ເອດີບີ ໃຫ້ທຶນປັບປຸງພື້ນຖານໂຄງລ່າງ 4 ແຂວງພາກເໜືອ ຂອງລາວ

ທະນາຄານ​ພັດທະນາ​ອາຊີ (ADB)​ ໃຫ້​ທຶນ​ຊ່ວຍ​ເຫລືອ​ລ້າ​ ມູນ​ຄ່າ 36,5 ລ້ານ​ໂດ​ລາ​ສະຫະລັດ. ​ປັບປຸງ​ພື້ນຖານ​ໂຄງ​ລ່າງ​ເຂດ​ຊົນນະບົດ ​ແລະ ກະ​ສີ​ກໍາ​ຊຸມ​ຊົນ​ຢູ່ 4 ​ແຂວງ​ພາກ​ເໜືອ ຄື: ແຂວງ​ ບໍ່​ແກ້ວ, ຫລວງ​ນໍ້າ​ທາ, ອຸດົມ​ໄຊ ​ແລະ ​ແຂວງຜົ້ງ​ສາລີ.

ພິທີ​​ເຊັນມອບ​ຮັບດັ່ງກ່າວ,​ ໄດ້​ຈັດ​ຂຶ້ນ​ໃນ​ວັນ​ທີ 16 ມິຖຸນາ 2017 ​ທີ່​ນະຄອນຫລວງ​ວຽງ​ຈັນ. ຕາງໜ້າ​ລັດຖະບານ​​ແຫ່ງ ສປປ ລາວ​ ​ໂດຍທ່່ານ ນາງ ທິບ​ພະ​ກອນ ຈັນທະ​ວົງສາ ຮອງ​ລັດຖະມົນຕີ​ກະຊວງ​ການ​ເງິນ ​ແລະ ທ່ານ​ ຢາ​ສຸ​ຊິ ​ເນ​ກະຊິ ຜູ້ຕາງໜ້າ​ສໍານັກງານ​ ທະນາຄານ​ພັດທະນາ​ອາຊີ ປະ​ຈໍາ ສປປ ລາວ, ມີ​ບັນດາ​ພາກສ່ວນ​ທີ່​ກ່ຽວຂ້ອງ ​ເຂົ້າຮ່ວມ​ເປັນ​ສັກ​ຄີ​ພິຍານ.

ທ່ານຮອງ​ລັດຖະມົນຕີ​ ກະຊວງ​ການ​ເງິນ ​ກ່າວ​ວ່າ: ປັດຈຸບັນ ລັດຖະບານ ພວມ​ສຸມ​​ໃສ່​ປັບປຸງ​ໂຄງ​ລ່າງ​ພື້ນຖານ​ກະ​ສີ​ກໍາ ​ໃຫ້​ສາມາດ​ຜະລິດ​ກະ​ສີ​ກໍາ​ເປັນ​ສິນຄ້າ ​ເພື່ອ​ສ້າງ​ລາຍ​ຮັບ​ໃຫ້​ສູງ ​ແລະ ຍົກ​ລະດັບ​ຊີ​ວິດ​ການ​ເປັນ​ຢູ່ ​ຂອງ​ປະຊາຊົນ​ລາວ​ໃຫ້​ດີ​ຂຶ້ນ. ​ໃນ​ນັ້ນ ວຽກ​ບູລິ​ມະ​ສິດ​ຂະ​ແໜງ​ກະ​ສີ​ກໍາ ຕ້ອງ​ຮັບປະກັນ​ດ້ານ​ອາຫານ ​ແລະ ​ໂພ​ຊະນາ​ການ ​ໃຫ້​ມີ​ຄວາມ​ປອດ​ໄພ. ພ້ອມ​ທັງ​ຫລຸດ​ອັດຕາ​ການ​ຂາດ​ແຄນ​ທາງ​ດ້ານ​ໂພ​ຊະນາ​ການ ​ຂອງ​ປະຊາຊົນ​ຜູ້​ດ້ອຍ​ໂອກາດ ​ໂດຍ​ສະ​ເພາະ​ແມ່ຍິງ ​ແລະ ​ເດັກນ້ອຍ.

​ໃນ​ປີ 2010 ຜ່ານ​ມາ​ໂຄງການ​ດັ່ງກ່າວ, ​ໄດ້​ຖືກ​ປະຕິບັດ​ຢູ່ 4 ​ແຂວງ ​ໂດຍ​​ໄດ້​ຮັບ​ທຶນຈາກ ADB ​ໃນ​ມູນ​ຄ່າ 23 ລ້ານ​ໂດ​ລາ​ສະຫະລັດ. ມາ​ຮອດ​ປັດຈຸບັນ​ ແມ່ນຈັດ​ຕັ້ງ​ປະຕິບັດ​​ສໍາ​ເລັດ 99.89% ​​ໃນ​ການ​ກໍ່ສ້າງ ​ແລະ ຍົກ​ລະດັບ​ເສັ້ນທາງ​ຊົນນະບົດ 4 ​ເສັ້ນ, ຍາວ 29 ກິ​ໂລ​ແມັດ; ຟື້ນ​ຟູ​ຊົນລະປະທານ 26 ​ແຫ່ງ​ ຢູ່​ແຂວງ ​ຜົ້ງ​ສາລີ, ສາມາດ​ສະໜອງ​ນໍ້າ​ໄດ້ 5,386 ​ເຮັກຕາ; ສ້າງ​ຕັ້ງ​ກຸ່ມ​ຊົມ​ໃຊ້​ນໍ້າ ​ແລະ ກຸ່ມ​ຜູ້​ບົວ​ລະ​ບັດ​ຮັກສາ​ເສັ້ນທາ​ງ​ໄດ້ 48 ກຸ່ມ ​ແລະ ສ້ອງ​​ແປງ​ຄືນ 24 ​ໂຄງການ​ຍ່ອຍ ​ທີ່​ຖືກ​ໄພ​ທໍາ​ມະ​ຊາດ.

ສະຫນັບສະຫນູນໂດຍ: www.hosting4lao.com ຮັບຝາກເວັບໄຊທ໌ ອອກແບບເວັບໄຊທ໌ ລາວເວັບໂຮສ໌ຕິ້ງ

ຂ່າວ: ຂັນ​ໄຊ, ພາບ: ອ່າຍຄໍາ

ເນື້ອໃນ: ຂປລ

Related News

Comments are closed