ລັດຖະບານຊຸດໃຫມ່ຢືນຢັນວ່າ ຕະຫລອດວາລະທີ່ປະຕິບັດຫນ້າທີ່ຈະຕໍ່ຍອດເສດຖະກິດມະຫາພາກໃຫ້ ເຕີບໂຕ 8% ຕໍ່ປີຂຶ້ນໄປເພີ່ມຂຶ້ນຈາກຊຸດກ່ອນ 0,5% ເຖິງແມ່ນວ່າຈະພົບຫລາຍບັນຫາກໍ່ຕາມ ພ້ອມໃຫ້ລາຍຮັບປະຊາຊົນສະເລ່ຍໃສ່ຫົວຄົນບັນລຸ 1.700 ໂດລາສະຫະລັດ.
ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີເຊິ່ງຕາງຫນ້າໃຫ້ລັດຖະບານຊຸດໃຫມ່ໄດ້ລາຍງານ ຮ່າງແຜນພັດທະນາເສດຖະກິດ- ສັງຄົມແຫ່ງຊາດ 5 ປີ (2011-2012) ເຊິ່ງເປັນແຜນສືບຕໍ່ບຸກທະລຸທີ່ຈະເຮັດໃຫ້ລາວ ເຮົາບັນລຸເປົ້າຫມາຍສະຫັດສະວັດດ້ານການພັດທະນາຕາມ ກຳນົດຫມາຍຕໍ່ກອງປະຊຸມຄັ້ງປະຖົມມະລືກຂອງສະພາແຫ່ງຊາດຊຸດທີ VII ໃນວັນທີ 15 ມິຖຸນານີ້ວ່າ: ໃນວາລະຂອງຄະນະລັດຖະບານຊຸດນີ້ຮອດປີ 2015 ຈະສູ້ຊົນເຮັດໃຫ້ອັດຕາການເຕີບໂຕຂອງເສດຖະກິດຂະຫຍາຍ ນັບແຕ່ 8% ຂຶ້ນໄປ, ໃຫ້ລາຍຮັບສະເລ່ຍຂອງປະຊາຊົນບັນລຸ 1.700 ໂດລາສະຫະລັດ; ໃນນັ້ນ ຂະແຫນງກະສິກຳ-ປ່າໄມ້ເພີ່ມຂຶ້ນ ປະມານ 3,5% ກວມ 23%, ອຸດສາຫະກຳເພີ່ມ 15% ກວມ 39% ແລະ ຂະແຫນງການບໍລິການເພີ່ມຂຶ້ນປະມານ 6,5% ກວມປະມານ 38% ຂອງຈີດີພີ.
ຂະນະທີ່ ອັດຕາເງິນເຟີ້ກໍ່ຈະຄວບຄຸມໃຫ້ຢູ່ລະດັບຕ່ຳກວ່າອັດຕາການຂະຫຍາຍ ຂອງເສດຖະກິດເງິນກີບອ່ອນຄ່າ ຫລື ແຂງຄ່າບໍ່ໃຫ້ເກີນ 5% (ທຽບໃສ່ເງິນຕາຕ່າງປະເທດສະກຸນຫລັກ); ປະຕິບັດລາຍຮັບທັງຫມົດໃຫ້ໄດ້ປະມານ 19-21% ຂອງຈີດີພີຂຶ້ນໄປ ແລະ ຮັບປະກັນການຂາດດຸນງົບປະມານໃຫ້ຢູ່ລະຫວ່າງ 3-5% ຂອງຈີດີພີຕໍ່ປີ.
ທ່ານ ສົມສະຫວາດ ເລັ່ງສະຫວັດ ກ່າວອີກວ່າ: ສ່ວນຫນີ້ສິນໃນທົ່ວລະບົບການເງິນຂອງລັດ, ລັດຖະບານຊຸດນີ້ກໍ່ຈະສູ້ຊົນໃຫ້ລົງບໍ່ເກີນ 45% ຂອງຈີດີພີ; ລະດົມເງິນຝາກໃຫ້ເພີ່ມຂຶ້ນສະເລ່ຍໃນແຕ່ລະປີ 25,6%; ຮັບປະກັນຄັງສຳຮອງເງິນຕາຕ່າງປະເທດ ໃຫ້ສາມາດກຸ້ມການນຳເຂົ້າສິນຄ້າບໍ່ໃຫ້ຫລຸດ 6 ເດືອນ; ລະດົມການລົງທຶນໃຫ້ໄດ້ 32% ຫລື 127 ພັນຕື້ກີບ ແລະ ສາມາດຕອບສະຫນອງແຮງງານໄດ້ 3 ລ້ານກວ່າຄົນ, ແຮງງານໃຫມ່ປະມານ 277 ພັນຄົນ.
