ຮູ້ກັນເສົານີ້!ໃຜຈະຖືກເລືອກເປັນ ນາງສາວກະສິກອນລາວ

0
19

ລະຫວ່າງວັນທີ 1 – 9 ກັນຍາ ທີ່ສູນການຄ້າສີໄຄພລາຊາ  ໄດ້ມີງານວາງສະແດງສິນຄ້າກະສິກອນ  ເຊິ່ງມີສິນຄ້າບໍລິໂພກ-ອຸປະໂພກ, ທີ່ລະນຶກ, ເຄື່ອງຈັກທາງການກະເສດ, ພືກຜັກ-ໝາກ ໄມ້ຕ່າງໆລວມເກືອບ 100 ຮ້ານເຂົ້າຮ່ວມວາງສະແດງ ພ້ອມດຽວກັນຍັງມີງານປະກວດນາງງາມຊາວກະສິກອນລາວ ໂດຍຮອບຕັດສິນຈະຈັດຂຶ້ນໃນຕອນຄໍ່າຂອງວັນທີ 9 ກັນຍາຈະມາເຖິງນີ້.

ໃນຕອນບ່າຍວັນທີ 5 ກັນຍາ ຜ່ານມາທີ່ສູນການຄ້າ ສີໄຄ ພລາຊາ  ເມືອງສີໂຄດຕະບອງ ນະຄອນຫຼວງວຽງຈັນ ໄດ້ມີງານເປີດໂຕ 20 ນ້ອງນາງສາວ ກະສິກອນລາວ 2017 ເປັນທີ່ຮຽບຮ້ອຍແລ້ວກ່ອນທີ່ຈະກ້າວສູ່ເວທີການຕັດສິນໃນທ້າຍອາທິດນີ້ ໂດຍການເຂົ້າຮ່ວມຂອງທ່ານ ໂສພາ ອິນທະວົງສາ ຫົວໜ້າຂະແໜງບໍລິຫານ ວາລະສານວັນນະສິນ ທັງເປັນຮອງປະທານສະໂມສອນວັດທະນະທໍາສິນໄຊ, ທ່ານ ບຸນຫົງ ທໍາມະວົງ ປະທານບໍລິສັດ BCI ຮອງອໍານວຍການ ST ເມືອງໄທປະກັນໄພ ທັງເປັນຜູ້ບໍລິຫານສູນການຄ້າ ສີໄຄ ພລາຊາ  ພ້ອມດ້ວຍ ພາກສ່ວນທີ່ກ່ຽວຂ້ອງ.

ທ່ານ ບຸນຫົງ ທໍາມະວົງ ກ່າວວ່າ: ການຈັດງານວາງສະແດງສິນຄ້າກະສິກອນລາວປະຈໍາປີ 2017 ນີ້ ແມ່ນພວກເຮົາໄດ້ຈັດຂຶ້ນລະຫວ່າງວັນທີ 1-9 ກັນຍາ ແລະ ມີງານປະກວດນາງສາວກະສິກອນ ລາວໄປພ້ອມໆກັນ ເຊິ່ງເປັນງານສະແດງສິນຄ້າຕະຫຼາດກະສິກອນລາວຄັ້ງທໍາອິດ ທີ່ຈັດຂຶ້ນໃນສູນການຄ້າສີໄຄ ພລາຊາ ເພື່ອເປັນການສົ່ງເສີມ, ພັດທະນາຜະລິດຕະພັນກະສິກໍາລາວໃຫ້ເປັນທີ່ຍອມຮັບຈາກສັງຄົມລາວ ແລະ ສາກົນ. ພ້ອມດຽວກັນນີ້, ຍັງເປັນການເປີດໂອກາດໃຫ້ແກ່ຊາວກະສິກອນ ໄດ້ມີພື້ນທີ່ຈັດສະແດງ ແລະ ຈໍາໜ່າຍ ເຄື່ອງຜະລິດຕະພັນຕົນເອງອອກສູ່ສາຍຕາສັງຄົມໃນວົງກວ້າງຂວາງທີ່ເປັນຊ່ອງທາງສໍາຄັນໃນການເຊື່ອມໂຍງການຕະຫຼາດຈາກຜູ້ຜະລິດສູ່ບໍລິໂພກໂດຍກົງ ເຊິ່ງພວກເຮົາມີຜູ້ສະໜັບໜູນມາຈາກຫຼາຍພາກສ່ວນເຊັ່ນ: ເອສທີເມືອງໄທປະກັນໄພ, ສວນພຶກສາ, ວີຟິດເນັດ, ນໍ້າດື່ມຫົວເສືອ, ອີທີເອວ, ສະກາຍເທລະຄອມ, ລົດກະບະນິສສັນ, ຮ້ານແຕ້ມຜ້າຝ້າຍ, ສວນຈໍາປາມຸງຄຸນ, ເຈເຈແຟຊັນ ແລະ ພາກສ່ວນອື່ນໆ. ສ່ວນ 20 ນ້ອງນາງສາວນີ້ ແມ່ນຜ່ານການຄັດເລືອກຈາກຈໍານວນຫຼາຍສິບຄົນທີ່ ເຂົ້າສະໝັກ ແລະ ພວກເຂົາລ້ວນແລ້ວແຕ່ນອນໃນເງື່ອນໄຂທີ່ກໍານົດໄວ້ ເຊິ່ງຈະໄດ້ມີການຕັດສິນຜູ້ຊະ ນະເລີດໃນວັນທີ 9 ກັນຍາ 2017 ນີ້.

ທ່ານ ໂສພາ ອິນທະວົງສາ ໃຫ້ຮູ້ຕື່ມວ່າ: ການຈັດປະກວດນາງສາວກະສິກອນລາວ 2017 ຄັ້ງນີ້ ແມ່ນເຮັດໃຫ້ມີບັນຍາກາດເບີກບານມ່ວນຊື່ນ ແລະ ເປັນເວທີສົ່ງເສີມຄວາມສາມາດຂອງນ້ອງໆນາງສາວ ທີ່ເປັນການຝຶກອົບຮົມຕ່າງໆໂດຍມີການຄັດເລືອກມາແຕ່ເດືອນສິງຫາຜ່ານມາ.

ງານປະກວດດັ່ງກ່າວຈະເລີ່ມແຕ່ເວລາ 16:00 ໂມງເປັນຕົ້ນໄປ ໂດຍຈະມີລາງວັນຊະນະເລີດ, ຮອງຊະນະເລີດອັນດັບ 1 ແລະ 2 ຕາມດ້ວຍລາງວັນຂວັນໃຈສື່ມວນຊົນ, ຂວັນໃຈຊ່າງພາບ, ນາງສາວ ມິດຕະພາບ ແລະ ລາງວັນບຸກຄະລິກກະພາບດີ.


Source: ເສດຖະກິດການຄ້າ