ເປີດໂຕເກຍຣີໂອ ລຸ້ນໃໝ່ ມາພ້ອມຄວາມຫຼູຫຼາໂດດເດັ່ນ

0
27

ຕະຫຼາດລົດໃນລາວ ໄລຍະນີ້ຖືວ່າຄຶກຄັກເພາະພຽງ 2 ອາທິດ ກໍ່ມີການເປີດໂຕລົດໃໝ່ກັນເຖິງ 3 ຄ້າຍ, ຫຼ້າສຸດ ບໍລິສັດ ໂຄລາວ ໄດ້ຈັດພິທີເປີດໂຕລົດໃໝ່ນັ້ນຄື ເກຍ ຣີໂອ ລຸ້ນໃໝ່ ( KIA All – New RIO ) ພັດທະນາມາຈາກລຸ້ນເກົ່າທີ່ໄດ້ຮັບຄວາມນິຍົມມາກ່ອນແລ້ວໃຫ້ກັບມາໂດດເດັ່ນອີກຄັ້ງ.

ເກຍຣີໂອລຸ້ນໃໝ່ ອອກແບບມາໃຫ້ເປັນທີ່ຈັບຈ້ອງຂອງທຸກສາຍຕາ ແລະ ຄຸນລັກສະນະພິເສດອັນໂດດເດັ່ນອີກຫຼາກຫຼາຍ, ເປັນຕົ້ນແມ່ນລົດເກັ໋ງແຮັດສ໌ແບັກ 5 ປະຕູ ໃໝ່ຫຼ້າສຸດໃນສາຍຂະບວນການຜະລິດຂອງວົງການລົດລະດັບໂລກເຊັ່ນ ເກຍ ມໍເຕີ.

ລົດເກັ໋ງອະເນກປະສົງ ເກຍ ຣີໂອ ລຸ້ນນີ້ເປັນລຸ້ນທີ 4 ຈະນໍາມາເຊິ່ງຄວາມປະສົມປະສານອັນໜ້າຕື່ນເຕັ້ນຂອງອັດຕາການປະຢັດນໍ້າມັນແບບເຕັມພິກັດ, ນະວັດຕະກຳທາງດ້ານເຕັກໂນໂລຊີ, ລະບົບຄວາມປອດໄພທີ່ລໍ້າສະໄໝ, ພ້ອມດ້ວຍຄວາມສະໜຸກສະໜານ ແລະ ສະດວກສະບາຍໃນທຸກການຂັບຂີ່ສູ່ກຸ່ມລູກຄ້າທີ່ມີຄວາມນິຍົມ ແລະ ກຳລັງຊອກຫາເພື່ອເປັນເຈົ້າຂອງໃນເວລາທີ່ເຂົ້າມາຢ້ຽມຢາມຫ້ອງຂາຍໃນປາຍປີນີ້.

ລົດຣີໂອ ນີ້ ຖືເປັນໜຶ່ງລຸ້ນທີ່ຕິດອັນດັບຂາຍດີຂອງເກຍທົ່ວໂລກ ເຊິ່ງຕ້ອງມອບລາງວັນໃຫ້ກັບລຸ້ນທີ 3 ທີ່ໄດ້ມີການຜະລິດອອກມາສູ່ຕະຫຼາດ ແລະ ເປັນລຸ້ນທີ່ສາມາດຊຸກຍູ້ໃນການສ້າງຊື່ຂອງລົດສັນຊາດ ສ.ເກົາຫຼີ ໃນອີກລະດັບໜຶ່ງຂອງໂລກ, ສາມາດບັນລຸຍອດຂາຍໄດ້ເຖິງ 450,000 ຄັນທົ່ວໂລກ ໃນປີ 2016 ຄິດເປັນ 15% ຂອງຍອດຂາຍປະຈໍາປີຂອງເກຍ.

