ຮ້ານໂກດັງ ສະຖານທີ່ເກັບຄວາມສຸກ ລໍຖ້າທ່ານໄປສຳຜັດ

0
11

ເມື່ອຍຈາກການເຮັດວຽກທີ່ເປັນບັນຫາກວນໃຈມາເກືອບໝົດອາທິດແລ້ວ ຫຼາຍໆທ່ານກໍ່ກຳລັງຫາສະຖານທີ່ຜ່ອນຄາຍ ເພື່ອສັງສັນກັບໝູ່ຄູ່, ຄອບຄົວ ຫຼື ຄົນຮັກຢູ່ແມ່ນບໍ່? ຮ້ານອາຫານກໍ່ເປັນອີກໜຶ່ງທາງເລືອກໃນອັນດັບຕົ້ນໆ ໂດຍມື້ນີ້ເຮົາຈະມາແນະນຳຮ້ານອາຫານທີ່ເປັນໂກດັງເກັບຄວາມສຸກ ລໍຖ້າໃຫ້ທຸກທ່ານສຳຜັດ, ດ້ວຍບັນຍາກາດທີ່ຜ່ອນຄາຍ, ອາຫານແຊບ, ການບໍລິການທີ່ໜ້າປະທັບໃຈ ແລະ ທີ່ຂາດບໍ່ໄດ້ຄືສຽງເພງທີ່ຖືກໃຈ.
ບັນຍາກາດທີ່ພິເສດຂອງຮ້ານ: ການຕົກແຕ່ງຮ້ານໃຫ້ເປັນເອກະລັກສະເພາະຖືກອອກແບບໃຫ້ເປັນ 3 ພື້ນທີ່ 3 ເອກະລັກ ບໍ່ວ່າຈະເປັນດ້ານນອກທີ່ໃຫ້ຄວາມຮູ້ສຶກຜ່ອນຄາຍແບບສະບາຍ, ຮັບລົມເຢັນໂຊຍພັດເບົາໆ, ມີສຽງເພງຂັບກ່ອມມ່ວນໆ ເຊິ່ງພື້ນທີ່ສ່ວນນີ້ເໝາະສຳລັບການມາແບບເປັນຄອບຄົວທີ່ສຸດ ເພາະຈະໄດ້ບັນຍາກາດຄືຢູ່ບ້ານຂອງຕົນເອງທີ່ເຕັມໄປດ້ວຍຄວາມອົບອຸ່ນ ແຕ່ພິເສດແມ່ນທ່ານຈະມີທຸກຢ່າງໄວ້ຖ້າບໍລິການ.


ພື້ນທີ່ຫ້ອງໂຖງທາງດ້ານໃນ ທີ່ມີຈຸດເດັ່ນ ຄື: ເວລາທີ່ເຮົາເຂົ້າໄປຈະໃຫ້ ຄວາມຮູ້ສຶກຄືຢູ່ໃນສາງເກັບເຄື່ອງຂະໜາດໃຫຍ່ ແຕ່ຖືກປັບແຕ່ງໃຫ້ເປັນຮ້ານອາຫານ, ມີວົງດົນຕີເສບສົດ ໂດຍການໄລ່ລະດັບຕັ້ງແຕ່ເລີ່ມຕົ້ນແບບເບົາໆຈົນໄປເຖິງເພງທີ່ມີລັກສະນະໜັກແໜ້ນຈາກວົງທີ່ເປັນມືອາຊີບ ເຊິ່ງແນ່ນອນວ່າໃນພາກສ່ວນນີ້ແມ່ນຖືກໃຈບັນດາໄວລຸ້ນ, ໄວເຮັດວຽກທີ່ຕ້ອງການສັງສັນກັບໝູ່ຄູ່ ເພາະບໍ່ມີຫຍັງຈະດີໄປກວ່າບັນຍາກາດດີໆ ດົນຕີມ່ວນໆກັບໝູ່ທີ່ຮູ້ໃຈອີກແລ້ວ.
ພື້ນທີ່ສຸດທ້າຍແມ່ນເໝາະສຳລັບທ່ານທີ່ຕ້ອງການຄວາມເປັນສ່ວນຕົວເປັນບັນຍາກາດຢູ່ໃນຫ້ອງທີ່ມີພຽງໂຕະບໍລິການພ້ອມສຽງດົນຕີທີ່ໃຫ້ໄດ້ຟັງເພື່ອເປັນການຜ່ອນຄາຍ ເໝາະສຳລັບທ່ານທີ່ໄປເປັນແບບກໍລະນີພິເສດຢູ່ກັບຄູ່ຮັກ ຫຼື ກຸ່ມໝູ່ເພື່ອນທີ່ຕ້ອງການຄວາມເປັນສ່ວນຕົວໃນການສົນທະນາກັນ ກໍ່ຖືວ່າເປັນອີກຈຸດໜຶ່ງທີ່ໜ້າສົນໃຈ.

