ປ່ຽນພະລັງສື່ສັງຄົມອອນລາຍໃຫ້ເກີດຜົນດີຕໍ່ການເຮັດວຽກ

0
7

ສື່ສັງຄົມອອນລາຍ Social Media ທັງຫຼາຍກຳລັງຢູ່ໃນກະແສ ແລະ ເຂົ້າມາມີບົດບາດກັບການດຳລົງຊີວິດຂອງຄົນໃນຍຸກໃໝ່ຢ່າງແຍກບໍ່ອອກ ເຊິ່ງນອກຈາກຄວາມບັນເທີງທີ່ໄດ້ຮັບຈາກສັງຄົມອອນລາຍກໍ່ຍັງມີບົດບາດກັບການເຮັດວຽກໃນອົງກອນທີ່ເລີ່ມເຫັນແຈ້ງເປັນຮູບປະທຳຫຼາຍຂຶ້ນ ເພາະສື່ສັງຄົມອອນລາຍຍຸກນີ້ບໍ່ໄດ້ມາຫຼິ້ນໆຄືແຕ່ກ່ອນ, ແຕ່ກຳລັງຈະກາຍເປັນເຄື່ອງມືທີ່ຊ່ວຍອຳນວຍ ຄວາມສະດວກໃຫ້ຄົນເຮັດວຽກຫຼາຍຂຶ້ນເປັນລຳດັບ.

ໃນເມື່ອສື່ສັງຄົມອອນລາຍເປັນສິ່ງທີ່ທຸກຄົນໃນສັງຄົມໃຫ້ຄວາມສົນໃຈອົງກອນກໍ່ບໍ່ຄວນເບິ່ງຂ້າມ ແລະ ຄວນຫັນມາເລືອກໃຊ້ປະໂຫຍດຂອງສື່ສັງຄົມອອນລາຍໃຫ້ເກີດປະສິດທິພາບສູງສຸດໃນການເຮັດວຽກ, ເມື່ອພະນັກງານສ່ວນໃຫຍ່ຕ່າງກໍ່ຮູ້ຈັກ ແລະ ໃຊ້ງານສື່ເຫຼົ່ານີ້ກັນເປັນຢ່າງດີຢູ່ແລ້ວບໍ່ວ່າຈະເປັນ         ເຟສບຸ໊ກ ( Facebook ), ອິນສະຕາແກຣມ ( Instagram ), ລາຍ ( Line ), ທະວິດເຕີ ( Twitter ), ວັອດສແອັບ ( Whatsapp ) ແລະ ອື່ນໆກໍ່ໃຫ້ອົງກອນປັບປ່ຽນວິທີການເຮັດວຽກໃໝ່ໃຫ້ເຂົ້າກັບສິ່ງເຫຼົ່ານີ້ ໂດຍນຳເອົາສື່ອອນລາຍມາເປັນສ່ວນໜຶ່ງຂອງການເຮັດວຽກ ເພາະຈະເຮັດໃຫ້ມີຜົນດີຕໍ່ວຽກ ແລະ ອົງກອນປັບປ່ຽນວິທີການເຮັດວຽກໃໝ່ດ້ວຍການນຳໃຊ້ສື່ສັງຄົມອອນລາຍມາເປັນສ່ວນໜຶ່ງຂອງການເຮັດວຽກກໍ່ໜ້າຈະເກີດຜົນດີຕໍ່ວຽກ ແລະ ອົງກອນໄດ້ເປັນຢ່າງດີ ເປັນຕົ້ນແມ່ນ:

+ ໃຊ້ຕິດຕໍ່ສື່ສານ ແລະ ເຮັດວຽກ: ສ່ວນໃຫຍ່ທຸກຄົນກໍ່ມັກຈະໃຊ້ສື່ສັງຄົມອອນລາຍກັນໃນຊີວິດປະຈຳວັນຢູ່ແລ້ວ ແລະ ຄົງຈະບໍ່ແປກຫາກການຕິດຕໍ່ສື່ສານກັນເລື່ອງວຽກຈະຖືກປັບປ່ຽນຈາກການສົ່ງອີເມວ ຫຼື ໂທລະສັບລົມກັນມາເປັນການເຮັດວຽກຜ່ານສື່ສັງຄົມອອນລາຍ ເຊັ່ນ: ເຟສບຸ໊ກ ( Facebook ), ອິນສະຕາແກຣມ ( Instagram ), ລາຍ ( Line ), ທະວິດເຕີ ( Twitter ), ວັອດສແອັບ ( Whatsapp ) ເປັນຕົ້ນ ເພາະທັງສະດວກ, ວ່ອງໄວ, ຕິດຕາມຄວາມເຄື່ອນໄຫວໄດ້ ແຖມຍັງມີສະພາບຄ່ອງຕົວເປັນຢ່າງດີ.

