ງານວາງສະແດງສິນຄ້າ ດ້ານການກໍ່ສ້າງ ແລະ ອຸປະກອນໄຟຟ້າ ຈະຈັດຂຶ້ນ 20-24 ກັນຍານີ້

0
20

ງານສະແດງສິນຄ້າ ດ້ານການກໍ່ສ້າງ, ວັດສະດຸກໍ່ສ້າງ ແລະ ອຸປະກອນໄຟຟ້າຮ່ວມກັນ ເປັນຄັ້ງທຳອິດ ທີ່ຈັດຂຶ້ນໃນນະຄອນຫລວງວຽງຈັນ ທີ່ສູນການຄ້າລາວ ໄອເຕັກ (ຕຶກເກົ່າ) ໂດຍການຮ່ວມມື ລະຫວ່າງສະພາການຄ້າ ແລະ ອຸດສາຫະກຳ ນະຄອນຫລວງວຽງຈັນ ແລະ ກຸ່ມກໍ່ສ້າງ ຕິດຕັ້ງໄຟຟ້າ ເພື່ອກຽມຄວາມພ້ອມ ໃນຍຸກເຊື່ອມໂຍງ ປະຊາຄົມເສດຖະກິດອາຊຽນ AEC ໃນປະຈຸບັນ.
ໃນວັນທີ 11 ກັນຍາ 2017 ທີ່ສະພາການຄ້າ ແລະ ອຸດສາຫະກຳ ນະຄອນຫລວງວຽງຈັນ ໄດ້ຈັດງານຖະແຫລງຂ່າວ ໂດຍການເປັນ ປະທານຂອງທ່ານ ສັງຄົມ ຈັນສຸກ ປະທານສະພາການຄ້າ ແລະ ອຸດສາຫະກຳ ນະຄອນຫລວງວຽງຈັນ, ທ່ານ ມະນີຄອນ ພິລາວັນ ປະທານກຸ່ມບໍລິສັດ ກໍ່ສ້າງ ແລະ ຕິດຕັ້ງໄຟຟ້າ ພ້ອມບັນດາພາກສ່ວນກ່ຽວຂ້ອງເຂົ້າຮ່ວມ.
ທ່ານ ສັງຄົມ ຈັນສຸກ ໄດ້ກ່າວວ່າ: ເພື່ອເປັນການເປີດຕະຫລາດຈຳຫນ່າຍສິນຄ້າ ໃຫ້ແກ່ຫົວຫນ່ວຍທຸລະກິດ ດ້ານການກໍ່ສ້າງ, ວັດສະດຸກໍ່ສ້າງ ແລະ ອຸປະກອນເຄື່ອງໃຊ້ໄຟຟ້າ ໃຫ້ກວ້າງຂວາງ ແລະ ພ້ອມທັງເປັນການ ສົ່ງເສີມຜະລິດຕະພັນສິນຄ້າ ໃຫ້ເຂົ້າເຖິງຜູ້ຊົມໃຊ້ຢ່າງທົ່ວເຖິງ, ເປັນການແລກປ່ຽນ ໂຄສະນາສິນຄ້າ ດ້ານການກໍ່ສ້າງ ແລະ ອຸປະກອນເຄື່ອງໃຊ້ໄຟຟ້າ ອັນເປັນທີ່ຍອມຮັບ ຂອງສັງຄົມ, ສິນຄ້າມີຄຸນນະພາບ ແລະ ສາມາດຕອບສະຫນອງໄດ້ ປະລິມານຕາມຄວາມຕ້ອງການ ຂອງຜູ້ຊົມໃຊ້ ແລະ ເປັນການກະຕູກຊຸກຍູ້ ໃຫ້ຜູ້ຜະລິດ, ຜູ້ປະກອບການ ໄດ້ມີການພັດທະນາດ້ານການຕະຫລາດ ພ້ອມທັງເປັນການສ້າງລາຍຮັບ ແລະ ສ້າງຄວາມເຂັ້ມແຂງໃຫ້ແກ່ຫົວ ຫນ່ວຍທຸລະກິດ ການກໍ່ສ້າງ ແລະ ອຸປະກອນໄຟຟ້າ.
ສຳລັບ ເປົ້າຫມາຍໃນການເຂົ້າຮ່ວມ ຂອງບັນດາຫ້າງຮ້ານ, ບໍລິສັດ ທີ່ມີໃບທະບຽນວິສາຫະກິດ ດ້ານວັດສະດຸກໍ່ສ້າງ ແລະ ເຄື່ອງໃຊ້ໄຟຟ້າ ທີ່ຖືກຕ້ອງຕາມກົດໝາຍພາຍໃນນະຄອນຫລວງ ຈຳນວນ 22 ຫ້ອງ, ບັນດາບໍລິສັດຈາກປະເທດໄທ ຈຳນວນ 17 ຫ້ອງ ລວມທັງຫມົດມີ 39 ບູ໊ດ ທີ່ສູນການຄ້າ ລາວ-ໄອເຕັກ (ຕຶກເກົ່າ) ເຊິ່ງກຳນົດເວລາຈັດງານແມ່ນວັນທີ 20-24 ກັນຍາ 2017 ເວລາ 10:00-22:00 ໂມງ ແລະ ຈະມີພິທີເປີດຢ່າງເປັນທາງການໃນວັນທີ 20 ກັນຍາ 2017 ເວລາ 14:00 ໂມງ

Source: ເສດຖະກິດການຄ້າ