ເກຍ ຣີໂອ ລຸ້ນທີ 4 ໃໝ່ຫຼ້າສຸດໄດ້ຮັບລາງວັນອັນຊົງກຽດລະດັບນາໆຊາດມາແລ້ວ ເຊັ່ນ: iF Product Design Award ແລະ Red Dot Design Award, ເຊິ່ງນັ້ນໄດ້ສະແດງໃຫ້ເຫັນເຖິງສັກກະຍະພາບຂອງຄວາມພ້ອມທີ່ຈະທະຍານອອກສູ່ຖະໜົນຕະຫຼາດລົດຂອງໂລກໄດ້ເປັນຢ່າງດີ ແລະ ທັງໝົດນີ້ເອງທີ່ເປັນຈຸດເດັ່ນຂອງການຜະລິດລົດ ຣີໂອ ໃໝ່ຫຼ້າສຸດນີ້. ນອກນັ້ນ, ຍັງໄດ້ມີການອອກແບບມາເພື່ອຕອບທຸກໂຈດຄວາມຕ້ອງການ ແລະ ຄວາມໃຝ່ຝັນຂອງຜູ້ຊື້ໄດ້ເປັນຢ່າງດີ.

ທ່ານ ໜູໄຊ ແຫວນສະຫວັນ ຜູ້ອຳນວຍການ ແລະ ບໍລິຫານຝ່າຍຂາຍ ບໍລິສັດ ໂຄລາວ ດິວີລົບພິງ ຈຳກັດ ໄດ້ກ່າວວ່າ: All – New RIO ນີ້ ມີຄວາມຄ່ອງຕົວໝັ້ນໃຈຢ່າງຮອບດ້ານແບບທີ່ທຸກສາຍຕາຕ້ອງຈັບຈ້ອງຢ່າງຫຼົງໄຫຼທີ່ມາພ້ອມກັບລະບົບຄວາມປອດໄພແບບເທົ່າຕົວ ແລະ ການອອກແບບພາຍໃນທີ່ມີຄວາມທັນສະໄໝ.

ລາຍລະອຽດເພີ່ມຕື່ມຂອງ All – New RIO ປະກອບມີ

▶ ການອອກແບບພາຍນອກ/ພາຍໃນ ແລະ ການໃຊ້ງານທີ່ແຕກຕ່າງກັບລຸ້ນທີ່ຜ່ານມາ ເຊັ່ນ: ຮູບຊົງ ແລະ ລໍ້ແມັກເປັນແບບອັນລອຍ ເບິ່ງແລ້ວໂດດເດັ່ນ ຂະໜາດ 17 ນິ້ວ.

 

▶ ເພີ່ມຄວາມກວ້າງຂວາງໃຫ້ຫ້ອງເກັບເຄື່ອງ ເຊິ່ງສາມາດປັບໄດ້ຕາມການໃຊ້ງານ ພ້ອມດ້ວຍພື້ນທີ່ດ້ານຫຼັງອັນກວ້າງຂວາງ ແລະ ຕົວໂຄງທີ່ສູງຂຶ້ນ ເຊິ່ງເພີ່ມຄວາມສາມາດໃນການບັນຈຸໄດ້ສູງສຸດເຖິງ 325 ລິດ ( ເພີ່ມຈາກລຸ້ນກ່ອນ 37 ລິດ ).

 

▶ ຄວາມປອດໄພ ແລະ ການຂັບຂີ່ແບບປະຢັດ ເຊັ່ນ: ເພີ່ມຄວາມແຂງແກ່ນຂອງໂຕຖັງ 51% AHSS ດ້ວຍການພັດທະນາຄວາມແຂງແຮງຂອງເຫຼັກ ( AHSS ), ລະບົບໄຟລ້ຽວຕາມທິດທາງ ແລະ ທີ່ສຳຄັນປະຢັດນໍ້າມັນດ້ວຍອັດຕາກິນນໍ້າມັນ 20 km/ລິດ ( 15.6 km/RIO ລຸ້ນກ່ອນ ).

 

▶ ລາຄາເລີ່ມຕົ້ນຢູ່ທີ່ 19,000 ໂດລາ ພິເສດ ສັ່ງຈອງ ຫຼື ຊື້ໄລຍະນີ້ຮັບສ່ວນຫຼຸດທັນທີ 2,000 ໂດລາ.

