ຕະຫຼາດລົດຍັງສົດໃສ ແຕ່ກໍ່ການແຂ່ງຂັນສູງຂຶ້ນເລື້ອຍໆ

0
22

ທ່ານ ເຂັມຊາດ ພິລາພັນເດຊ ຜູ້ອຳນວຍການ ບໍລິສັດລາວໂຕໂຢຕ້າ ບໍລິການຈຳກັດ ໄດ້ກ່າວໃນໂອກາດເຂົ້າຮ່ວມງານເປີດໂຕເຄື່ອງຈັກລົດ ToyotaHilux REVO ໃຫມ່ ແລະ Fortuner ໃຫມ່ວ່າ: ຕະຫຼາດລົດໃນປະເທດເຮົາປີນີ້ພົບວ່າ ຍ້ອນສະພາບເສດຖະກິດມີຄວາມຫຍຸ້ງຍາກ ເຮັດໃຫ້ຍອດຂາຍລົດທຸກໆຄ້າຍມີບັນຫາ. ປະກອບກັບການແຂ່ງຂັນກໍ່ສູງ ເຊິ່ງພວກເຮົາເອງກໍ່ຕ້ອງປັບໃຫ້ມັນທັນ ເຊິ່ງລາວໂຕໂຢຕ້າບໍລິການກໍໃຊ້ຫຼາຍກົນລະຍຸດ. ນັບແຕ່ຕົ້ນປີນີ້ ພວກເຮົາກໍ່ມີຈັດໂປໂມຊັ້ນມີຫຼຸດ ມີແຈກມີແຖມ, ມີການນຳລົດບາງລຸ້ນ ເພີ່ມຕື່ມໃໝ່ໆເຂົ້າມາ ແລະ ແຕ່ນີ້ ຮອດທ້າຍປີ ພວກເຮົາເອງກໍ່ຈະມີກິດຈະກຳໃໝ່ໆເຂົ້າມາ, ຢ່າງໃດກໍ່ຕາມ ສຳລັບຕະຫຼາດລົດ ໃນຕໍ່ໜ້າ ຍັງຈະມີຄວາມສົດໃສຢູ່  ໂດຍສະເພາະປະເພດລົດເກັ່ງ ເນື່ອງຈາກວ່າ 2 ປັດໄຈ ເປັນຕົ້ນແມ່ນລາຄາບໍ່ສູງ ແລະ ປະຢັດນໍ້າມັນ.

ທ່ານ ເຂັມຊາດ ພິລາພັນເດຊ

ທ່ານກ່າວວ່າ: ອີງຕາມສະພາບການແຂ່ງຂັນທີ່ເຂັ້ມຂຸ້ນ ເຮັດໃຫ້ມາຮອດໃນປັດຈຸບັນ ບໍລິສັດລາວໂຕໂຢຕ້າ ບໍລິການຈຳກັດຍັງບໍ່ສາມາດບັນລຸເປົ້າໝາຍໄດ້. ສະນັ້ນ,ການເປີດໂຕຈັກລຸ້ນໃໝ່  ຈະເປັນປັດໄຈໜຶ່ງທີ່ຈະມາຊ່ວຍພັກດັນໃຫ້ຍອດຂາຍຂອງ ໂຕໂຢຕ້າ ປັບດີຂຶ້ນ. ສຳລັບຈັກໃໝ່ ນີ້ກໍ່ເປັນທີ່ຮູ້ຈັກຂອງຜູ້ຊົມໃຊ້ລົດໃນ ສັງຄົມລາວມາດົນແລ້ວ ເຊິ່ງໄດ້ຖືກນຳໃຊ້ໃນປະເທດໄທ. ແຕ່ປະເທດ ລາວຫາກໍ່ເລີ່ມເຂົ້າມາເຊິ່ງເປັນອີກຈຸດໜຶ່ງທີ່ສ້າງຄວາມແຕກຕ່າງ ລະຫວ່າງ ຈັກລຸ້ນເກົ່າ ແລະ ລຸ້ນໃໝ່ ແລະ ເຊື່ອວ່າລູກຄ້າທີ່ຄອງຄອຍ ເຄື່ອງຈັກລຸ້ນນີ້ ກໍ່ຈະມີການຊື້ເພີ່ມຂຶ້ນ.

ທ່ານ ເຂັມຊາດ ພິລາພັນເດຊ  ກ່າວຕື່ມວ່າ ໂຕໂຢຕ້າ ຕັ້ງເປົ້າຍອດຂາຍທັງໝົດ ທົ່ວປະເທດ ທີ່ 9,000 ຄັນ, ສະເພາະ ບໍລິສັດ ລາວໂຕໂຢ ບໍລິການຈຳກັດ ຕັ້ງເປົ້າ 3,900ຄັນ ເຊິ່ງມາຮອດປັດຈຸບັນ ໄດ້ພຽງ 30% ຂອງແຜນ ດັ່ງນັ້ນນັບແຕ່ນີ້ຫາທ້າຍປີ ເພື່ອກະຕຸ້ນຍອດຂາຍ ລາວໂຕໂຢຕ້າ ກໍ່ຈະໄດ້ມີກິດຈະກຳທີ່ ຫຼາກຫຼາຍຂຶ້ນ ເພື່ອເຮັດໃຫ້ໄດ້ຕາມແຜນການທີ່ຕັ້ງໄວ້.

ທ່ານຍັງໄດ້ກ່າວຢໍ້າທ້າຍວ່າ ເມື່ອການແຂ່ງຂັນສູງກໍ່ເປັນຜົນດີໃຫ້ລູກຄ້າ ຈະມີໂອກາດໄດ້ເລືອກຊື້ລົດ ບໍ່ວ່າຈະເປັນຄຸນນະພາບ ແລະ ລາຄາ.

Source: ເສດຖະກິດການຄ້າ