ແຂວງວຽງຈັນ ມີຫຼາຍສະຖານທີ່ທ່ອງທ່ຽວໃຫ້ເລືອກໄດ້ດັ່ງໃຈ

0
9

ຂຶ້ນຊື່ວ່າ ແຂວງວຽງຈັນ ຫຼາຍໆຄົນອາດນຶກເຖິງເມືອງວັງວຽງ ໂດຍທັນທີ ແຕ່ໃນຕົວຈິງແລ້ວແຂວງດັ່ງກ່າວມີເຖິງ 11 ເມືອງທີ່ຂຶ້ນກັບ ເພາະສະນັ້ນມັນກໍ່ແລ້ວແຕ່ຄວາມປະສົງຂອງທ່ານວ່າຈະໄປຈຸດໃດດີຂະນະທີ່ປັດຈຸບັນຢູ່ແຂວງວຽງຈັນ ມີສະຖານທີ່ທ່ອງທ່ຽວເປີດບໍລິການແລ້ວ 100 ກວ່າແຫ່ງ.
ກໍ່ຍອມຮັບວ່າວັງວຽງເປັນເມືອງທີ່ຂຶ້ນຊື່ລືນາມຂອງແຂວງວຽງຈັນ ດ້ວຍເງື່ອນໄຂທາງດ້ານທີ່ຕັ້ງເປັນເມືອງທີ່ອ້ອມຮອບດ້ວຍພູຜາ ມີຄວາມສະຫງ່າງາມທາງທໍາມະຊາດ ແລະ ວັດທະນະທໍາຊາວເມືອງທີ່ຄຸ້ນເຄີຍກັບການຕ້ອນຮັບແຂກຄົນສົ່ງຜົນດີຕໍ່ຂະແໜງການທ່ອງທ່ຽວ ສາມາດດຶງດູດແຂກຕ່າງບ້ານທ່ານຕ່າງແດນເຂົ້າທ່ຽວໃນແຕ່ລະປີໄດ້ຫຼາຍທີ່ສຸດເມື່ອທຽບກັບເມືອງອື່ນໆພາຍໃນແຂວງ; ພ້ອມສົ່ງຜົນດີຕໍ່ອາຊີບວຽກງານກໍ່ຄືການກະຈາຍລາຍໄດ້ໃຫ້ກັບປະຊາຊົນໃນທ້ອງຖິ່ນ ໂດຍສະເພາະທຸລະກິດບໍລິການ, ຮ້ານອາຫານ – ຮ້ານກິນດື່ມຕ່າງໆ.
ອີງຕາມຂໍ້ມູນຈາກໜ່ວຍງານຄຸ້ມຄອງການທ່ອງທ່ຽວ, ຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງວັງວຽງ ໃຫ້ຮູ້ວ່າ: ໃນສົກ 2015 – 2016 ມີຈໍານວນນັກທ່ອງທ່ຽວທັງພາຍໃນ ແລະ ຕ່າງປະເທດ ເດີນທາງເຂົ້າໄປທ່ອງທ່ຽວພັກເຊົາຢູ່ເມືອງວັງວຽງ 183,254 ຄົນ ( ຍິງ 93,043 ຄົນ ). ໃນນັ້ນ, ເປັນນັກທ່ອງທ່ຽວພາຍໃນປະເທດ 41,602 ຄົນ ແລະ ນັກທ່ອງທ່ຽວຕ່າງປະເທດ 141,643 ຄົນ ( ມາຈາກທະວີບອາຊີ 50%, ຢູໂຣບ 45% ແລະ ທະວີບອື່ນໆ 5% ) ສະເລ່ຍລາຍຮັບເຂົ້າເມືອງໄດ້ປະມານ 73 ຕື້ກວ່າກີບ ເຊິ່ງໃນປີ 2016 ຜ່ານມານັ້ນມີແຫຼ່ງທ່ອງທ່ຽວທໍາມະຊາດເປີດບໍລິການແລ້ວເຖິງ 20 ກວ່າແຫ່ງ.