+ ໃຊ້ປະຊຸມວຽກລະດົມສະໝອງ: ແຫກກົດໃນຮູບແບບການປະຊຸມແບບເກົ່າໆ ໂດຍສະເພາະອົງກອນທີ່ມີສຳນັກງານຫຼາຍແຫ່ງ ແລະ ຢູ່ໄກກັນ ເພາະໄລຍະທາງຈະບໍ່ເປັນບັນຫາ ຫຼື ອຸປະສັກອີກຕໍ່ໄປເມື່ອມີສື່ສັງຄົມອອນລາຍເປັນສື່ກາງໃນການປະຊຸມ, ພົບປະໂອ້ລົມ, ປະສານງານ ແລະ ລະດົມສະໝອງ ເຊິ່ງຈະຊ່ວຍໃຫ້ອົງກອນປະຢັດຄ່າໃຊ້ຈ່າຍໃນການຈັດກອງປະຊຸມ ແລະ ພະນັກງານກໍ່ບໍ່ຕ້ອງເສຍເວລາໃນການເດີນທາງອີກ.

+ ໃຊ້ບັນທຶກຂໍ້ມູນທີ່ເປັນປະໂຫຍດ: ສື່ສັງຄົມອອນລາຍສາມາດຊ່ວຍໄດ້ໃນການບັນທຶກຂໍ້ມູນທີ່ເປັນປະໂຫຍດຕໍ່ການເຮັດວຽກທັງຫຼາຍ ບໍ່ວ່າຈະເປັນລາຍງານຕ່າງໆ ຫຼື ບັນທຶກການສັ່ງວຽກຂອງຫົວໜ້າໄດ້ ເຊິ່ງຫາກສັ່ງພຽງຄຳເວົ້າແບບເກົ່າໆຜູ້ຮັບຄຳສັ່ງກໍ່ອາດຈະຫຼົງລືມໄປໄດ້ເຊັ່ນດຽວກັນ. ດັ່ງນັ້ນ, ສື່ສັງຄົມອອນລາຍຈະເປັນຕົວຊ່ວຍໃຫ້ຜູ້ຮັບຄຳສັ່ງຈົດຈຳຄຳສັ່ງໄດ້ດີຍິ່ງຂຶ້ນ, ວຽກກໍ່ບໍ່ສະດຸດ ແລະ ສາມາດເດີນໜ້າໄປໄດ້ດີ.

+ ໃຊ້ສົ່ງຕໍ່ ຫຼື ແບ່ງປັນຂໍ້ມູນທີ່ເປັນປະໂຫຍດຕໍ່ການເຮັດວຽກ: ຂໍ້ມູນທີ່ມີປະໂຫຍດຕໍ່ການເຮັດວຽກທີ່ໜ້າສົ່ງຕໍ່ ຫຼື ແບ່ງປັນໃຫ້ກັບພະນັກງານລ້ວນມີທີ່ມາຈາກສື່ສັງຄົມອອນລາຍເປັນສ່ວນໃຫຍ່ ເຊິ່ງເປັນການເພີ່ມຄຸນຄ່າຂອງສື່ສັງຄົມອອນລາຍໃນການເຮັດວຽກ, ຊ່ວຍໃຫ້ບັນຍາກາດການເຮັດວຽກຕໍ່ຍອດໄປສູ່ອົງກອນແຫ່ງການຮຽນຮູ້ ແລະ ພະນັກງານທຸກຄົນກໍ່ສາມາດເຂົ້າເຖິງຂໍ້ມູນ – ຂ່າວສານໄດ້ຢ່າງສະດວກ ແລະ ອາດນຳໄປສູ່ການລົງມືປະຕິບັດ ແລະ ພັດທະນາຕົນເອງໃນການເຮັດວຽກໄດ້ໃນທີ່ສຸດ.

+ ໃຊ້ເປັນຕົວສ້າງ ແລະ ເຊື່ອມຄວາມສຳພັນພາຍໃນອົງກອນ: ການໃຊ້ສື່ສັງຄົມອອນລາຍໃນສະຖານທີ່ເຮັດວຽກໃຫ້ມີປະສິດທິພາບໄດ້ອີກທາງໜຶ່ງ ກໍ່ຄືການໃຊ້ກຸ່ມໃນເຟສບຸ໊ກ, ລາຍ, ວັອດສແອັບ… ເພື່ອສ້າງຄວາມເປັນອັນໜຶ່ງອັນດຽວກັນ ແລະ ຄວາມສາມັກຄີໃນອົງກອນ, ສ້າງ ຄວາມສຳພັນທີ່ດີລະຫວ່າງພະນັກງານພາຍໃນອົງກອນ ຫຼື ລວມທັງຫົວໜ້າ ເພາະຈະຊ່ວຍໃຫ້ຄົນທີ່ບໍ່ສະໜິດກັນໄດ້ເພີ່ມຄວາມສະໜິດກັນໄດ້ອີກລະດັບໜຶ່ງ ເຊິ່ງຈະກາຍເປັນຊຸມຊົນທີ່ສາມາດເສີມສ້າງວັດທະນະທຳຂອງອົງກອນໃຫ້ແຂງແກ່ນໄດ້ຜ່ານການແລກປ່ຽນຄວາມຄິດເຫັນເຊິ່ງກັນ ແລະ ກັນ, ໃຜຢາກລົມຫຍັງ, ຕິດຕໍ່ກັບໃຜ ຫຼື ຈະສື່ສານນະໂຍບາຍໃດໆກໍ່ສາມາດໃຊ້ເຄືອຂ່າຍນີ້ເປັນສື່ກາງໄດ້ທຸກເວລາເພື່ອໃຫ້ພະນັກງານຮູ້ສຶກວ່າພວກເຂົາລ້ວນແຕ່ເປັນສ່ວນໜຶ່ງຂອງອົງກອນ; ໃນອີກທາງໜຶ່ງອົງກອນກໍ່ສາມາດເບິ່ງເຫັນ ແລະ ຮັບຮູ້ເຖິງຄວາມຮູ້ສຶກຂອງພະນັກງານໄດ້ ເຊິ່ງສາມາດທີ່ຈະວາງແຜນ ແລະ ກຳນົດແນວທາງໃນການແກ້ໄຂບັນຫາຕ່າງໆໄດ້ຢ່າງວ່ອງໄວຂຶ້ນອີກດ້ວຍ.

