ປະທານປະເທດ ເຄື່ອນໄຫວຢ້ຽມຢາມຊີ້ນຳວຽກງານ ຢູ່ແຂວງບໍລິຄຳໄຊ

ໃນວັນທີ 16 ມິຖຸນາ 2017 ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ ພ້ອມດ້ວຍຄະນະ ​ໄດ້​ລົງ​ເຄື່ອນ​ໄຫວ​ຢ້ຽມຢາມ ​ແລະ ຊີ້ນຳວຽກງານ ຢູ່ແຂວງບໍລິຄຳໄຊ ​ໂດຍ​ໄດ້​ຮັບ​ການ​ຕ້ອນຮັບ​ຢ່າງ​ອົບ​ອຸ່ນ​ ຈາກ ທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ພ້ອມດ້ວຍ ຄະນະ.

ໃນການມາຢ້ຽມຢາມແຂວງບໍລິຄຳໄຊ ໃນຄັ້ງນີ້, ທ່ານ ບຸນຍັງ ວໍລະຈິດ ໄດ້ໃຫ້ກຽດພົບປະ ການນຳຫລັກແຫລ່ງຂອງແຂວງ, ໄດ້ຮັບຟັງການລາຍງານຫຍໍ້ ກ່ຽວກັບສະພາບການພັດທະນາເສດ ຖະກິດ-ສັງຄົມ ຂອງແຂວງ ຈາກເຈົ້າແຂວງບໍລິຄຳໄຊ, ໂດຍທ່ານ ໄດ້ຍົກໃຫ້ເຫັນສະພາບການຈັດຕັ້ງປະຕິບັດຊີ້ນຳ-ນຳພາ ໂດຍສະເພາະການເຜີຍແຜ່ ແລະ ປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກ, ມະຕິ VI ຂອງອົງຄະພັກແຂວງບໍລິຄຳໄຊ ກໍຄື ແຜນພັດທະນາເສດຖະກິດ-ສັງຄົມ ແຫ່ງຊາດ ຄັ້ງທີ 8, ແຜນພັດທະນາເສດຖະກິດ-ສັງຄົມຂອງແຂວງ ຄັ້ງທີ 4 ເຫັນວ່າ ມີຜົນສຳເລັດຫລາຍດ້ານ ​ເຊັ່ນ: ດ້ານສຶກສາ, ສາທາລະນະສຸກ ໄດ້ຮັບການປັບປຸງດ້ານປະລິມານ ແລະ ຄຸນນະພາບດີຂຶ້ນ, ຄຽງຄູ່ກັບການເຕີບໃຫຍ່ຂະຫຍາຍຕົວ ທາງດ້ານເສດຖະກິດ-ສັງຄົມ, ເສດຖະກິດຂະຫຍາຍຕົວຢູ່ໃນລະດັບ 8%, ລາຍຮັບສະເລ່ຍໃສ່ຫົວຄົນໄດ້ 1.981 ໂດລາສະຫະລັດ. ພ້ອມກັນນັ້ນ, ແຂວງໄດ້ຖືເອົາວຽກງານປ້ອງກັນຊາດ, ປ້ອງກັນຄວາມສະຫງົບເປັນສຳຄັນ ເຮັດໃຫ້ມີ ສະຖຽນລະພາບທາງດ້ານການເມືອງ ແລະ ສັງຄົມສະຫງົບປອດໄພ, ຫັນລົງກໍ່ສ້າງຮາກຖານການເມືອງ ຕິດພັນກັບວຽກງານ 3 ສ້າງ ເພື່ອປັບປຸງຊີວິດການເປັນຢູ່ ຂອງພໍ່ແມ່ປະຊາຊົນ ບັນດາເຜົ່ານັບມື້ນັບດີຂຶ້ນ ເຮັດໃຫ້ຄວາມທຸກຍາກ ນັບມື້ນັບຫລຸດລົງເທື່ອລະກ້າວໆ.

