ເປີດງານວາງສະແດງສິນຄ້າ ເຊື່ອມສໍາພັນ 3 ປະເທດ

0
10

ພິທີເປີດງານງານວາງສະແດງ ແລະ ຈໍາໜ່າຍສິນຄ້າ ເຊື່ອມສາຍສໍາພັນ 3 ປະເທດ 9 ແຂວງ ລາວ-ຫວຽດນາມ ແລະ ໄທ ໄດ້ຈັດຂຶ້ນໃນວັນທີ 6 ກັນຍາ 2017 ນີ້ ຢູ່ທີເດີນກິລາຄົບວົງຈອນຂອງແຂວງບໍລິຄໍາໄຊ  ເປັນກຽດເຂົ້າຮ່ວມໂດຍທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄໍາໄຊ, ທ່ານ ເຈີນແອງເຊີນ ປະທານສະມາຄົມທຸລະກິດແຂວງເຫງະອານ ສສ ຫວຽດນາມ, ທ່ານ ປອ ຫງຽນທິຕຽດ ຮອງປະທານສະມາຄົມທຸລະກິດຮົງລາມຮາໂນຍ ສສ ຫວຽດນາມ,ທ່ານ ຊານຍຸດ ວັນດີ ຫົວໜ້າການຄ້າແຂວງບຶງການ ຕະຫຼອດຮອດມວນຊົນຊາວແຂວງບໍລິຄໍາໄຊເຂົ້າຮ່ວມ.

ທ່ານ ກະເສີມສັກ ແກ້ວໄຊຍະວົງ ປະທານສະພາການຄ້າ ແລະ ອຸດສະຫະກໍາແຂວງບໍລິຄໍາໄຊ ໄດ້ລາຍງານການກະກຽມການເປີດງານວາງສະແດງ ແລະ ຈໍາໜ່າຍສິນຄ້າ ເຊື່ອມສາຍສໍາພັນ 3 ປະເທດ 9 ແຂວງ ລາວ- ຫວຽດນາມ ແລະ ໄທ ໃນຄັ້ງນີ້ ກໍເພຶ່ອເປັນການກະຕຸກຊຸກຍູ້ເສດຖະກິດພາຍໃນ ແລະ ຕ່າງປະເທດ ຕາມແລວເສດຖະກິດທີນໍາໃຊ້ເສັ້ນທາງ ເລກ 8 ແລະ ເລກ 12 ໃຫ້ມີການເຕີບໃຫຍ່ຂະຫຍາຍຕົວ ກ້າວສູ່ລວງເລິກ ແລະ ຫຼາກຫຼາຍສີສັນເຊິ່ງເປັນໂອກາດໃຫ້ພາກທຸລະກິດ  ແລະ ຜູ້ປະກອບການໄດ້ມີໂອກາດພົບປະແລກປ່ຽນບົດຮຽນ ນໍາເອົາຜະລິດຕະພັນສິນຄ້າຂອງຕົນມາວາງສະແດງ,ທັງນີ້ກໍຍັງເປັນການສະເຫຼີມສະຫຼອງ 2 ວັນ ປະຫວັດສາດລາວ-ຫວຽດນາມ ປະຈໍາປີ 2017 ຄື ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 40 ປີ ແລະ ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 55 ປີ.

ຈາກນັ້ນ, ບັນດາຄະນະປະທານ ແລະ ແຂກທີເຂົ້າຮ່ວມ ກໍໄດ້ພ້ອມກັນຕັດແຖບຜ້າເພຶ່ອເປີດງານຢາງເປັນທາງການ. ສໍາລັບບັນດາຫ້າງຮ້ານທີ່ນໍາເອົາສິນຄ້າເຂົ້າມາຈໍາໜ່າຍ ແລະ ວາງສະແດງໃນງານຄັ້ງນີ້ມີທັງໝົດປະມານ 400 ກວ່າຮ້ານ. ໃນນັ້ນ, ມີກຸ່ມສິນຄ້າ ປະເພດໂອທ໋ອບ-ໂອດ໊ອບ, ຜະລິດຕະພັນຮ້ານອາຫານ, ສິນຄ້າພະຫະນະກົນຈັກ, ເຄື່ອງໃຊ້ໄຟຟ້າ ເອັກເລັກໂຕນິກ, ເຟີນິເຈີ ແລະ ກຸ່ມສິນຄ້າປະເພດອື່ນໆ ງານດັ່ງກ່າວນີ້ຈະສືບຕໍ່ດຳເນີນໄປຈົນຮອດວັນທີ 12 ກັນຍາ 2017 ຈຶ່ງຈະປິດລົງ.

Source: ເສດຖະກິດການຄ້າ