ສາວ ຕົ້ນຄຳ ພົນຈັນເຮືອງ ( ເຈນນີ້ ) Miss World Laos 2017 ໃຫ້ສຳພາດວ່າ: “ ທຳອິດບອກໄດ້ເລີຍວ່າພຽງແຕ່ເຫັນວິດີໂອໂຄສະນາເຊື້ອເຊີນໃຫ້ມາເປັນນາງແບບໃນມື້ນີ້ ເຈນ ກໍ່ຕັດສິນໃຈທັນທີແບບບໍ່ໄດ້ຄິດດົນເລີຍ ເພາະພໍແຕ່ເຫັນກໍ່ຫຼົງມັກແລ້ວ ແຕ່ເມື່ອໄດ້ມາລອງນັ່ງ, ລອງຈັບ, ລອງສຳຜັດດ້ວຍຕົວເອງແລ້ວ ບໍ່ພຽງແຕ່ມັກແຕ່ຮັກເລີຍ… ຄວາມຮູ້ສຶກນີ້ແບບວ່າແມ່ນອີ່ຫຼີ ນີ້ແຫຼະທີ່ເໝາະກັບບຸກຄະລິກຂອງ ເຈນ ເປັນທີ່ສຸດ ການອອກແບບບໍ່ວ່າຈະເປັນທັງພາຍໃນ ແລະ ພາຍນອກກໍ່ຮູ້ສຶກວ່າລົງຕົວສຸດໆ ບໍ່ເສຍໃຈເລີຍທີ່ ເຈນ ຕັດສິນໃຈມາໃນຄືນນີ້ ”.

ທ່ານ ທົດສະພອນ ສິດພະໄຊ ( ອຸງ ) Mister National Universe Laos “ ສຳລັບ ອຸງ ແລ້ວ ຄວາມສຳຜັດໄດ້ນີ້ແມ່ນບໍ່ໄດ້ຕ່າງຈາກ ເຈນ ເລີຍ ແຕ່ທີ່ມີມາເພີ່ມກໍ່ຄືຮູ້ສຶກໄດ້ເຖິງຄວາມແຂງແກ່ນ, ມີຮູບແບບແລະ ກິ່ນອາຍຈາກຢູໂຣບ ອີກ ບອກໄດ້ເລີຍວ່າເພິ່ນຈັດເຕັມມາອີ່ຫຼີ ແຖມການອອກແບບມາໃຫ້ເປັນຮູບແແບບທີ່ທັນສະໄໝເໝາະກັບ ອຸງ ທີ່ສຸດ ເພາະ ອຸງ ເປັນຄົນທີ່ມີຄວາມກະຕືລືລົ້ນ ແລະ ຊອກຫາກິດຈະກຳໃໝ່ໆເຮັດຢູ່ຕະຫຼອດເວລາບໍ່ເຄີຍຢຸດນິ້ງເລີຍ ”.

ພິທີເປີດໂຕ All – New RIO ໄດ້ຈັດຂຶ້ນໃນວັນທີ 1 ກັນຍາ ຜ່ານມາ ທີ່ຫ້ອງຂາຍ ເກຍ ໂອໂຕຊິຕີ້ ຖະໜົນເຕ 2 ເມືອງສີໂຄດຕະບອງ ນະຄອນຫຼວງວຽງຈັນ ໂດຍການເຂົ້າຮ່ວມເປັນປະທານຂອງ ທ່ານ ນາງ ຖາວອນ ວົງສົມບັດ ປະທານ ບໍລິສັດ ໂຄລາວ ດີວີລົບພິງ ຈໍາກັດ ພ້ອມດ້ວຍ ທ່ານຮອງປະທານ, ຜູ້ບໍລິຫານລະດັບສູງຂອງກຸ່ມ ບໍລິສັດ ໂຄລາວ ແລະ ແຂກຖືກເຊີນເຂົ້າຮ່ວມ.

Source: ເສດຖະກິດການຄ້າ