ມາຮູ້ຈັກ 4 ສາວເປຕັງລາວ ເຈົ້າຂອງຫຼຽນຄໍາທີມຊຸດຍິງ ໃນຊີເກມ 2017

0
23

(ນັບຈາກຊ້າຍຫາຂວາ: ນາງ ມິມີ່, ນາງ ຄູນຄໍາ, ນາງ ຈັນສະໝອນ ແລະ ນາງ ຈິນດາວອນ)

ງານມະຫະກໍາກີລາ ຊີເກມ ຄັ້ງທີ 29 ທີ່ປະເທດມາເລເຊຍ ເມື່ອເດືອນສິງຫາ ທີ່ຜ່ານ ເຖິງຈະຈົບໄປແລ້ວ ແຕ່ກິ່ນອາຍຄວາມເຂັ້ມຂຸ້ນຍັງບໍ່ທັນຈືດຈາງໄປໄສ ຫຼັງທັບນັກກີລາລາວ ຄວ້າ 2 ຫຼຽນຄໍາ, 3 ຫຼຽນເງິນ ແລະ 21 ຫຼຽນທອງ ຈັດຢູ່ອັນດັບທີ 9 ຂອງຕາຕະລາງສະຫຼຸບຫຼຽນ ເຖິງວ່າຈະບໍ່ໄດ້ສົມຫວັງດັ່ງໃຈທີ່ຕັ້ງໄວ້ຢ່າງໜ້ອຍ 3 ຫຼຽນຄໍາ ແຕ່ກໍ່ສ້າງຜົນງານດີກວ່າຄັ້ງທີ 28 ທີ່ສິງກະໂປ ເມື່ອປີ 2015 ທີ່ບໍ່ສາມາດຍາດໄດ້ຈັກຫຼຽນຄໍາ.

ໂດຍສະເພາະ ທັບນັກກີລາເປຕັງລາວ ສາມາດພິສິດຫຼຽນຄໍາໄດ້ສໍາເລັດ ຫຼັງເອົາຊະນະເຈົ້າພາບ ມາເລເຊຍ 13-8 ໄດ້ຈາກທີມເປຕັງຊຸດຍິງ ( ປະກອບດ້ວຍ ນາງ ຈັນສະໝອນ ວົງສະຫວັດ, ຄູນຄໍາ ສຸກສະຫວັດ ແລະ ມິມີ່ ວົງສະຫວັດ ແລະ ນາງ ຈິນດາວອນ ສິສະຫວັດ (ຕົວສໍາຮອງ) ເຊິ່ງມື້ນີ້ຈະມາຮູ້ຈັກທັງ 4 ສາວວ່າ ມາແຕ່ໄສກັນແດ່ ແລະ ສ້າງຜົນງານຫຍັງແດ່ ນໍາກັນເລີຍ.

+ນາງ ຈັນສະໝອນ ເກີດເມື່ອວັນທີ 15 ມິຖຸນາ 1992 ທີ່ແຂວງສາລະວັນ ເລົ່າວ່າ: ເລີ່ມຫຼິ້ນເປຕັງຈາກຄອບຄົວເປັນຜູ້ພາຫຼິ້ນ ແລະ ສົ່ງເສີມ ເຊິ່ງປັດຈຸບັນ ເຮັດວຽກຢູ່ ພະແນກສຶກສານທິການ ແລະ ກີລາ ແຂວງສາລະວັນ ຫຼຽນຄໍາຄັ້ງນີ້ເປັນຫຼຽນທີ 3 ໃນຊີເກມ ຫຼັງເຄີຍຍາດໄດ້ 1 ຫຼຽນຄໍາ ໃນຊີເກມ 2007 ທີ່ໄທ, ໄດ້ຫຼຽນທອງ ໃນຊີເກມ 2009 ທີ່ລາວ, ຫຼຽນທອງ ໃນຊີເກມ 2011 ທີ່ອິນໂດເນເຊຍ, ຫຼຽນຄໍາ ໃນຊີເກມ 2013 ທີ່ມຽນມາ ແລະ 2 ຫຼຽນທອງ ໃນຊີເກມ 2015 ທີ່ສິງກະໂປ.

+ນາງ ຄູນຄໍາ ເກີດ ເມື່ອວັນ 30 ຕຸລາ 1988 ທີ່ບ້ານສີໄຄທ່າ ເມືອງສີໂຄດຕະບອງ ນະຄອນຫຼວງວຽງຈັນ ເລົ່າວ່າ: ເລີ່ມຫຼິ້ນເປຕັງມາຕັ້ງແຕ່ປີ 2007 ໂດຍການຊັກຊວນຂອງອາວ ເຊິ່ງປັດຈຸບັນເຮັດອາຊີບຄ້າຂາຍ ແລະ ມີຄວາມໄຝ່ຝັນຢາກເຮັດວຽກນໍາພັກລັດ ໃນອະນາຄົດ ເຊິ່ງຫຼຽນຄໍາຄັ້ງນີ້ ເປັນຫຼຽນຄໍາທໍາອິດ ໃນຊີເກມ ໂດຍທີ່ຜ່ານມາກໍ່ເຄີຍຍາດໄດ້ ຫຼຽນເງິນ ໃນຊີເກມ 2009 ທີ່ສປປ ລາວ ເປັນເຈົ້າພາບ, ຫຼຽນທອງ ຊີເກມ 2011 ທີ່ອິນໂດເນເຊຍ, ຫຼຽນທອງ ຊີເກມ 2013 ທີ່ອິນໂດເນເຊຍ ແລະ ຫຼຽນທອງ ຊີເກມ 2015 ທີ່ສິງກະໂປ.

