ໂຮງຮຽນບຸນເກີດ ຄາດວ່າປີນີ້ ຈະມີນັກຮຽນເຂົ້າເພີ່ມລວມເກືອບພັນຄົນ

ຈາກຕົວເລກສົກປີຜ່ານມາໂຮງຮຽນບຸນເກີດ ມີນັກຮຽນທັງໝົດ 600 ກວ່າຄົນ ເຊິ່ງປີນີ້ຜ່ານການສັງເກດຕົວເລກການສະໝັກເຂົ້າຮຽນຂອງນັກຮຽນເຫັນວ່າອາດມີຕົວເລກເພີ່ມຂຶ້ນ 100 – 200 ຄົນ.
ມື້ນີ້ເປັນມື້ໄຂສົກຮຽນໃໝ່ຢ່າງເປັນທາງການ ແລະ ເລີ່ມປະຕິບັດໜ້າທີ່ການຮຽນ – ການສອນຢ່າງເປັນປົກກະຕິຂອງບັນດາໂຮງຮຽນທັງພາກລັດ ແລະ ພາກເອກະຊົນໃນນະຄອນຫຼວງວຽງຈັນ ກໍ່ຄືທົ່ວປະເທດ.
ທ່ານ ກູດແກ້ວ ສອນວິຈິດ ຮອງອຳນວຍການໂຮງຮຽນອະນຸບານ – ປະຖົມ – ມັດທະຍົມສົມບູນບຸນເກີດ ໄດ້ໃຫ້ສຳພາດວ່າ: ເນື່ອງໃນໂອກາດວັນເປີດສົກຮຽນໃໝ່ນີ້ຖືວ່າເປັນວັນທີ່ມີ ຄວາມໝາຍຄວາມສຳຄັນຕໍ່ກັບນັກຮຽນ – ນັກສຶກສາຂອງພວກເຮົາ. ສະນັ້ນ, ການເປີດສົກຮຽນໃໝ່ນີ້ຈຶ່ງຢາກຮຽກຮ້ອງໃຫ້ທຸກພາກສ່ວນບໍ່ວ່າຈະເປັນພະນັກງານ, ອຳນາດການປົກຄອງບ້ານ, ເມືອງ, ແຂວງໃຫ້ມີສ່ວນຮ່ວມໃນການເປັນເຈົ້າການນໍາກັນ. ຄຽງຄູກັນນັ້ນ, ພໍ່ແມ່ຜູ້ປົກຄອງ, ນ້ອງນັກຮຽນ – ນັກສຶກສາກໍ່ໃຫ້ກະກຽມອຸປະກອນການຮຽນຕ່າງໆເພື່ອເອື້ອອຳນວຍໃຫ້ນ້ອງນັກຮຽນ, ສົມທົບກັບບັນດາໂຮງຮຽນແຕ່ລະແຫ່ງ ໂດຍສະເພາະແມ່ນໂຮງຮຽນບຸນເກີດ ໄດ້ມີການກະກຽມພະນັກງານຄູ – ອາຈານ, ປຶ້ມຕຳລາຮຽນ ແລະ ອາຄານສະຖານທີ່ເພື່ອຮອງຮັບນັກຮຽນ – ນັກສຶກສາໃນສົກຮຽນໃໝ່ນີ້ເປັນທີ່ຮຽບຮ້ອຍ; ບັນດາຄູ – ອາຈານໄດ້ເອົາໃຈໃສ່ຕິດຕາມການຈັດຕັ້ງປະຕິບັດກົດລະບຽບ, ການແຕ່ງບົດສອນ, ການວາງແຜນແບ່ງເປັນຈຸງານ, ໜ່ວຍງານເພື່ອຮອງຮັບນັກຮຽນໃນສົກຮຽນໃໝ່ທີ່ເນັ້ນການຮຽນ – ການສອນໃຫ້ມີຄຸນນະພາບຂຶ້ນ. ໃນນັ້ນ, ພວກເຮົາຈະມີການຕິດຕາມນັກຮຽນເປັນບຸກຄົນ, ຊຸກຍູ້ສົ່ງເສີມໃຫ້ນັກຮຽນດີນັກຮຽນເກັ່ງຄຽງຄູ່ກັບການເນັ້ນການຍົກລະດັບໃຫ້ບັນດາ ຄູ – ອາຈານມີຄຸນນະພາບສູງຂຶ້ນ.

