ກະຊວງ ຮສສ ກຽມລົງກວດກາ ແຮງງານຕ່າງປະເທດ ຢູ່ລາວ ຄັ້ງທີ 2

0
27

ກະຊວງ​ແຮງ​ງານ ​ແລະ ສະຫວັດດີ​ການ​ສັງຄົມ (ຮສສ) ກຽມສົ່ງ​ເຈົ້າໜ້າທີ່​ ລົງ​ກວດກາ​​ແຮງ​ງານ​ຕ່າງປະ​ເທດ ​ຢູ່​ລາວ ​ຄັ້ງ​ທີ 2 ພາຍຫລັງ​ກວດກາ ຄັ້ງ​ທຳ​ອິດ​ ໃນ​ປີ 2016 ຜ່ານ​ມາ. ທັງ​ນີ້​, ກໍເພື່ອ​ປົກ​ປ້ອງ ​ສິດຜົນປະ​ໂຫຍ​ດ ​ໃຫ້​ແກ່​ຜູ້​ອອກ​ແຮງ​ງານ ​ແລະ ຜູ້​ໃຊ້​ແຮງ​ງານ. ​ເນື່ອງ​ຈາກ​ວ່າ ປັດຈຸບັນ ຍັງ​ມີ​​ແຮງ​ງານ​ຕ່າງປະ​ເທດ​ ຈຳນວນໜຶ່ງ ຍັງ​ບໍ່​ໄດ້​ຂຶ້ນ​ ທະບຽນ​ແຮງ​ງານຖືກຕ້ອງ​ ຕາມ​ກົດໝາຍ.

