ສານອາຫານຕ້ານພະຍາດໃນຍາມຝົນ

0
10

ໄລຍະຝົນຕົກແບບນີ້ພ້ອມສະພາບອາກາດທີ່ປຽກຊຸ່ມ ແລະ ເຢັນ ເໝາະແກ່ການຈະເລີນເຕີບໂຕຂອງເຊື້ອພະຍາດໂດຍບໍ່ຈໍາແນກວ່າຈະເປັນເດັກນ້ອຍ, ຜູ້ໃຫຍ່ ຫຼື ຜູ້ເຖົ້າ. ດັ່ງນັ້ນ, ນອກຈາກການເບິ່ງແຍງຕົນເອງຫຼີກລຽງການຖືກກະທົບຮ້າຍແຮງຈາກແດດຮ້ອນລົມຝົນ ເພື່ອປ້ອງກັນພະຍາດແຊກຊ້ອນເຂົ້າສູ່ຮ່າງກາຍແລ້ວ ທຸກເພດທຸກໄວກໍ່ຕ້ອງກິນອາຫານໃຫ້ຄົບ 5 ໝູ່ ໂດຍເນັ້ນການກິນຜັກ ແລະ ໝາກໄມ້ໃຫ້ຫຼາຍຂຶ້ນ. ເພາະສານອາຫານທີ່ຮັບເຂົ້າໄປມີສ່ວນສຳຄັນໃນການຊ່ວຍເສີມສ້າງພູມຕ້ານທານໃຫ້ແກ່ຮ່າງກາຍ ແລະ ຮັບມືກັບພະຍາດໃນຍາມຝົນໄດ້ ເຊິ່ງສານອາຫານທີ່ຕ້ານພະຍາດ ມີດັ່ງນີ້:

  • ເບຕາແຄໂຣທີນ ພົບຫຼາຍໃນຜັກໃບຂຽວ ແລະ ໝາກໄມ້ທີ່ມີສີສົ້ມ, ສີຂຽວ, ສີເຫຼືອງ ຫຼື ສີແດງ ເຊັ່ນ: ຜັກບົ້ງ, ຫົວກະຣົດ, ໝາກເຫຼ່ນ, ໝາກຫຸ່ງ ແລະ ອື່ນໆ.
  • ວິຕາມິນ ຊີ ພົບໃນຜັກ ແລະ ໝາກໄມ້ທີ່ມີລົດສົ້ມ ໄດ້ແກ່: ໝາກນາວ, ກີວີ, ໝາກເຜັດໃຫຍ່, ໝາກສີດາ ເປັນຕົ້ນ.
  • ວິຕາມິນ ອີ ພົບຫຼາຍໃນຜັກໃບຂຽວ ເຊັ່ນ: ໝາກເຫຼ່ນ, ກີວີ, ໄຂ່, ຖົ່ວ, ນົມ, ຊີ້ນປາ ຫຼື ນ້ຳມັນພືດ.
  • ວິຕາມິນ ບີ ພົບໃນຜັກໃບຂຽວ ເປັນຕົ້ນ: ນົມ, ຊີ້ນສັດ, ຕັບ, ໄຂ່ ແລະ ທັນຍະພືດທີ່ບໍ່ໄດ້ຮັບການຂັດສີ.
  • ຊີລີນຽມພົບຫຼາຍໃນອາຫານທະເລ, ຕັບ, ກະທຽມ…
  • ສັງກະສີ ພົບຫຼາຍໃນຫອຍນາງລົມ, ຜະລິດຕະພັນນົມ, ຊີ້ນໄກ່, ໄຂ່, ຖົ່ວດິນ.
  • ກະທຽມມີສານຕ້ານອະນຸມູນອິດສະຫຼະເຮັດໜ້າທີ່ເພີ່ມປະສິດທິພາບໃນການເຮັດວຽກຂອງເຊວໃນລະບົບພູມຄຸ້ມກັນ ໂດຍມີລິດຂ້າເຊື້ອພະຍາດ ແລະ ຊ່ວຍເສີມພູມຕ້ານທານ.
  • ກົດໂອເມກາ 3 ຄືກົດໄຂມັນທີ່ຈຳເປັນໃນການສ້າງເມັດເລືອດຂາວ ແລະ ແອນຕີບໍດີ ພົບຫຼາຍໃນໄຂ່, ປາທະເລ, ຖົ່ວເຫຼືອງ, ນ້ຳມັນຕັບປາ.
  • ການບໍລິໂພກພືດຜັກໝາກໄມ້ ແລະ ອາຫານແຕ່ລະວັນຄວນຄໍານຶງເຖິງຜົນປະໂຫຍດຕໍ່ສຸຂະພາບ ແລະ ຄວນທໍາຄວາມສະອາດໃຫ້ຄັກແນ່ສະເໝີ.


Source: ເສດຖະກິດການຄ້າ