ແຂວງອຸດົມໄຊ ມີປະຊາຊົນລັກລອບປູກຝິ່ນ 19 ບ້ານ ລວມ​ເນື້ອ​ທີ່ 279,27 ​ເຮັກຕາ  

0
28

​ຄະນະ​ກໍາມະການ​ແຫ່ງ​ຊາດ​ເພື່ອ​ກວດກາ ​ແລະ ຄວບ​ຄຸມ​ຢາ​ເສບ​ຕິດ​ຂັ້ນ​ແຂວງ ແລະ  ປກສ ​ແຂວງ​ອຸດົມ​ໄຊ ໄດ້ສະຫຼຸບການຈັດ​ຕັ້ງ​ປະຕິບັດປາບປາມຢາເສບຕິດຂຶ້ນໃນໂອກາດສະ​ເຫຼີ​ມສະຫຼອງ​ວັນ​ຕ້ານ​ຢາ​ເສບ​ຕິດ​ແຫ່ງ​ຊາດຂຶ້ນເມື່ອບໍ່ດົນມານີ້.

ເຊິ່ງໃນຕະຫຼອດ​ 1 ປີຜ່ານມາ ທາງ​ຄະນະພັກ​ກອງ​ບັນຊາ​ການ ປກສ ​ແຂ​ວງອຸດົມ​ໄຊ ກໍ່​ຄື ພະ​ແນ​ກກວດກາ ​ແລະ ຄວບ​ຄຸມ​ຢາ​ເສບ​ຕິດ ​ໄດ້ສົມທົບ​ກັບ​ກອງ​ບັນຊາ​ການ ປກສ ​ເມືອງ ​ແລະ ບ້ານ​ລົງ​ກວດກາ​ຕິດຕາມ​ການ​ລັກລອບ​ປູກ​ຝິ່ນ​ຂອງ​ປະຊາຊົນ​ຢູ່​ບ້ານ​ເປົ້າ​ໝາຍ​ໄດ້​ທັງ​ໝົດ 19 ບ້ານ​ມີ​ເນື້ອ​ທີ່​ປູກ​ຝິ່ນ 279,27 ​ເຮັກຕາ ​ແລະ ​ໄດ້​ລະດົມ​ພາກສ່ວນ​ທີ່​ກ່ຽວຂ້ອງ​ທຳລາຍ​ຖິ້ມ​ຈຳນວນ​ໜຶ່ງ​ພ້ອມ​ທັງ​ນຳ​ເອົາ​ຜູ້​ທີ່​ລະ​ເມີດ​ມາ​ດຳ​ເນີນ​ຄະດີ​ຕາມ​ລະບຽບ​ກົດໝາຍ.

ນອກນັ້ນ, ຍັງໄດ້​ຮັບ​ຕົວຢ່າງ​ຢາ​ເສບ​ຕິດ​ທີ່​ເຈົ້າ​ໜ້າ​ທີ່​ຕຳຫຼວດ​ຍຶດ​ໄດ້​ຢູ່​ບັນດາ​ແຂວງ​ພາກ​ເໜືອ​ມາ​ວິ​ໄຈ​ຊອກ​ຫາ​ຄວາມ​ເຂັ້ມ​ຂຸ້ນ​ຂອງ​ຢາ​ເສບ​ຕິດ​ໄດ້​ທັງ​ໝົດ 405 ຕົວຢ່າງ​ຄື:​ ເຮ​ໂລ​ອິນ 30 ຕົວຢ່າງ, ຢາ​ບ້າ 335 ຕົວຢ່າງ, ຢາ​ໄອ້ 7 ຕົວຢ່າງ, ຢາຝິ່ນ 12 ຕົວຢ່າງ, ຝຸ່ນ​ປະ​ເພດ​ຕາວ 21 ຕົວຢ່າງ.

ຄຽງຄູ່ກັນນັ້ນ, ໄດ້​ສົມທົບ​ກັບ​ກອງ​ບັນຊາ​ການ ປກສ ຂັ້ນ​ເມືອງ 7 ​ເມືອງ ​ແລະ ພາກສ່ວນ​ທີ່​ກ່ຽວ ຂ້ອງລົງ​ເກັບ​ກຳ​ຂໍ້​ມູນ​ຜູ້​ຕິດຢາ​ເສບ​ຕິດ​ຢູ່​ບັນດາ​ເມືອງ ​ແລະ ອ້ອມ​ຂ້າງ​ແຂວງ​ ສາມາດສະຫຼຸບ ​ແລະ ​ແຍກ​ເປັນ​ປະ​ເພດ​ໄດ້​ດັ່ງ​ນີ້: ຈຳນວນ​ຜູ້​ຕິດ​ຢາ​ເສບ​ຕິດ​ທົ່ວ​​ແຂວງ​ລວມມີ 2,590 ຄົນ, ຍິງ 102 ຄົນ, ​ໃນ​ນີ້ ຜູ້​ຕິດຢາຝິ່ນ 385 ຄົນ, ຍິງ 51 ຄົນ, ຕິດຢາ​ບ້າ 2,050 ຄົນ, ຍິງ 48 ຄົນ, ​ເຮ​ໂລ​ອິນ 152 ຄົນ, ຍິງ 3 ຄົນ.

ໃນ​ໜຶ່ງ​ປີຜ່ານມາ ​ສານ​ປະຊາຊົນ​ແຂວງ​ໄດ້​ນຳ​ເອົາ​ຄະດີ​ຢາ​ເສບ​ຕິດ​ມາ​ຕັດສິນໄດ້​ທັງ​ໝົດ 37 ​ເລື່ອງ, ນັກ​ໂທດ 41 ຄົນ, ຍິງ 11 ຄົນ ​ແລະ ຢາ​ເສບ​ຕິດ​ທີ່​ຖຶກສານ​ຕັດສິນ​ແລ້ວ​ເພື່ອ​ນຳ​ໄປ​ຈູດ​ທຳລາຍ​ລາຍຖິ້ມ​ມີ​ເຮ​ໂລ​ອິນ​ນ້ຳໜັກ 92,3 ກຣາມ​ແລະ ຢາ​ບ້າ​ຈຳນວນ 66,464,000 ​ເມັດ, ນ້ຳ​ໜັກ 7,619 ກິ​ໂລກຣາມ.

 

 

Source: ເສດຖະກິດການຄ້າ