ຢ່າງໃດກໍ່ຕາມ ມື້ທີສອງຂອງກອງປະຊຸມສະພາກໍ່ໄດ້ນຳຮ່າງແຜນດັ່ງກ່າວ ມາປະກອບຄວາມຄິດເຫັນ ເພື່ອໃຫ້ມີຄວາມຖືກຕ້ອງ, ລະອຽດ ແລະ ເຫມາະສົມກັບສະພາບຄວາມເປັນຈິງຂອງເສດຖະກິດ-ສັງຄົມລາວໃນປະຈຸບັນ ໂດຍສະມາຊິກສະພາແຫ່ງຊາດ (ສສຊ) ບາງເຂດສະເຫນີຕື່ມວ່າ: ເຖິງລັດຖະບານຊຸດນີ້ ຈະວາງເປົ້າເສດຖະກິດຂະຫຍາຍຕໍ່ເນື່ອງແຕ່ດ້ານຄຸນນະພາບຂອງການ ເຕີບໂຕຍັງບໍ່ຫນັກແຫນ້ນລາຍຮັບສ່ວນໃຫຍ່ຍັງເອື່ອຍອີງໃສ່ການຂຸດ ຄົ້ນຊັບພະຍາກອນທຳມະຊາດ ແລະ ຫນໍ່ແຫນງເສດຖະກິດພູມປັນຍາຍັງອ່ອນນ້ອຍ. ສະນັ້ນລັດຖະບານຄວນສ້າງຄວາມສົມດຸນການເຕີບໂຕດ້ານເສດຖະກິດໄປຄຽງ ຄູ່ຄວາມສີວິໄລດ້ານຈິດໃຈ ແລະ ຮັບປະກັນຄຸນນະພາບສະພາບແວດລ້ອມ; ພັດທະນາທຸລະກິດຂະຫນາດນ້ອຍ ແລະກາງໂດຍ ເນັ້ນການສ້າງມູນຄ່າເພີ່ມຈາກຂະແຫນງການທີ່ບໍ່ແມ່ນ ການນຳໃຊ້ຊັບພະຍາກອນໃຫ້ຫລາຍຂຶ້ນ; ເລ່ງເພີ່ມລາຍຮັບສົ່ງອອກສິນຄ້າ, ບໍລິການ; ສ້າງພູມຄຸ້ມກັນເສດຖະກິດມະຫາພາກ ເພື່ອຮັບມືກັບຜົນກະທົບວິກິດໄພເງິນເຟີ້, ລາຄານ້ຳມັນ, ສະບຽງອາຫານ ແລະ ກຽມພ້ອມຮັບມືໄພທຳມະຊາດ ແລະ ພະຍາດລະບາດທີ່ເກີດຂຶ້ນ.
ພ້ອມດຽວກັນນັ້ນ ກໍ່ຍັງມີການສະເຫນີໃຫ້ລັດຖະບານອອກມາດຕະການກ່ຽວກັບການຈັບຈອງ ທີ່ດິນຂອງປະຊາຊົນໃຫ້ເຂັ້ມງວດ; ການເຮັດກະສິກຳຄວນເບິ່ງຕາມຄວາມເຫມາະສົມ ຂອງດິນໃນພື້ນທີ່; ການຄຸ້ມຄອງຊັບພະຍາກອນທຳມະຊາດ ເປັນຕົ້ນແມ່ນປ່າໄມ້; ບັນຫາເງິນ ເດືອນຂອງພະນັກງານ; ງົບປະມານເຂົ້າໃນການສຶກສາ, ສາທາລະນະສຸກ; ເບິ່ງໂຄງການກໍ່ສ້າງເຂື່ອນໄຟຟ້າ, ຂຸດຄົ້ນບໍ່ແຮ່ຫາກບໍ່ມີການພັດທະນາຈົນກາຍກຳນົດກໍ່ຄວນລຶບລ້າງ; ແຮງງານ ແລະ ບັນຫາສຳຄັນອື່ນໆທີ່ລັດຖະບານຊຸດໃຫມ່ນີ້ ຈະຕ້ອງເອົາໃຈໃສ່ຢ່າງຈິງຈັງໃນການປະຕິບັດ ເພື່ອຍູ້ອັດຕາເຕີບໂຕເສດຖະກິດໄປຕາມແຜນ.
ແນວໃດກໍ່ດີ ຮ່າງແຜນພັດທະນາດັ່ງກ່າວຍັງບໍ່ທັນຮອດວາລະຮັບຮອງຈາກສະພາ ໂດຍຈະມີການພິຈາລະນາອີກໃນມື້ຕໍ່ໄປ. ສ່ວນວ່າໃນມື້ນີ້ (17 ມິຖຸນາ) ກອງປະຊຸມຈະໄດ້ມີການຂຶ້ນສະເຫນີດັດແກ້ກ່ຽວກັບແຜນງົບປະມານ ປະຈຳສົກປີ 2010-2011 ຈາກກະຊວງການເງິນ.
| ພາບແລະເນື້ອຂ່າວຈາກ |
Comments:
Facebook- Related News
- Related News:
- Latest News
- Latest News:ຜົມດຳ===ຜົມຫງອກ (315 Hits)ຮູ້ຈັກປ່ອຍວາງ (405 Hits)ດີນອກ ດີໃນ (605 Hits)Lao Social Media scene by Sounay Phothisane (517 Hits)
- Most Read News
- Most Read News:ເພງ ອ່ອນແອ ໂດຍ Anita (3343 Hits)ຮູບປັ້ນ ເຈົ້າອານຸວົງ ຖືກປະດິດ ສະຖານແລ້ວ (2817 Hits)13 ປີ ສປປ ລາວ ເຂົ້າເປັນ ສະມາຊິກ ອາຊຽນ (2035 Hits)Genii with World Cup Fever (1712 Hits)
- Author News
- More from this author:New Lao Genii girl group (1097 Hits)Mongolia looks to sweeten trade with Laos (813 Hits)Laos reviews 25 years of economic reform (522 Hits)Australian government provides H1N1 vaccines (328 Hits)Lady's hot hit song "Soot ti Huk" (757 Hits)Yom Jai Orn (979 Hits)