ນາງສາວ ພິດສະໄຫມ ຈັນທະສອນ ມາຈາກວິທະຍາໄລ ການເງິນພາກໃຕ້ໄດ້ຄອງຕຳແຫນ່ງນາງສາວຈຳປາສັກ ປະຈຳປີ 2012 ໃນພິທີປະກວດ ນາງສາວຈຳປາສັກທີ່ໄດ້ຈັດຂຶ້ນ ໃນວັນທີ 31 ທັນວາ 2011 ນີ້ ທີ່ໂຮງແຮມຈຳປາແກຣນ ເຊິ່ງໃຫ້ກຽດເປັນປະທານ ແລະ ມອບມຸງກຸດ, ສາຍສະພາຍຂອງທ່ານ ສອນໄຊ ສີພັນດອນ ເລຂາພັກ ແຂວງເຈົ້າແຂວງໆຈຳປາສັກ ພ້ອມພັນລະຍາ ແລະ ເປັນກຽດເຂົ້າຮ່ວມຂອງ ທ່ານ ເຈືອງ ສົມບູນຂັນ ຄະນະເລຂາທິການສູນກາງພັກ, ຫົວຫນ້າຄະນະໂຄສະນາອົບຮົມ ສູນກາງພັກ, ມີການນຳຂັ້ນສູງ ຂອງແຂວງ, ນັກທຸລະກິດທັງພາກລັດ ແລະ ເອກະຊົນ, ພໍ່ແມ່ປະຊາຊົນເຂົ້າຮ່ວມ.
ສຳລັບງານປະກວດນາງສາວຈຳປາສັກປະຈຳປີ 2012 ນີ້ ມີຜູ້ເຂົ້າຮ່ວມປະກວດທັງຫມົດ 20 ນາງສາວ ເຊິ່ງໃນການປະກວດປະກອບມີການປະກວດນາງສາວໃນຊຸດລາຕີ, ຊຸດກີລາ ແລະ ຊຸດແຕ່ງງານ ເຊິ່ງຜ່ານການຄັດເລືອກຈາກຄະນະກຳມະການທີ່ມີປະສົບການພາຍໃນແຂວງ ແລະ ຜົນຂອງການປະກວດອັນດັບຫນຶ່ງໄດ້ແກ່ ນາງ ພິດສະໄຫມ ຈັນທະສອນ M7 ມາຈາກວິທະຍາໄລການເງິນພາກໃຕ້, ອາຍຸ 20 ປີ, ພອນສະຫວັນພິເສດມັກຟ້ອນ, ສູງ 1,66 ແມັດ, ຄອງຕຳແຫນ່ງນາງສາວຈຳປາສັກປະຈຳປີ 2012 ໄດ້ຮັບມຸງກຸດ, ສາຍສະພາຍພ້ອມດ້ວຍເງິນສົດ 20 ລ້ານກີບ, ສ່ວນອັນດັບສອງໄດ້ແກ່ນາງ ອຳພາພອນ ບົວອາສາ M13 ມາຈາກໂຮງຮຽນ ມສ ໂພນໄຊ ລວງສູງ 1,60 ແມັດ ໄດ້ຮັບລາງວັນເງິນສົດ 12 ລ້ານກີບ ພ້ອມດ້ວຍສາຍສະພາຍທັງໄດ້ຮັບລາງວັນຂວັນໃຈປະຊາຊົນຕື່ມອີກ ແລະ ອັນດັບສາມໄດ້ແກ່ ນາງ ສຸໃດ ນະວະພົນ M16 ມາຈາກວິທະຍາໄລການເງິນພາກໃຕ້ ພ້ອມທັງໄດ້ຮັບລາງວັນຂວັນໃຈຊ່າງພາບ, ຮັບລາງວັນເງິນສົດ 10 ລ້ານກີບພ້ອມດ້ວຍສາຍສະພາຍ ພ້ອມດ້ວຍຮອງອັນດັບ ສາມຈຳນວນ 4 ນາງສາວໄດ້ຮັບລາງວັນ 5 ລ້ານກີບ. ພ້ອມນັ້ນ ໃນພິທີ ທ່ານ ສອນໄຊ ສີພັນດອນ ກໍ່ໄດ້ໃຫ້ກຽດຂຶ້ນກ່າວອວຍພອນອັນປະເສີດມາຍັງການນຳພັກ-ລັດ, ພະນັກງານລັດຖະກອນ, ນັກທຸລະກິດ, ພໍ່ຄ້າຊາວຂາຍ, ພໍ່ແມ່ປະ ຊາຊົນບັນດາເຜົ່າພາຍໃນແຂວງຈຳປາສັກ ເນື່ອງໃນວັນສົ່ງທ້າຍປີເກົ່າ, ຕ້ອນຮັບປີໃຫມ່ສາກົນ ຄ.ສ 2012 ຕື່ມອີກ.
Comments:
- Latest News
Latest News:
- Most Read News
Most Read News:
- Author News
More from this author:
Facebook
