ໂຮງຮຽນ ມາລີນີ ໃກ້ຈະຮອດ 10 ປີ ມີຄວາມພ້ອມເຕັມທີ່ສໍາລັບສົກຮຽນໃໝ່

0
18

ໂຮງຮຽນ ມາລີນີ ເປັນການລົງທຶນປຸກສ້າງໂດຍບໍລິສັດເອກະຊົນ ຕັ້ງແຕ່ປີ 2009 ດໍາເນີນການຮຽນ – ການສອນເນັ້ນຄຸນນະພາບ ສາມາດເປັນທ່າແຮງໜຶ່ງໃນການປະກອບສ່ວນພັດທະນາຄົນ ເພື່ອພັດທະນາສັງຄົມ ເຊິ່ງປັດຈຸບັນກໍ່ກຽມພ້ອມເປີດສົກຮຽນໃໝ່ເປັນທີ່ຮຽບຮ້ອຍ.
ສົກຮຽນປີ 2017 – 2018 ຈະເປີດຂຶ້ນເປັນທາງການໃນວັນທີ 1 ກັນຍາ ທີ່ຈະມາເຖິງນີ້, ໂຮງຮຽນ ມາລີນີ ພ້ອມທີ່ຈະເປີດເຊັ່ນດຽວກັນ ໂດຍມີທິດທາງເພີ່ມຄວາມໜັກແໜ້ນດ້ານຄຸນນະພາບການຮຽນ – ການສອນ ທີ່ຈັດຕັ້ງປະຕິບັດຄົບຕາມ 3 ລັກສະນະ ແລະ 5 ຫຼັກມູນ ຂອງກະຊວງສຶກສາທິການ ແລະ ກີລາວາງອອກ ຈາກການສຳພາດຜູ້ອຳນວຍການເຜີຍວ່າໂຮງຮຽນມີຄວາມພ້ອມ 100% ສໍາລັບສົກຮຽນ 2017 – 2018.

ທ່ານ ສິງພັນ ຈັນທະສອນ

ທ່ານ ສິງພັນ ຈັນທະສອນ ຜູ້ອຳນວຍການໂຮງຮຽນປະຖົມ – ມັດທະຍົມສົມບູນ ມາລີນີ ບອກວ່າ: ປັດຈຸບັນພວກເຮົາມີ ຄວາມກຽມພ້ອມ 100% ໃນການເປີດການຮຽນ – ການສອນ ສົກປີ 2017 – 2018, ຄູ – ອາຈານມີພຽງພໍ, ຫ້ອງຮຽນກໍ່ມີຄວາມພ້ອມທັງສະອາດ, ອາກາດປອດໂປ່ງ ແລະ ມີຄວາມສວຍງາມ.
ໂຮງຮຽນຂອງພວກເຮົາມີຫຼັກສູດການຮຽນ – ການສອນນັບແຕ່ຊັ້ນອະນຸບານ, ປະຖົມ, ມັດທະຍົມຕອນຕົ້ນ ແລະ ຕອນປາຍ. ໃນດ້ານອຸປະກອນຮັບໃຊ້ການ ຮຽນ – ການສອນມີຄົບຊຸດ, ອາຄານສະຖານທີ່ກໍ່ຄົບຖ້ວນ, ເດີ່ນຮັບໃຊ້ກໍ່ກວ້າງ ຂວາງດີ. ຢ່າງໃດກໍ່ຕາມ, ທາງໂຮງຮຽນເນັ້ນຈັດຕັ້ງປະຕິບັດໃຫ້ຄົບຕາມ 3 ລັກສະນະ ຄື: ລັກສະນະຊາດ, ລັກສະນະວິທະຍາສາດ ແລະ ທັນສະໄໝ, ລັກສະນະມະຫາຊົນ ແລະ 5 ຫຼັກມູນການສຶກສາ ຄື: ຄຸນສົມບັດສຶກສາ, ປັນຍາສຶກສາ, ແຮງງານສຶກສາ, ພາລະສຶກສາ ແລະ ສິລະປະສຶກສາ ໃນໄລຍະຜ່ານມາທາງໂຮງຮຽນກໍ່ສາມາດຍາດໄດ້ຜົນງານຫຼາຍດ້ານເປັນຕົ້ນແມ່ນສ້າງນັກຮຽນເກັ່ງ, ນັກຮຽນດີ. ນອກນັ້ນ, ຄູ – ອາຈານສອນຂອງໂຮງຮງຮຽນກໍ່ມີບຸກຄົນພົ້ນເດັ່ນສອນດີ – ສອນເກັ່ງ.
ໃນຫຼັກສູດນອກຈາກຈະມີພາສາລາວທາງໂຮງຮຽນຍັງເປີດສອນພາສາຕ່າງປະເທດ ເປັນຕົ້ນແມ່ນພາສາອັງກິດ. ພ້ອມນັ້ນ, ຍັງມີຄົນຕ່າງປະເທດເຂົ້າມາສອນເພື່ອເພີ່ມຄຸນນະພາບຕື່ມ.
ສຳລັບສົກຮຽນປີ 2017 – 2018 ທາງໂຮງຮຽນຍັງຈະເນັ້ນປັບປຸງຄູສອນໃຫ້ໄດ້ມາດຕະຖານດຽວກັນ ເພື່ອເຮັດແນວໃດຈະໄດ້ຕໍ່ຍອດຄວາມຮູ້ໃຫ້ນັກຮຽນໄດ້ຮັບຂໍ້ມູນຫຼາຍທີ່ສຸດໃຫ້ໄດ້ນັກຮຽນເກັ່ງໃນຂັ້ນເມືອງ, ກ້າວສູ່ນະຄອນຫຼວງ ແລະ ລະດັບປະເທດໃນບາດກ້າວຕໍ່ໄປ.