ເບິ່ງແລ້ວສະເພາະເມືອງວັງວຽງ ມີຕົວເລກການທ່ອງທ່ຽວລື່ນຫຼາຍໆແຂວງໃນປະເທດເຮົາໄດ້ເລີຍເຊັ່ນ: ໄຊສົມບູນ ( 45,000 ກວ່າຄົນ ), ເຊກອງ ( 47,000 ກວ່າຄົນ ), ຫົວພັນ ( 62,000 ກວ່າຄົນ ), ຊຽງຂວາງ ( 85,000 ກວ່າຄົນ ), ສາລະວັນ ( 153,000 ກວ່າຄົນ ) ແລະ ອັດຕະປື ( 158,000 ກວ່າຄົນ ) ຈຶ່ງບໍ່ແປກທີ່ແຂວງວຽງຈັນ ສາມາດມີລາຍຮັບຈາກວຽກງານການທ່ອງທ່ຽວຢູ່ໃນອັນດັບຕົ້ນໆເມື່ອທຽບກັບແຂວງອື່ນໆໃນແຕ່ລະປີ.
ພາຍໃນແຂວງວຽງຈັນ ນອກຈາກເມືອງວັງວຽງແລ້ວ, ຍັງມີເມືອງທຸລະຄົມທີ່ຂຶ້ນຊື່ແຫຼ່ງທ່ອງທ່ຽວທະເລລາວ ເຊິ່ງແຕ່ລະປີມີແຂກເຂົ້າທ່ຽວຊົມບໍ່ຂາດໄລຍະເຊັ່ນກັນ ດ້ວຍອານາເຂດອັນກວ້າງໃຫຍ່ຂອງໜ້ານໍ້າປະກອບກັບຄວາມອຸດົມສົມບູນຂອງສັດນໍ້ານາໆພັນ ແລະ ຄວາມສວຍງາມຂອງສະພາບແວດລ້ອມເຂື່ອນນໍ້າງື່ມ ກາຍເປັນສິ່ງຜູກພັນຈິດໃຈຂອງຜູ້ທີ່ໄດ້ໄປແລ້ວຄິດຢາກໄປອີກ.
ແນ່ນອນວ່າ ມັນບໍ່ສະເພາະເທົ່ານັ້ນໃນຈໍານວນແຫຼ່ງທ່ອງທ່ຽວທີ່ເປີດບໍລິການ 152 ແຫ່ງທົ່ວແຂວງ ໃນປັດຈຸບັນຍັງຖືກຢັ່ງຢາຍຢູ່ຕາມເມືອງຕ່າງໆນໍາອີກ ເຊັ່ນ: ເມືອງວຽງຄໍາ, ເມືອງໝື່ນ, ເມືອງແມດ, ເມືອງເຟືອງ, ຫີນເຫີບ, ຊະນະຄາມ, ກາສີ, ແກ້ວອຸດົມ ແລະ ໂພນໂຮງ. ລ້ວນເປັນທ່າແຮງຕໍ່ການດຶງດູດ ແລະ ສ້າງລາຍໄດ້ພາຍໃນແຂວງ. ເຖິງແມ່ນວ່າແຂວງວຽງຈັນ ບໍ່ມີດ່ານສາກົນເຊື່ອມຕໍ່ລະຫວ່າງປະເທດກໍ່ຕາມ ແຕ່ກໍ່ອາໄສມົນສະເໜ່ຂອງພູມສັນຖານ, ມູນເຊື້ອວັດທະນະທໍາອັນດີງາມຂອງປະຊາຊົນບັນດາເຜົ່າເປັນຕົ້ນທຶນສໍາຄັນສົ່ງຍູ້ອຸດສາຫະກໍາການທ່ອງທ່ຽວກໍ່ໄດ້ຮັບຜົນຢ່າງໜ້າພໍໃຈ.

