ລອຍນໍ້າພິການລາວ ສົ່ງ 6 ຄົນ ຮ່ວມຊີງໄຊ ໃນອາຊຽນພາຣາເກມ 2017

0
23

ທ່ານ ຜັນມາ ຕຸລິຫົງ ຄູຝຶກທັບນັກກີລາລອຍນໍ້າຄົນພິການລາວ ໃຫ້ຮູ້ວ່າ: ພວກເຮົາພວມຂຸ້ນຂ້ຽວຝຶກຊ້ອມ ມາແລ້ວເກືອບ 2 ເດືອນ ເພື່ອກະກຽມເຂົ້າຮ່ວມການແຂ່ງຂັນ ກີລາອາຊຽນພາລາກຽມ ຄັ້ງທີ 9 ປເທດມາເລເຊຍ ເປັນເຈົ້າພາບ ລະຫວ່າງວັນທີ 17-23 ກັນຍາ 2017 ໂດຍມາຮອດປັດຈຸບັນພວກເຮົາມີຄວາມພ້ອມເຕັມທີ່ ເພື່ອສ້າງຊື່ສຽງໃຫ້ກັບວົງການກີລາລາວກໍຄື ສປປ ລາວອີກຄັ້ງ ເພາະວ່າການເຂົ້າຮ່ວມແຂ່ງຂັນຄັ້ງທີ່ຜ່ານມາກີລາຂອງພວກເຮົາ ກໍ່ສາມາດຍາດໄດ້ຫຼຽນມາໃຫ້ກັບ ສປປ ລາວ.

“ ພວກເຮົາໄດ້ຄັດເລືອກເອົານັກກີລາທີ່ມີປະສົບການ ທີ່ເຄີຍເຂົ້າຮ່ວມການແຂ່ງຂັນລາຍໃນໄລຍະຜ່ານມາ ແລະ ການໄປຄັ້ງນີ້ພວກເຮົາກໍ່ມີຄວາມຫວັງຫຼຽນ ເຊິ່ງສາມາດຄັດເລືອກໄດ້ຈໍານວນ 6 ຄົນທີ່ເປັນຕົວແທນໃຫ້ກັບນັກກີລາລອຍນໍ້າຄົນພິການທີມຊາດລາວ ຄື: ທ້າວ ວອນລະຈິດ ລັດດາໄຊ, ທ້າວ ລໍາພອນ ຕັນດາວົງ, ທ້າວ ໂອລໍາ ໜໍ່ຄໍາ, ທ້າວ ບຸນທໍາ ເພັດດວງໃຈ, ນາງ ບົວລະພາ ຫັດສະດີ ແລະ ນາງ ດອນ ໄຊຍະຈັກ ພາຍຫຼັງທີ່ສໍາເລັດການຄັດເລືອກເອົານັກກີລາ ພວກເຮົາກໍໄດ້ຝຶກຊ້ອມທຸກໆຕອນເຊົ້າ-ແລງ ແຕ່ຈັນ-ສຸກຢູ່ສະໜາມຝຶກຊ້ອມສະລອຍນໍ້ານະຄອນຫລວງວຽງຈັນ ຂ້າງສະໜາມກີລາເຈົ້າອານຸວົງ ” ຄູຝຶກກ່າວ.

ສໍາລັບ ການເຂົ້າຮ່ວມແຂ່ງຂັນຄັ້ງນີ້ ທັບນັກກີລາລອຍນໍ້າຄົນພິການລາວ ຈະສົ່ງທັງໝົດ 25 ລາຍການ ໃນຈໍານວນ 6 ຄົນຄື: ທ້າວ ວອນລະຈິດ ລັດດາໄຊ ເຂົ້າຮ່ວມລອຍທ່າຟີສະຕາຍ 50 ແມັດ, 100 ແມັດ, ລອຍທ່າກົບ 50 ແມັດ ແລະ 100 ແມັດ; ທ້າວ ລໍາພອນ ຕັນດາວົງ ເຂົ້າຮ່ວມລອຍທ່າຟີສະຕາຍ 50 ແມັດ, 100 ແມັດ, 200 ແມັດ ແລະ ລອຍທ່າກົບ 50 ແມັດ; ທ້າວ ໂອລໍາ ໜໍ່ຄໍາເຂົ້າຮ່ວມລອຍທ່າຟີສະຕາຍ 50 ແມັດ, 100 ແມັດ, ລອຍທ່າກົບ 50 ແມັດ ແລະ ທ່າລອຍງາຍ 50 ແມັດ; ທ້າວ ບຸນທໍາ ເພັດດວງໃຈ ເຂົ້າຮ່ວມລອຍທ່າຟີສະຕາຍ 50 ແມັດ, 100 ແມັດ, ລອຍທ່າກົບ 50 ແມັດ ແລະ ທ່າລອຍງາຍ 50 ແມັດ; ນາງ ບົວລະພາ ຫັດສະດີ ເຂົ້າຮ່ວມລອຍທ່າຟີສະຕາຍ 50 ແມັດ, 100 ແມັດ, ລອຍທ່າກົບ 50 ແມັດ ແລະ 100 ແມັດ; ນາງ ດອນ ໄຊຍະຈັກ ເຂົ້າຮ່ວມລອຍທ່າຟີສະຕາຍ 50 ແມັດ, 100 ແມັດ,ລອຍທ່າກົບ 50 ແມັດ ແລະ 100 ແມັດ.

Source: ເສດຖະກິດການຄ້າ