​​ໃນໂອກາດ​ນີ້, ທ່ານ ບຸນຍັງ ວໍລະຈິດ ໄດ້ຕີລາຄາສູງ ແລະ ຍ້ອງຍໍຊົມເຊີຍ ອົງຄະນະພັກທຸກຂັ້ນ ທີ່ສຸມທຸກກຳລັງຄວາມສາມາດ ຈຶ່ງຍາດມາໄດ້ຜົນສຳເລັດດັ່ງກ່າວ ແລະ ເພື່ອສືບຕໍ່ ພາລະກິດ ຄາດໝາຍສູ້ຊົນ ໃນຕໍ່ໜ້າ. ທ່ານ ຍັງໄດ້ເນັ້ນໃຫ້ອົງຄະນະ​ພັກ ແຂວງບໍລິຄຳໄຊ ຈົ່ງແກ້ໄຂປະກົດການຫຍໍ້ທໍ້ ແລະ ຂໍ້ຂັດແຍ່ງທາງດ້ານສັງຄົມ ໃຫ້ໄດ້ຢ່າງຂາດຕົວ ໃນນັ້ນໃຫ້ເລັ່ງແກ້ໄຂບັນຫາ ການຈັບຈອງທີ່ດິນທີ່ບໍ່ຖືກຕ້ອງ ທີ່ອາດກໍ່ໃຫ້ເກີດບັນຫາຂໍ້ຂັດແຍ່ງໃນອະນາຄົດ, ການພັດທະນາ ຕ້ອງໃຫ້ສົມຄູ່ກັນລະຫວ່າງຕົວເມືອງ ແລະ ຊົນນະບົດ ເພື່ອເຮັດໃຫ້ເກີດມີຄວາມເທົ່າທຽມກັນ, ຍົກສູງການບຳລຸງສ້າງ ພະນັກງານ ໃຫ້ໄດ້ຄຸນນະພາບ ແລ້ວຫັນລົງກໍ່ສ້າງຮາກຖານ ເພື່ອຊ່ວຍ ໃນການພັດທະນາຂັ້ນພື້ນຖານ ໃຫ້ມີປະສິດ ທິພາບສູງຂຶ້ນ, ປກສ ແລະ ປກຊ ຕ້ອງເລັ່ງແກ້ໄຂບັນຫາຢາເສບຕິດ ທີ່ກຳລັງລະບາດ ເພື່ອຫລຸດຜ່ອນບັນດາປະກົດການຫຍໍ້ທໍ້ຕ່າງໆ ທີ່ເກີດຂຶ້ນໃນສັງຄົມປະຈຸບັນ.

ສິ່ງ​ສຳຄັນ​ໃຫ້ກວດກາ-ຕິດຕາມ ແລະ ຄຸ້ມຄອງ ບັນດາການລົງທຶນດ້ານຕ່າງໆ ໃຫ້ຮັບປະກັນ ທັນກັບເວລາທີ່ກຳນົດໄວ້ ແລະ ມີຄຸນນະພາບ ເພື່ອປ້ອງກັນຄວາມເສຍຫາຍດ້ານງົບປະມານຂອງລັດ, ພ້ອມ​ນັ້ນ, ໃຫ້ຄະນະພັກ, ອຳນາດການ ປົກຄອງທຸກຂັ້ນ ຈົ່ງປະຕິບັດຫລັກການ, ການນຳພາແບບລວມສູນປະຊາທິປະໄຕ, ຍົກສູງຄວາມສາມັກຄີພາຍໃນ​ໃຫ້ແໜ້ນແຟ້ນ, ສືບຕໍ່ຜັນຂະຫຍາຍມະຕິ, ຄຳສັ່ງ ຕ່າງໆ ຂອງພັກ-ລັດ ໃຫ້ທົ່ວເຖິງ ເພື່ອເຮັດໃຫ້ພໍ່ແມ່ປະຊາຊົນ ບັນດາເຜົ່າຮັບຮູ້ ແລະ ເຂົ້າໃຈຢ່າງ ເລິກເຊິ່ງ.

ເນື່ອງໃນໂອກາດ ທີ່ທ່ານມາເຄື່ອນໄຫວຊີ້ນໍາວຽກງານໃນຄັ້ງນີ້, ທ່ານ ບຸນຍັງ ວໍລະຈິດ ຍັງໄດ້ນໍາເອົາຄອມພິວເຕີໂນດບຸກ ຈຳນວນ 10 ເຄື່ອງ ມອບໃຫ້ຫ້ອງວ່າການປົກຄອງແຂວງບໍລິຄຳໄຊ ແລະ ຮ່ວມປູກຕົ້ນໄມ້ ຢູ່ອະນຸສາວະລີ ທ່ານ ສີສົມພອນ ລໍວັນໄຊ ນຳ​ອີກ.

[xyz-ihs snippet=”hosting4lao”]

ເນື້ອໃນ: ຂປລ

Related News

Comments are closed

[bsa_pro_ad_space id=8]