ໃນປີ 2016 ຜ່ານມາ ໂດຍການເກັບກໍາຕົວເລກຂອງພາກສ່ວນກ່ຽວຂ້ອງມີນັກທ່ອງທ່ຽວສາກົນເຂົ້າຢ້ຽມຢາມແຂວງວຽງຈັນ ທັງໝົດ 589,948 ຄົນ ຈັດຢູ່ອັນດັບ 5 ຖັດຈາກນະຄອນຫຼວງ, ສະຫວັນນະເຂດ, ຫຼວງພະບາງ ແລະ ແຂວງຈໍາປາສັກ ແຕ່ວ່າຕົວເລກນັກທ່ອງທ່ຽວພາຍໃນທີ່ໄປຢ້ຽມຢາມແຂວງດັ່ງກ່າວມີເຖິງ 363,061 ຄົນ ເປັນຮອງພຽງແຂວງຈໍາປາສັກ ເທົ່ານັ້ນ. ໃນຂະນະທີ່ບັນດາສິ່ງຮອງຮັບ ແລະ ເງື່ອນໄຂຕິດພັນກັບຂະແໜງການທ່ອງທ່ຽວນັ້ນມີແຫຼ່ງທ່ອງທີ່ເປີດບໍລິການທັງໝົດ 152 ແຫ່ງ, ໂຮງແຮມ – ເຮືອນພັກໄວ້ບໍລິການ 269 ແຫ່ງ, ຮ້ານອາຫານ – ຮ້ານບັນເທີງ 297 ແຫ່ງ.
ແນວໃດກໍ່ຕາມບໍ່ວ່າເວລາໃດຊາວແຂວງວຽງຈັນ ລ້ວນຍິນດີ ແລະ ມີນໍ້າໃຈພ້ອມຕ້ອນຮັບແຂກຄົນທັງພາຍໃນ ແລະ ຕ່າງປະເທດສະເໝີ ຈະຂຶ້ນຈາກໃຕ້ ຫຼື ໄປຈາກເໜືອກໍ່ສະດວກສະບາຍຕະຫຼອດປີ ໂດຍສະເພາະຫາກເປັນການຂັບຂີ່ຈາກນະຄອນຫຼວງວຽງຈັນ ກໍ່ໃຊ້ເວລາບໍ່ຫຼາຍໄລຍະທາງຈາກໃຈກາງນະຄອນຫຼວງກໍ່ປະມານ 70 ກວ່າກິໂລແມັດ ເທົ່ານັ້ນ.
ຄົນລາວເຮົາຫັນມາທ່ອງທ່ຽວປະເທດລາວ ໃຫ້ຫຼາຍຂຶ້ນກັນດີກວ່າ; ການໄປ – ມາຫາສູ່ກັນນັ້ນນອກຈາກເປັນການເປີດໂອກາດໃຫ້ຕົນເອງໄດ້ສໍາຜັດກັບສິ່ງໃໝ່ໆແລ້ວ ຍັງຈະໄດ້ຮູ້ຈັກຮັກແພງກັບໃຜຕໍ່ໃຜຫຼາຍໆຄົນ, ຮັດແໜ້ນຄວາມສໍາພັນອັນດີງາມໄດ້ຍິ່ງໆຂຶ້ນ ແລະ ສາມາດແລກປ່ຽນຮຽນຮູ້ຮີດຄອງປະເພນີ, ວິຖີຊີວິດຂອງກັນ ແລະ ກັນ. ທີ່ສໍາຄັນເມື່ອໄດ້ໄປພັກຜ່ອນຢ່ອນໃຈໃນສະຖານທີ່ໃດໜຶ່ງແລ້ວຄວາມຮູ້ສຶກ ແລະ ຈິນຕະນາການໃໝ່ໆຈະຕື່ມເຕັມສູ່ຈິດໃຈຂອງທ່ານແບບບໍ່ຮູ້ຕົວ.

Source: ເສດຖະກິດການຄ້າ