ທ່ານ ກູດແກ້ວ ສອນວິຈິດ

ສົກຮຽນໃໝ່ນີ້ທາງໂຮງຮຽນສືບຕໍ່ຈັດຕັ້ງປະຕິບັດທາງດ້ານຫຼັກສູດການຮຽນ – ການສອນ ຖືເອົາຫຼັກສູດຂອງກະຊວງສຶກສາທິການ ແລະ ກີລາເປັນຫຼັກ ພ້ອມທັງມີວິຊາພາສາອັງກິດ, ພາສາຈີນ ແລະ ຄອມພິວເຕີພື້ນຖານເຂົ້າຕື່ມ ໂດຍສິດສອນແຕ່ຊັ້ນ ປ 1 ເຖິງຊັ້ນ ມ 7. ນອກຈາກນັ້ນ, ຍັງມີກິດຈະກຳຕ່າງໆ ເຊັ່ນ: ຂະບວນກາຍະກຳ, ວິຈິດຕະກຳ, ສິລະປະກຳ, ທັດສະນະສຶກສາເຂົ້າໃນພາກຮຽນເພື່ອໃຫ້ນັກຮຽນຮ່ວມມ່ວນຊື່ນກັບກິດຈະກໍາຕ່າງໆໃນແຕ່ລະລຸ້ນ ເລີ່ມແຕ່ອາຍຸ 10 – 19 ປີ.
ທາງໂຮງຮຽນຍັງໄດ້ປັບປຸງ ແລະ ສ້ອມແປງສິ່ງທີ່ອຳນວຍຄວາມສະດວກຫຼາຍດ້ານ ເຊັ່ນ: ມີການປັບປຸງທາງດ້ານອາຄານ, ຫ້ອງນ້ຳ, ປຶ້ມຕຳລາ, ການຮຽນ – ການສອນ ແລະ ກີລາຕ່າງໆເພື່ອໃຫ້ນັກຮຽນໄດ້ຮຽນ ແລະ ເຮັດກິດຈະກຳໄປນຳຈຶ່ງຈະຕິດພັນກັບໂຮງຮຽນຫຼາຍຂຶ້ນ. ນອກຈາກນັ້ນ, ກໍ່ໄດ້ຫັນມາປັບປຸງໂຮງຮຽນກິນນອນປະຈຳທີ່ເປັນອາຄານຫໍພັກ ( ຍິງ – ຊາຍ ), ຫໍພັກຄູ – ອາຈານເພື່ອຮອງຮັບນັກຮຽນໃນນະຄອນຫຼວງວຽງຈັນ ກໍ່ຄືຕ່າງແຂວງ ເຊິ່ງສົກຮຽນຜ່ານມານີ້ມີນັກຮຽນຢູ່ຫໍພັກທັງໝົດ 58 ຄົນ ຍິງ 8 ຄົນ, ສົກຮຽນນີ້ຄາດວ່າຈະມີນັກຮຽນຢູ່ຫໍພັກເພີ່ມຂຶ້ນຈາກປີຜ່ານມາ.
ທ່ານໃຫ້ຮູ້ອີກວ່າ: ໃນສົກຮຽນ 2016 – 2017 ຜ່ານມານີ້ ມີນັກຮຽນທັງໝົດຈຳນວນ 676 ຄົນ ຍິງ 260 ຄົນ; ຊັ້ນອະນຸບານມີ 8 ຫ້ອງ ມີນັກຮຽນທັງໝົດ 148 ຄົນ ຍິງ 67 ຄົນ; ຊັ້ນປະຖົມມີ 89 ຫ້ອງ ມີນັກຮຽນທັງໝົດ 188 ຄົນ ຍິງ 81 ຄົນ ແລະ ຊັ້ນມັດທະຍົມມີ 14 ຫ້ອງ ມີນັກຮຽນທັງໝົດ 340 ຄົນ ຍິງ112 ຄົນ. ສໍາລັບພະນັກງານຄູ – ອາຈານມີທັງໝົດ 96 ທ່ານ, ຄູສອນປະຈຳ 58 ທ່ານ ຍິງ 35 ທ່ານ; ຂັ້ນປະລິນຍາເອກ 1 ທ່ານ, ຂັ້ນປະລິນຍາໂທ 2 ທ່ານ, ປະລິນຍາຕີ 23 ທ່ານ, ຊັ້ນສູງ 18 ທ່ານ, ຊັ້ນກາງ 14 ທ່ານ ແລະ ຄູຕ່າງປະເທດ 6 ທ່ານ.
ສຳລັບສົກຮຽນ 2017 – 2018 ນີ້ ຄາດວ່າຈະມີນັກຮຽນເພີ່ມຂຶ້ນຈາກປີຜ່ານມາ 100 – 200 ຄົນ ຕາມການຕິດຕາມໂຕເລກທີ່ນັກຮຽນມາລົງທະບຽນຕັ້ງແຕ່ວັນທີ 28 ສິງຫາ ເປັນຕົ້ນມາ ເຫັນວ່າມີນັກຮຽນເພີ່ມຂຶ້ນ.
ໂອກາດນີ້ທ່ານຜູ້ອຳນວຍການຍັງໄດ້ຝາກເຖິງນັກຮຽນ ແລະ ຜູ້ປົກຄອງຂອງນັກຮຽນຂໍໃຫ້ຮ່ວມມືນຳໂຮງຮຽນເບິ່ງລູກສອນຫຼານ ແລະ ຊ່ວຍກັນຕິດຕາມເບິ່ງພຶດຕິກຳຕ່າງໆຂອງລູກຕົນເອງໃນການຮ່ຳຮຽນ, ໃຫ້ຄວາມໃກ້ຊິດຕິດແທດເຮັດໃຫ້ລູກຫຼານຫັນມາໃສ່ໃຈການຮ່ຳຮຽນໃຫ້ຫຼາຍຂຶ້ນ.
ໂຮງຮຽນອະນຸບານ – ປະຖົມ – ມັດທະຍົມສົມບູນບຸນເກີດ ຕັ້ງຢູ່ບ້ານໄຊມຸງຄຸນ ເມືອງນາຊາຍທອງ ນະຄອນຫຼວງວຽງຈັນ.

 

Source: ເສດຖະກິດການຄ້າ

Related News

Leave a Reply

[bsa_pro_ad_space id=8]