ຊາວໜຸ່ມ ແຂວງສາລະວັນ-ດົງຖ໋າບ ສສ ຫວຽດນາມ ເຊັນສັນຍາຮ່ວມມືຮອບດ້ານ

0
31

ເມື່ອ​ບໍ່​ດົນ​ມາ​ນີ້, ຄະນະ​ບໍລິຫານ​ງານ​ຊາວໜຸ່ມ ​ແຂວງ​ສາລະ​ວັນ ນຳ​ໂດຍ ທ່ານ ຈັນ​ເພັງ​ ສາຍ​ທຳ​ມະ​ວົງ ຮອງ​ເລ​ຂາ​ຊາວໜຸ່ມ​ ແຂວງ​ສາລະ​ວັນ ​ແລະ ​ທ່ານ ຫງວຽນ ວັນ​ວູ໊ມິ​ງ ​ເລຂາຄະນະ​ບໍລິຫານ​ງານຊາວໜຸ່ມ​ແຂວງ ດົງ​ຖ໋າບ ສສ ຫວຽດນາມ ​ໄດ້​​ເຊັນ​ບົດ​ບັນທຶກສັນຍາ​ ການຮ່ວມມື​ຮອບດ້ານ ​ເພື່ອ​ເປັນ​ການ​ສ້າງສາ​ຍພົວພັນ​ຮ່ວມ​ມື ລະຫວ່າງ ​ລາວ-​ຫວຽດນາມ ​ໂດຍ​ສະ​ເພາະ​​ແມ່ນ ສາລະ​ວັນ-​ດົງ​ຖ໋າບ ​ໃຫ້​ນັບ​ມື​ນັບ​ແໜ້ນ​ແຟ້ນຂຶ້ນ

ທ່ານ ສຸກ​ວຽງທອງ ສຸຂະ​ວົງ ຮອງ​ເລຂາ​ຄະນະ​ບໍລິຫານ​ງານ​ຊາວໜຸ່ມ​ ແຂວງ​ສາລະ​ວັນ​ ​ໄດ້​ຕີ​ລາຄາ​ການ​ເຄື່ອນ​​ໄຫວຮ່ວມມື​ ລະຫວ່າງ​ ຊາວໜຸ່ມ 2 ​ແຂວງ​ຄື: ​ຊາວໜຸ່ມແຂວງ​ສາລະ​ວັນ ​ແລະຊາວໜຸ່ມ ​ແຂວງ​ດົງ​ຖ໋າບ ​ແຕ່​ປີ 2014-2017 ທີ່​ໄດ້​ເຊັນ​ສັນຍາ​​ແຮກສ່ຽວ, ທັງ​ທົບ​ທວນຄືນ​ຜົນ​ງານ​ ໃນ​ການຈັດ​ຕັ້ງ​ປະຕິບັດ​ໂຄງການ​ ປະສານ​ງານ​ລະຫວ່າງ​ຊາວໜຸ່ມ 2 ​ແຂວງ​ ທີ່​ໄດ້​ເຄື່ອນ​ໄຫວ​ ແລກປ່ຽນສົ່ງ​ເສີມ​ ການ​ຄ້າ-ການ​ລົງທຶນ, ການ​ສ້າງ​ວຽກ​ເຮັດ​ງານ​ທຳ​ຂອງ​ຊາວໜຸ່ມ ​ໂດຍຊອກ​ໂອກາດ​ໃນ​ການ​ຮ່ວມມື ​ແລະ​ ຊ່ວຍ​ເຫລືອສັງຄົມ ​ແລະ ອື່ນໆ. ​ສຳລັບ​ທິດ​ທາງ​ຕໍ່ໜ້າ​ ​ແມ່ນ​ສຸມ​ໃສ່​ເຜີຍ​ແຜ່​ຜັນ ​ຂະຫຍາຍ​ໃຫ້​ຊາວໜຸ່ມ 2 ​ແຂວງ​ ຮັບ​ຮູ້​ເຂົ້າ​ໃຈ​ກ່ຽວກັບ​ສາຍ​ພົວພັນ​ ມິດຕະພາບ​ອັນ​ຍາວ​ນານ ​ຂອງ 2 ປະ​ເທດ, ສືບຕໍ່ປຸກລະດົມ​ປະຊາຊົນ ​ໃນ​ການ​ປ້ອງ​ກັນ, ຫລີກລ້ຽງການ​ຄ້າ​ໂສ​ເພນີ, ​ເດັກນ້ອຍ ​ແລະ​ ບັນດາ​ປະກົດ​ການ​ຫຍໍ້​ທໍ້​ຕ່າງໆ​ໃນ​ສັງຄົມ, ປະກອບສ່ວ​ນເຂົ້າ​ໃນ​ການ​ຮັກສາ​ ຄວາມ​ສະຫງົບ​ທາງ​ດ້ານ​ການ​ເມືອງ​ຂອງ 2 ປະ​ເທດ, ​​ເພີ່ມທະວີ​ເຄື່ອນ​​ໄຫວ ພົບ​ປະ​ແລກປ່ຽນດ້ານສິ​ລະ​ປະ, ວັດທະນະທຳ ​ແລະ ​ກິລາ ​ແນ່​ໃສ​​ເສີມ​ຂະຫຍາຍ, ປົກ​ປັກ​ຮັກສາ ​ແລະ ​ພັດທະນາ​ວັດທະນະທຳ​ ທີ່​ເປັນ​ມູນ​ເຊື້ອ​ຂອງ 2 ຊາດ​ໃຫ້​ຍືນ​ຍົງ​ຄົງ​ຕົວຕະຫລອດ​ໄປ.

ພ້ອມ​ນີ້, ຊາວ​ໜຸ່ມ​ສອງ​ແຂວງຍັງ​ໄດ້​ຮ່ວມ​ກັນ ຈັດ​ສຳ​ມະ​ນາໃນ 4 ຫົວ​ຂໍ້​ຄື: ທ່າ​ແຮງ​ການ​ພັດທະນາ​ ກະ​ສິ​ກຳ​ເປັນ​ສິນ​ຄ້າ, ວຽກງານ​ຊາວໜຸ່ມກ່ຽວກັບ​ ການ​ພັດທະນາສິນຄ້າ​ກະສິ​ກຳ ສູ​ຕະຫລາດພາຍ​ໃນ ​ແລະ ​ຕ່າງປະ​ເທດ, ການສະໜັບສະໜູນຊາວໜຸ່ມ​ໃນ​ການ​ເລີ່ມ​ຕົ້ນ​ ສ້າງ​ວຽກ​ເຮັດ​ງານ​ທຳ ​ແລະ ​ຂະ​ບວນການ​ ອາສາ​ສະໜັກ​ໄວໜຸ່ມ​ ແຂວງ​ດົງ​ຖ໋າບ ຮ່ວມ​ມື​ກັນ​ສ້າງ​ເຂດ​ຊົນນະບົດ.
ເນື້ອໃນ: ຂປລ