ດ້ານໜ້າວຽກຫຼັກໆທີ່ທາງໂຮງຮຽນຈະຕ້ອງພ້ອມຢູ່ສະເໝີ ຄື: 1. ການກະກຽມຄູ – ອາຈານໃຫ້ພ້ອມ; 2. ສິ່ງອຳນວຍຄວາມສະດວກ ໂດຍສະເພາະແມ່ນຫ້ອງທົດລອງ, ອຸປະກອນ, ສະໜາມກີລາ ແລະ ອື່ນໆ; 3. ການກະກຽມບົດຮຽນ, ບົດສອນ ແລະ ມາຮອດມື້ນີ້ຖືວ່າມີຄວາມພ້ອມ 100% ສຳລັບສົກຮຽນນີ້.
ພ້ອມດຽວກັນນັ້ນ, ທ່ານຜູ້ອໍານວຍການຍັງກ່າວອີກວ່າ: ຍັງຈະມີການປຶກສາຫາລືໃນການແກ້ໄຂຈຸດອ່ອນ ຫຼື ຂໍ້ບົກຜ່ອງໃນໄລຍະຜ່ານມາໃຫ້ນັບມື້ນັບດີຂຶ້ນ ໂດຍມຸ່ງໝັ້ນເພື່ອພັດທະນາຄຸນນະພາບການສຶກສາຂອງນັກຮຽນ, ສົ່ງເສີມເຂົາເຈົ້າຮ່ຳຮຽນວິຊາຊີບໄດ້ງ່າຍ ແລະ ເຂັ້ມແຂງຂຶ້ນ. ທັງນີ້, ຈະໄດ້ນຳຄວາມຮູ້ຄວາມສາມາດດັ່ງກ່າວມາຊ່ວຍສ້າງສາພັດທະນາປະເທດຊາດຂອງພວກເຮົານັບມື້ໃຫ້ດີຂຶ້ນເລື້ອຍໆ.


