່ນຢູ່ທີ່ປະມານ 10 – 15% ນັບວ່າເປັນຕົວເລກທີ່ໜ້າເພິ່ງພໍໃຈສຳລັບການຫັນປ່ຽນມາເຮັດທຸລະກິດທາງດ້ານການຄ້າຂາຍ.
ທ່ານກ່າວຕື່ມວ່າ: ການປະກອບອາຊີບນີ້ແມ່ນໄດ້ບົດຮຽນ ແລະ ປະສົບການໃໝ່ໆຫຼາຍຢ່າງສຳລັບຂ້າພະເຈົ້າໃນການດຳເນີນທຸລະກິດຂັ້ນຕໍ່ໄປ ເພາະການປະກອບອາຊີບໃດໜຶ່ງຖ້າຫາກຜູ້ປະກອບການມີໃຈຮັກມັກກໍ່ຈະເຮັດໃຫ້ການດຳເນີນທຸລະກິດ ຫຼື ການປະກອບອາຊີບນັ້ນປະສົບຜົນສຳເລັດໄດ້ຕາມເປົ້າໝາຍທີ່ວາງໄວ້.

 

Source: ເສດຖະກິດການຄ້າ