ທ່ານ ພົງ​ໄຊ​ສັກ ອິນ​ຖາ​ລາດ ຫົວໜ້າກົມ​ຄຸ້ມ​ຄອງ​ແຮງ​ງານ ກະຊວງ ຮສສ ​ໄດ້​ກ່າວ​ ​ໃນ​ງານຖະ​ແຫລ​ງຂ່າວ ກ່ຽວກັບຂໍ້​ຕົກລົງ ຂອງ​ລັດຖະມົນຕີ ກະຊວງ ຮສສ ​ເລກທີ 4277 ວ່າ​ດ້ວຍ​ການ​ແຕ່ງ​ຕັ້ງ ​ແລະ ​ເຄື່ອນ​ໄຫວ​ຂອງ​ເຈົ້າໜ້າທີ່ ​ກວດກາ​ແຮງ​ງານ ຂຶ້ນ​ໃນ​ວັນ​ທີ 29 ສິງຫາ 2017 ນີ້​ວ່າ: ​ໂດຍ​ປະ ຕິບັດ​ ຕາມ​ຂໍ້​ຕົກລົງ​ດັ່ງກ່າວ, ກົມ​ຄຸ້ມ​ຄອງ​ແຮງ​ງານ ​ແຕ່ງ​ຕັ້ງ​ເຈົ້າໜ້າທີ່​ ກວດກາ​ແຮງ​ງານ ຈຳນວນ 77 ຄົນ ​​ໄປປະຈຳ​ການຢູ່​ສູນ​ກາງ ​ແລະ ທ້ອງ​ຖິ່ນ ​ໂດຍ​ມີໜ້າທີ່ກວດກາ​ແຮງ​ງານ​ ຄື: ​ເປັນ​ນັກ​ພັດທະນາ​ສະຖານ​ທີ່​ເຮັດ​ວຽກ, ນັກ​ໂຄສະນາ​ກົດໝາຍ; ​ເປັນ​ຜູ້​ບັງຄັບ​ໃຊ້​ກົດໝາຍ ​ແລະ ລະບຽບການ​ຄຸ້ມ​ຄອງ​ແຮງ​ງານ ຢູ່​ຫົວໜ່ວຍ​ ແຮງ​ງານ​ທົ່ວ​ປະ​ເທດ ​ໃຫ້​ມີ​ປະສິດທິພາບ ​ແລະ ປະສິດທິ​ຜົນ ​ໂດຍ​ມີ​ການວາງ​ແຜນ​ ຕິດຕາມ​ກວດກາ ​ແລະ ຈັດ​ຕັ້ງ​ປະຕິບັດ​ວຽກງານ​ ກວດກາ​ແຮງ​ງານ; ນຳ​​ໃຊ້​ມາດ​ຕະການ​ ທີ່​ເປັນ​ການ​ລົງ​ໂທດ​ ດ້ວຍ​ການ​ປັບ​ໄໝ ຫລື ການ​ລົງ​ໂທດ​ດ້ານ​ບໍລິຫານ ​ຕໍ່​ກັບ​ຜູ້​ໃຊ້​ແຮງ​ງານ ​ທີ່​ລະ​ເມີດ​ກົດໝາຍ ​ແລະ ລະບຽບການ​ແຮງ​ງານ; ຮັບປະກັນ​ການສະໜອງ ຂໍ້​ມູນ​ດ້ານ​ວິຊາ​ການ ​ແລະ ​ໃຫ້​ຄຳ​ແນະນຳ​ແກ່ ​ຜູ້​ໃຊ້​ແຮງ​ງານ ​ແລະ ຜູ້​ອອກ​ແຮງ​ງານ​ກ່ຽວກັບ ວິທີ​ການ​ຈັດ​ຕັ້ງ​ປະຕິບັດ​ກົດໝາຍ ​ແລະ ລະບຽບການ​ຄຸ້ມ​ຄອງ​ແຮງ​ງານ ​ໃຫ້​ສອດຄ່ອງ​ທີ່​ສຸດ; ນຳ​ເອົາ​ບັນຫາ ທີ່​ເຫັນ​ວ່າ​ເປັນ​ການລະ​ເມີດ ຫລື ​ເປັນ​ການ​ກະທຳ ທີ່​ເຫັນ​ວ່າ​ຍັງ​ບໍ່​ທັນ ມີ​ນິຕິ​ກຳ​ໃດ​ກວມ​ເອົາ​ເທື່ອ​ ນັ້ນ​ມາ​ແຈ້ງ​ຕໍ່​ອົງການ​ກ່ຽວຂ້ອງ; ສະຫລຸບ​ລາຍ​ງານ ຜົນ​ການ​ກວດກາ ປະຈຳ​ເດືອນ ​ໃຫ້​ຂັ້ນ​ສູນ​ກາງ​ເປັນ​ປົກກະຕິ; ປະຕິບັດໜ້າທີ່​ອື່ນໆ ທີ່​ເຫັນ​ວ່າ​ເປັນ​ການ​ກະທຳ ​ທີ່​ເໝາະສົມ ບໍ່​ຂັດ​ກັບ​ນິຕິ​ກຳ ​ແລະ ບໍ່​ເປັນ​ການ​ກ້າວ​ກ່າຍ ໜ້າທີ່​ຂອງ​ອົງການ​ອື່ນ, ບໍ່​ເປັນ​ການ​ລຳອຽງ ຫລື ສ້າງ​ຜົນ​ປະ​ໂຫຍ​ດ​ໃຫ້​ຝ່າຍ​ໃດໜຶ່ງ, ບໍ່​ສ້າງ​ຄວາມ​ເຊື່ອມ​ເສຍ ​ໃຫ້​ແກ່​ການຈັດ​ຕັ້ງ​ຂອງ​ລັດ ຫລື ພາກສ່ວນ​ນິຕິບຸກຄົນ, ທັງ​ບໍ່​ເປັນ​ ຜົນ​ກະທົບ​ທາງ​ລົບ ​ຕໍ່​ສາຍ​ພົວພັນ​ ລະຫວ່າງ ​ຜູ້​ໃຊ້​ແຮງ​ງານ ​ແລະ ຜູ້​ອອກ​ແຮງ​ງານ.

ຈາກ​ການ​ສຳ​ຫລວດ​ໃນ ​ປີ 2016 ພົບ​ວ່າ ​ແຮງ​ງານ​ຕ່າງປະ​ເທດ ​ທີ່​ມາ​ເຮັດ​ວຽກຢູ່​ ສປປ ລາວ ມີ​ປະມານ 50 ພັນ​ຄົນ ​ໃນ​ນັ້ນ​ ຂຶ້ນ​ທະບຽນຖືກຕ້ອງ ​ຕາມ​ກົດໝາຍ ປະມານ 30 ພັນ​ຄົນ ​ແລະ ຫລາຍ​ກວ່າ 20 ພັນ​ຄົນ​ ແມ່ນ​​ເປັນ​ແຮງ​ງານ​ ຜິດ​ກົດໝາຍ.
ຂ່າວ: ກິດ​ຕາ

ເນື້ອໃນ: ຂປລ