ທຸລະກິດດ້ານການສຶກສາເມື່ອເປີດເອອີຊີມີທ່າອ່ຽງໃນລັກສະນະການແຂ່ງຂັນຫຼາຍຂຶ້ນ ເພາະຈະມີນັກລົງທຶນຈາກຕ່າງປະເທດເຂົ້າມາດຳເນີນທຸລະກິດຂະແໜງການນີ້ ແລະ ອີກດ້ານນັກຮຽນກໍ່ມີໂອກາດທີ່ຈະໄປສຶກສາຢູ່ຕ່າງປະເທດ ຫຼື ປະເທດເພື່ອນບ້ານຫຼາຍຂຶ້ນ. ດັ່ງນັ້ນ, ພວກເຮົາຜູ້ປະກອບການພາຍໃນຈະຕ້ອງສຸມໃສ່ພັດທະນາຈຸດດ້ອຍຂອງຕົນເອງໃຫ້ດີຂຶ້ນ ຈົນສາມາດສ້າງຄວາມໄວ້ເນື້ອເຊື່ອໃຈໃຫ້ກັບຜູ້ປົກຄອງ. ເຖິງຢ່າງໃດກໍ່ຕາມ, ເມື່ອເບິ່ງຕາມຕົວຈິງແລ້ວຄວາມອາດສາມາດຂອງພໍ່ແມ່ຜູ້ປົກຄອງຫຼາຍໆທ່ານກັບເງື່ອນໄຂໃນການຈ່າຍຄ່າຮຽນໃຫ້ລູກຮຽນໃນໂຮງຮຽນລາຄາແພງຍັງມີບໍ່ຫຼາຍ ຈຸດນີ້ຖືວ່າຍັງສ້າງຄວາມໄດ້ປຽບໃຫ້ກັບຜູ້ປະກອບການພາຍໃນເປັນຢ່າງດີ. ແຕ່ເຖິງແນວໃດຜູ້ປະກອບການດ້ານທຸລະກິດຂະແໜງການນີ້ຈະຕ້ອງມຸ່ງໝັ້ນທີ່ຈະສ້າງໂອກາດ ແລະ ສະແດງຂີດຄວາມສາມາດໃຫ້ຜູ້ປົກຄອງໄດ້ເຫັນວ່າ: ການສິດສອນນັກຮຽນຂອງຄູລາວໃຫ້ມີຄວາມຮູ້ຄວາມສາມາດທຽບເທົ່າກັບສາກົນກໍ່ເຮັດໄດ້ ໝາຍວ່າອົງປະກອບຕ່າງໆໂດຍສະເພາະສິ່ງອຳນວຍຄວາມສະດວກທີ່ຈຳເປັນຕາມຍຸກສະໄໝທາງໂຮງຮຽນຈະຕ້ອງມີໃຫ້ຄົບຖ້ວນ, ທ່ານ ສິງພັນ ຈັນທະສອນ ກ່າວ.
ທ່ານກ່າວຕື່ມວ່າ: ໂຮງຮຽນປະຖົມ – ມັດທະຍົມສົມບູນ ມາລີນີ ໄດ້ສ້າງຕັ້ງໃນປີ 2009 ມູນຄ່າການລົງທຶນທັງໝົດປະມານ 5.8 ລ້ານໂດລາສະຫະລັດ ມູນຄ່າດັ່ງກ່າວໝູນໃຊ້ເຂົ້າໃນການຊື້ກໍາມະສິດນໍາໃຊ້ທີ່ດິນ 1 ເຮັກຕາ, ປຸກສ້າງອາຄານທີ່ມີຫ້ອງຮຽນທັງໝົດ 30 ຫ້ອງ ແຕ່ລະຫ້ອງຕິດແອ, ສ້າງສະໜາມກີລາ, ເດີ່ນຈອດລົດ ແລະ ສິ່ງອຳນວຍຄວາມສະດວກຕ່າງໆ ລວມທັງຮ້ານອາຫານ ແລະ ລົດຮັບສົ່ງ.

ໂຮງຮຽນປະຖົມ – ມັດທະຍົມສົມບູນ ມາລີນີ ເປັນໂຮງຮຽນເອກະຊົນຊັ້ນມັດທະຍົມທີ່ຫວັງເປັນຕົ້ນແບບໃນການກໍ່ສ້າງ ຫຼື ຫຼໍ່ຫຼອມນັກຮຽນໃຫ້ມີຄວາມຮູ້ຄວາມສາມາດໃນຫຼາຍດ້ານ. ທັງນີ້, ກໍ່ເພື່ອປູກຝັງຮາກຖານ ຫຼື ເສັ້ນທາງໃຫ້ກັບນັກຮຽນໃນການຮຽນຕໍ່ຫຼັງຈົບ ມ 7 ເພື່ອກ້າວສູ່ວິຊາຊີບ ໂດຍຫວັງຊ່ວຍສ້າງອະນາຄົດຂອງຄົນຍຸກໃໝ່ຮັບໃຊ້ຊາດທີ່ເຕັມໄປດ້ວຍ ຄວາມຮູ້ຄວາມສາມາດ.
ໂຮງຮຽນແຫ່ງນີ້ສອນຕັ້ງແຕ່ຊັ້ນອະນຸບານ ຈົນຮອດມັດທະຍົມຕອນປາຍ ຮອງຮັບນັກຮຽນໄດ້ເກືອບ 1,000 ຄົນ ສະຖານທີ່ຕັ້ງຢູ່ບ້ານພະຂາວ ເມືອງໄຊທານີ ນະຄອນຫຼວງວຽງຈັນ.

 

Source: ເສດຖະກິດການຄ້າ