ທ່ານ ຖານັນ ຊະວະສິຣິກຸນທົນ ຜູ້ຈັດການຮ້ານອາຫານໃນເຄືອກຸ່ມ ບໍລິສັດ Born To B Food and Beverage ໄດ້ກ່າວວ່າ: ຮ້ານໂກດັງ ເປັນໜຶ່ງໃນຮ້ານອາຫານທີ່ຢູ່ໃນເຄືອຂອງກຸ່ມ ບໍລິສັດ Born To B Food and Beverage ໂດຍຄວາມແຕກຕ່າງຂອງຮ້ານແມ່ນຕ້ອງການທີ່ຈະສື່ເຖິງສະຖານທີ່ອັນເປັນບ່ອນສະໜອງຄວາມສຸກເພື່ອທີ່ຈະໃຫ້ແຂກທີ່ເຂົ້າໃຊ້ບໍລິການໄດ້ມີຮອຍຍິ້ມແຫ່ງຄວາມປະທັບໃຈໃນເວລາກັບໄປ ເຊິ່ງທາງຮ້ານກໍ່ມີການອອກແບບໃຫ້ເປັນພິເສດ, ການນຳໃຊ້ເຟີນີເຈີ ຕະຫຼອດເຖິງຮູບແບບກໍ່ມີກິ່ນອາຍແບບສະໄໝເກົ່າຂອງອັງກິດເຂົ້າມາປະສົມປະສານ ເພື່ອທີ່ຈະໃຫ້ລູກຄ້າໄດ້ຮູ້ສຶກເຖິງ ຄວາມແຕກຕ່າງ ແລະ ບົ່ງບອກຄວາມເປັນເອກະລັກຂອງຮ້ານໂກດັງ.

ມົນສະເໜ່ຈາກສຽງເພງ: ນອກຈາກບັນຍາກາດຂອງຮ້ານແລ້ວ ອີກສິ່ງໜຶ່ງທີ່ຂາດບໍ່ໄດ້ ແລະ ເປັນຈຸດເດັ່ນຂອງທາງຮ້ານກໍ່ຄືສຽງດົນຕີ ເຊິ່ງທາງຮ້ານຈະເນັ້ນການຫຼິ້ນດົນຕີສົດໃນທຸກມື້ ໂດຍຈະເປັນແນວສາກົນປະສົມກັບທາງດົນຕີຮ່ວມສະໄໝຂອງບ້ານເຮົາ ໃນກໍລະນີທີ່ທາງລູກຄ້າຕ້ອງການຟັງເພງປະເພດໃດກໍ່ຕອບສະໜອງໃຫ້ໄດ້, ນັບແຕ່ເວລາ 7:30 ໂມງ ກໍ່ຈະເລີ່ມຫຼິ້ນໃນແນວເພງແບບເບົາໆ ຈົນໄລ່ລຳດັບໄປເປັນແບບວົງ ໃຫຍ່ ( Full Brand ) ທີ່ຈະໃຫ້ສຽງດົນຕີແບບໜັກແໜ້ນຂຶ້ນໄປຕາມລຳດັບ. ນັກຮ້ອງ ແລະ ນັກດົນຕີປະຈຳຮ້ານມີທັງໝົດ 7 ຄົນ ທີ່ພິເສດກໍ່ຄືຈະເປັນຊາວຕ່າງຊາດຮ່ວມຢູ່ນຳ. ນອກຈາກນັ້ນ, ທຸກຄົນໃນວົງຍັງສາມາດຫຼິ້ນເຄື່ອງດົນຕີ ແລະ ຮ້ອງເພງໄດ້ທຸກຄົນ ເຊິ່ງແນ່ນອນວ່າທຸກຄົນມີສະເໜ່ທີ່ເປັນເອກະລັກຂອງຕົນເອງພ້ອມທີ່ຈະເຮັດໃຫ້ລູກຄ້າຮູ້ສຶກແປກໃໝ່ຢູ່ຕະຫຼອດເວລາ.