+ນາງ ມິມີ ເກີດເມື່ອວັນທີ 2 ມິຖຸນາ 1984 ທີ່ບ້ານສາງນໍ້າມັນ ເມືອງປາກເຊ ແຂວງຈໍາປາສັກ ເລົ່າວ່າ: ເລີ່ມຫຼິ້ນກີລາມາຕັ້ງແຕ່ຮຽນ ມ 6 ຈົນຮອດປັດຈຸບັນ ແຕ່ຕອນນັ້ນຫຼິ້ນກີລາແລ່ນ ໄປແຂ່ງຂັນກີລາທີ່ນັກຮຽນທີ່ແຂວງຄໍາມ່ວນ ກ່ອນຫັນມາຫຼິ້ນເປຕັງ ເຊິ່ງການຫຼິ້ນກີລາຊະນິດນີ້ແມ່ນຄວາມມັກສ່ວນຕົວ ປັດຈຸບັນເຮັດວຽກຢູ່ພະແນກສຶກສາທິການ ແລະ ກີລາແຂວງຈໍາປາສັກ ໂດຍຫຼຽນຄໍາຄັ້ງນີ້ເປັນຫຼຽນຄໍາທໍາອິດໃນຊີເກມ ກ່ອນໜ້ານີ້ເຂົ້າຮ່ວມຊີເກມຄັ້ງທໍາອິດຢູ່ທີ່ປະເທດໄທ 2007 ໄດ້ຫຼຽນທອງ ແລະ ຫຼຽນທອງ ໃນຊີເກມ 2009 ທີ່ ສປປ ລາວ.

+ນາງ ຈິນດາວອນ ເກີດເມື່ອວັນທີ 24 ເມສາ 1996 ທີ່ບ້ານປາກດົງ ເມືອງທ່າແຂກ ແຂວງຄໍາມ່ວນ ເລົ່າວ່າ: ເລີ່ມຫຼິ້ນເປຕັງມາຕັ້ງແຕ່ຍັງນ້ອຍໆ ດ້ວຍໃຈຮັກມັກ ແລະ ຫຼິ້ນມາຈົນເຖິງປັດປັດຈຸບັນ ພ້ອມຍັງສຶກສາທີ່ ມະຫາວິທະຍາໄລສະຫວັນນະເຂດ ເຊິ່ງຫຼຽນຄໍາຄັ້ງນີ້ເປັນຫຼຽນຄໍາທໍາອິດ ໃນຊີເກມ ຫຼັງເຄີຍໄປຮ່ວມຊີເກມຄັ້ງທໍາອິດ ທີ່ສິງກະໂປ ເມື່ອປີ 2015 ສາມາດຍາດໄດ້ ຫຼຽນທອງ.

ສໍາລັບ ທີມເປຕັງທີມຊຸດຍິງ ຈະໄດ້ຮັບການຍ້ອງຍໍ ແລະ ລາງວັນເປັນເງິນ ຈາກລັດຖະບານມີຄື: ຫຼຽນຄໍາ ໄດ້ຮັບຫຼຽນໄຊແຮງງານຊັ້ນ 2 ແລະ ລາງວັນເປັນເງິນ 25 ລ້ານກີບ ພ້ອມເງິນອັດສີດ 2,400,000 ກີບ. ຂະນະທີ່ ບໍລິສັດແສງເພັດ ເກັບກູ້ລະເບີດ ອັດສີດ 50 ລ້ານກີບ, ສ່ວນ ບໍລິສັດເບຍລາວຈໍາກັດ ຈະໄດ້ເງິນອັດສີດໃຫ້ເພີ່ມ 8 ລ້ານກີບ.

ນອກນັ້ນ, ຜົນງານໃນຄັ້ງນີ້ຖືເປັນຜົນສໍາເລັດອັນຍິ່ງໃຫຍ່ຂອງ ເປຕັງທີມຊຸດຍິງ ເພາະຍາດຫຼຽນຄໍາຫຼຽນທໍາອິດ ໃຫ້ກັບທັບນັກກີລາລາວ ໃນຊີເກມ 2017 ເຮັດໃຫ້ນັກກີລາມີຂວັນກໍາລັງໃຈ ກ່ອນຈະສາມາດຍາດໄດ້ຫຼຽນຄໍາທີ 2 ຈາກກີລາສະນຸກເກີ ເຮັດໃຫ້ ທັບນັກກີລາຍາດໄດ້ທັງໝົດ 26 ຫຼຽນປະກອບມີ 2 ຫຼຽນຄໍາ, 3 ຫຼຽນເງິນ ແລະ 21 ຫຼຽນທອງ.

 

 

Source: ເສດຖະກິດການຄ້າ