+ ໃຊ້ສະແດງຄວາມຄິດເຫັນຫາຂໍ້ສະຫຼຸບຮ່ວມກັນ: ຫຼາຍໆເທື່ອທີ່ອົງກອນຕ້ອງການຄວາມຄິດເຫັນຂອງພະນັກງານມາຫາຂໍ້ສະຫຼຸບໃນການດຳເນີນການຕ່າງໆ ເຊັ່ນ: ການຈັດກິດຈະກຳພາຍໃນອົງກອນ, ການຈັດທີມງານ ຫຼື ການປ່ຽນແປງດ້ານຕ່າງໆທີ່ອາດກຳລັງເກີດຂຶ້ນ ເຊິ່ງສື່ສັງຄົມອອນລາຍຈະເປັນຊ່ອງທາງທີ່ມີປະໂຫຍດຫຼາຍໃນການໃຫ້ພະນັກງານຮ່ວມສະແດງຄວາມຄິດເຫັນ ຫຼື ອອກສຽງໄດ້ໂດຍສະດວກ ທີ່ນຳໄປສູ່ການຫາຂໍ້ສະຫຼຸບຂອງກິດຈະກຳພາຍໃນອົງກອນໄດ້ຢ່າງມີປະສິດທິພາບ, ປະຢັດເວລາ ເພາະບໍ່ຕ້ອງເອີ້ນປະຊຸມກັນຕະຫຼອດ.

ຂໍ້ດີຂອງສື່ສັງຄົມອອນລາຍແມ່ນມີຫຼາຍແລ້ວແຕ່ຈະເລືອກໃຊ້ປະໂຫຍດຈາກຊ່ອງທາງໃດເພື່ອໃຫ້ເກີດປະສິດທິພາບສູງສຸດ ບໍ່ວ່າຈະເປັນການຕິດຕໍ່ສື່ສານທີ່ສະດວກ, ວ່ອງໄວ ແລະ ຕອບໂຈດຄວາມຕ້ອງການທີ່ເປັນທັງຄັງຄວາມຮູ້ທີ່ບໍ່ຈຳກັດ, ເປັນສື່ ແລະ ຊ່ອງທາງໃນການນຳສະເໜີສິ່ງຕ່າງໆໃນຮູບແບບທີ່ຫຼາກຫຼາຍໄດ້ຢ່າງໜ້າສົນໃຈ ລວມທັງເປັນສື່ສ້າງຄວາມສຳພັນທີ່ເຊື່ອມໂຍງຜູ້ຄົນເຂົ້າຫາກັນທີ່ປະຢັດເວລາ ແລະ ຄ່າໃຊ້ຈ່າຍ.

ແຕ່ໃນຂະນະດຽວກັນສື່ສັງຄົມອອນລາຍກໍ່ເປັນດາບສອງຄົມທີ່ຫາກນຳໃຊ້ບໍ່ຖືກວິທີກໍ່ສາມາດສ້າງຜົນກະທົບສູ່ຄົນໃນວົງກວ້າງໄດ້ ທັງການລະເມີດສິດທິສ່ວນບຸກຄົນ, ການເປີດເຜີຍຂໍ້ມູນສ່ວນບຸກຄົນ ຫຼື ຂໍ້ມູນອົງກອນທີ່ບໍ່ເໝາະສົມ; ການໃຊ້ງານສື່ສັງຄົມອອນລາຍຈຶ່ງຕ້ອງຕັ້ງຢູ່ບົນພື້ນຖານຂອງຄວາມພໍດີ ( ບໍ່ຫຼາຍເກີນໄປ ຫຼື ບໍ່ໜ້ອຍເກີນໄປ ) ໃຊ້ຢ່າງມີສະຕິ ແລະ ຮູ້ເທົ່າທັນເຕັກໂນໂລຊີກໍ່ຮັບຮອງວ່າມີແຕ່ຊະນະຢ່າງແນ່ນອນ.

Source: ເສດຖະກິດການຄ້າ