ທາງດ້ານການບໍລິການ: ຈະເນັ້ນໜັກກັບນ້ອງໆທີ່ເຮັດວຽກຮ່ວມກັນ ໂດຍຜູ້ບໍລິຫານຈະຄິດສະເໝີວ່າເຮົາຈະເຮັດແນວໃດໃຫ້ພະນັກງານມີຄວາມສະໜຸກກັບວຽກທີ່ໄດ້ເຮັດແລ້ວໃຫ້ຄວາມສຸກນັ້ນສາມາດສົ່ງຕໍ່ໄປເຖິງລູກຄ້າໄດ້ ເຊິ່ງຜູ້ຈັດການຈະບອກກັບພະນັກງານສະເໝີວ່າລູກຄ້າບໍ່ແມ່ນພະເຈົ້າ ທຸກທ່ານທີ່ເຂົ້າມາກໍ່ເປັນຄົນທຳມະດາ ແຕ່ພວກເຂົາຄືຜູ້ມີພະຄຸນກັບເຮົາ. ສະນັ້ນ, ເຮົາຈະເຮັດແນວໃດໃຫ້ແຂກຮູ້ສຶກປະທັບໃຈ ເພາະເມື່ອລູກຄ້າຕັດສິນໃຈເຂົ້າມາໃຊ້ບໍລິການທີ່ຮ້ານເຮົາ ນັ້ນກໍ່ຄືຕ້ອງການຄວາມສຸກ ແລະ ການບໍລິການທີ່ດີ; ໜ້າທີ່ຂອງເຮົາຄືມອບສິ່ງນັ້ນໃຫ້ກັບລູກຄ້າ ແລະ ບໍ່ເຮັດໃຫ້ພວກເພິ່ນຕ້ອງຜິດຫວັງໃນການເຂົ້າມາໃຊ້ບໍລິການ.

ຄວາມຫຼາກຫຼາຍຂອງລາຍການອາຫານເຊັ່ນ: ອາຫານລາວ, ໄທ ໄປຈົນເຖິງປະເທດໃນແຖບເອີຣົບ ເຊິ່ງໃນໄລຍະ ສວາຍກໍ່ຈະເນັ້ນເປັນແບບອາຫານທ້ອງຖິ່ນຂອງລາວ ເພື່ອໃຫ້ຮູ້ສຶກອີ່ມທ້ອງ, ສ່ວນໃນໄລຍະແລງໆກໍ່ຈະມີ ຄວາມຫຼາກຫຼາຍເພີ່ມຂຶ້ນ ໂດຍປະເພດລາຍການອາຫານແນະນຳພິເສດຂອງທາງຮ້ານຈະເປັນປະເພດຊີ້ນ ເຊັ່ນ: ສະເຕັກ ແລະ ກໍ່ຈະເປັນອາຫານເບົາໆແບບຕ່າງປະເທດ ເຊັ່ນ: ພິດຊ່າ ແລະ ສະປາເກັດຕີ.
ສຸດທ້າຍເຈົ້າຂອງຮ້ານເພິ່ນໄດ້ກ່າວຕື່ມວ່າ ທຸກສິ່ງທີ່ເຮົາອອກແບບ ແລະ ຄອຍຖ້າໃຫ້ບໍລິການ, ເປົ້າໝາຍຄືຕ້ອງການຕອບໂຈດຄວາມຕ້ອງການຂອງລູກຄ້າທຸກກຸ່ມ ເຊິ່ງທັງໝົດມັນຄືໂກດັງ ທີ່ມີ ຄວາມໝາຍໃນພາສາລາວກໍ່ຄືສາງເກັບເຄື່ອງ ແລະ ສາງແຫ່ງນີ້ຄືເຮົາຕ້ອງການໃຫ້ເປັນສະຖານທີ່ໃນການເກັບຄວາມສຸກທຸກຮູບແບບ ເມື່ອລູກຄ້າເມື່ອຍກັບວຽກງານ ຫຼື ຕ້ອງການຫາສະຖານທີ່ຜ່ອນຄາຍກໍ່ສາມາດມາຄົ້ນຫາຄວາມສຸກໃນສາງໂກດັງຂອງພວກເຮົາໄດ້ທຸກມື້.

Source: ເສດຖະກິດການຄ້າ