ເລຂາທິການໃຫຍ່ພັກກອມມູນິດ ສສ ຫວຽດນາມ ຕ້ອນຮັບຄະນະຜູ້ແທນ ຫ້ອງວ່າການ ສູນກາງພັກ ປປ ລາວ

0
21

ວັນທີ 21 ສິງຫາ 2017, ຢູ່ຮ່າໂນ້ຍ ສສ ຫວຽດນາມ, ສະຫາຍ ຫງວຽນ ຝູ໋ຈ້ອງ ເລຂາທິການໃຫຍ່ພັກກອມມູນິດຫວຽດນາມ ໄດ້ຕ້ອນຮັບຄະນະຜູ້ແທນ ຫ້ອງວ່າການສູນກາງພັກ ປະຊາຊົນປະຕິວັດລາວ ນຳໂດຍສະຫາຍ ຄຳພັນ ພົມມະທັດ ກຳມະການກົມການເມືອງ, ຄະນະເລຂາທິການສູນກາງພັກ, ຫົວໜ້າຫ້ອງວ່າການສູນກາງພັກປະຊາຊົນ ປະຕິວັດລາວ ໃນ​ໂອກາດຢ້ຽມຢາມ ສສ ຫວຽດນາມ.

ສະຫາຍ ຄຳພັນ ພົມມະທັດ ໄດ້ແຈ້ງໃຫ້ ສະຫາຍ ເລຂາທິການໃຫຍ່ ຫງວຽນ ຟູ໋ຈ້ອງ ຮັບຊາບ ກ່ຽວກັບຜົນການເຈລະຈາ ກັບຄະນະຜູ້ແທນຫ້ອງວ່າການ ສູນກາງພັກກອມມູນິດຫວຽດນາມ ​ເຊິ່ງການ​ພົບ​ປະ​ຄັ້ງ​ນີ້ ໄດ້ມີການລົງນາມ ໃນຂໍ້ຕົກລົງຮ່ວມມື ລະຫວ່າງ ຫ້ອງວ່າການສູນກາງພັກຂອງ 2 ປະເທດ ໄລຍະ 2017-2020 ແລະ ແຜນການປະຕິບັດແຜນຮ່າງການຮ່ວມມື ກ່ຽວກັບເອກະສານ, ສຳເນົາເອກະສານ, ຫໍສະໝຸດໄລຍະ 2. ພ້ອມນີ້, ສະຫາຍ ຄຳພັນ ພົມມະທັດ ຍັງ​ໄດ້ຢືນຢັນວ່າ: ຫ້ອງວ່າການສູນກາງພັກ ປະຊາຊົນປະຕິວັດລາວ ຈະສົມທົບກັນຢ່າງແໜ້ນແຟ້ນ ກັບຫ້ອງວ່າການສູນກາງພັກ ກອມມູນິດຫວຽດນາມ ໃນການຜັນຂະຫຍາຍການປະຕິບັດ ບັນດາຂໍ້ຕົກລົງ ລະຫວ່າງ ການນຳຂັ້ນສູງ 2 ພັກ, ຂໍ້ຕົກລົງຮ່ວມມື ລະຫວ່າງຫ້ອງວ່າການສູນກາງຂອງ 2 ພັກ ຢ່າງມີປະສິດທິຜົນ.

​ໂອກາດ​ນີ້, ສະຫາຍ ເລຂາທິການໃຫຍ່ຫງວຽນ ຝູ໋ຈ້ອງ ໄດ້ເນັ້ນໜັກເຖິງຄວາມສຳຄັນ ຂອງການພົວພັນມິດຕະພາບ ທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ຫວຽດນາມ-ລາວ ທີ່ມີຕໍ່ ສອງພັກ, ສອງລັດ ແລະ ປະຊາຊົນສອງປະເທດ. ພ້ອມ​ທັງ​ສະ​ແດງ​ຄວາມຫວັງວ່າ ຫ້ອງວ່າການສູນກາງພັກຂອງ 2 ປະເທດ ຈະສືບຕໍ່ສົມທົບກັນຢ່າງແໜ້ນແຟ້ນ, ເພີ່ມທະວີ ການແລກປ່ຽນຂໍ້ມູນຂ່າວສານ, ບົດຮຽນ, ວິຊາສະເພາະ ໃນການ ຜັນຂະຫຍາຍ ການປະຕິບັດ, ພາລະບົດບາດໜ້າທີ່ ທີ່ໄດ້ຮັບມອບໝາຍເປັນຢ່າງດີ.

ເນື້ອໃນ: ຂປລ