ນ້ຳໝາກສາລີຂາຍດີ ແຕ່ມີຂໍ້ຫຍຸ້ງຍາກເລື່ອງວັດຖຸດິບ

ທ່ານ ຫຼຸມຄຳ ວົງໄຊ ປະທານບໍລິສັດ ລາວອຸດສາຫະກຳ-ກະສິກຳ ຈໍາກັດ ໄດ້ໃຫ້ສໍາພາດກັບນັກຂ່າວ ເສດຖະກິດ-ການຄ້າ ວ່າ: ທາງບໍລິສັດໄດ້ຜະລິດ ແລະ ແປຮູບສາລີຫວານອັດກະປ໋ອງສົ່ງອອກຕ່າງປະເທດໄດ້ໄລຍະໜຶ່ງແລ້ວ, ພັກ ແລະ ລັດຖະບານ ກໍ່ໄດ້ຊີ້ນໍາໃຫ້ມີຜະລິດຕະພັນຈາກສາລີຫວານ ຈໍາໜ່າຍຢູ່ພາຍໃນນໍາອີກ ເຊິ່ງສອດຄ່ອງກັບວິໄສທັດຂອງບໍລິສັດໃນການສ້າງຜະລິດຕະພັນທີ່ເນັ້ນໃຫ້ທຸກ ເພດທຸກໄວສາມາດດື່ມໄດ້ ແລະ ເປັນຜົນດີຕໍ່ສຸຂະພາບ.


ທ່ານ ກ່າວຕື່ມວ່າ: ວັດຖຸດິບທີ່ນໍາໃຊ້ປັດຈຸບັນແມ່ນຍັງບໍ່ພຽງພໍ ຈິ່ງຢາກໃຫ້ປະຊາຊົນລາວທົ່ວປະເທດເປັນເຈົ້າການນໍາກັນບໍ່ຢາກໃຫ້ສົ່ງວັດຖຸດິບຂອງຕົນໄປຕ່າງປະເທດ ເພາະວ່າຢູ່ພາຍໃນປະເທດເຮົາກໍ່ມີຜູ້ທີ່ເຮັດກັບກິດຈະການນີ້ຢູ່ແລ້ວ ເຊິ່ງປັດຈຸບັນທາງບໍລິສັດ ກໍໄດ້ສົ່ງເສີມຊາວກະສິກອນທໍາການຜະລິດກະສິກຳ ເພື່ອເປັນວັດຖຸດິບໃຫ້ແກ່ການຜະລິດຕ່າງໆ ໂດຍບໍລິສັດມີຜະລິດຕະພັນຫຼັກ 5 ຢ່າງໃຫຍ່ ຄື: ໝາກສາລີກະປ໋ອງ, ໝາກຕາວ, ນົມສາລີ, ໝາກໜັດ ແລະ ຜັກທຽມດອງ. ແຕ່ສໍາລັບບໍລິສັດພວກເຮົາແມ່ນມີຜະລິດຕະພັນສິນຄ້າຫຼັກຄື: ນໍ້ານົມສາລີຫວານ, ນ້ຳສາລີສູດປະ ສົມງາດຳ, ນ້ຳນົມສາລີຫວານສູດບໍ່ມີນ້ຳຕານ, ສາລີຕົ້ມອັດກະປ໋ອງ, ນໍ້າໝາກນັດ, ໝາກຕາວເຊື່ອມ ແລະ ກະທຽມດອງ.

ໃນນັ້ນ, ສ່ວນໃຫຍ່ແມ່ນຈໍາໜ່າຍພາຍໃນ ແລະ ສ່ວນໜຶ່ງກໍສົ່ງໄປຕ່າງປະເທດລວມມີ 10 ກວ່າປະເທດ ເຊັ່ນ: ໄທ, ຫວຽດນາມ, ກໍາປູເຈຍ, ມາເລເຊຍ, ສ.ເກົາຫຼີ, ຣັດເຊຍ, ຟີນແລນ, ເຢຍລະມັນ, ເນເທີແລນ, ເດັນມາກ, ອັງກິດ, ຝຣັ່ງ, ປ໊ອກຕຸຍການ ແລະ ອື່ນໆ.
ທ່ານ ຫຼຸມຄຳ ວົງໄຊ ຍັງໄດ້ຝາກໃຫ້ພາກສ່ວນທີ່ກ່ຽວຂ້ອງຕິດຕາມກວດກາສິນຄ້ານໍາເຂົ້າໃຫ້ເຂັ້ມງວດ ເພື່ອປ້ອງກັນຜົນກະທົບຕໍ່ຜູ້ຜະລິດພາຍໃນ ແນໃສ່ເພີ່ມຂະບວນການຜະລິດ, ເພີ່ມຂະບວນການຊົມໃຊ້ພາຍໃນເພື່ອຄວາມຢູ່ດີກິນດີຂອງປະຊາຊົນລາວ.


Source: ເສດຖະກິດການຄ້າ

Related News

Leave a Reply

[bsa_pro_ad_space id=8]