ທົດລອງໃຊ້ລະບົບສະມາສແວດ ເກັບອາກອນ ມູນຄ່າເພີ່ມ ຢູ່ດ່ານຂົວມິດຕະພາບ I

0
13

​ເຈົ້າ​ໜ້າ​ທີ່​ພາສີ​ດ່ານ​ຂົວ​ມິດຕະພາບ I ​ເລີ່​ມທົດ​ລອງ​ນໍາ​ໃຊ້ລະບົບສະ​ມາສ​ແວດ ​ໃນ​ການຈັດເກັບອາກອນມູນ​ຄ່າ​ເພີ່ມ 10% ສໍາລັບເຄື່ອງຂອງຕິດຕົວຜູ້ໂດຍສານ ຢູ່ດ່ານພາສີສາກົນຂົວມິດຕະພາບ I ​​​ເພື່ອ​ເພີ່ມ​ສິ່ງ​ອໍານວຍຄວາມ​ສະດວກ​ໃຫ້​ຜູ້​ມາ​ໃຊ້​ບໍລິການ, ພ້ອມ​ດຽວ​ກັນ​ນັ້ນ ​ກໍ​ເພື່ອ​ສ້າງ​ຄວາມ​ຍຸຕິ​ທໍາ ​ແລະ ຄວາມໂປ່​ງ​ໃສ​ ໃນ​ການຈັດ​ຕັ້ງ​ປະຕິບັດ​ ການ​ເກັບ​ລາຍ​ຮັບ​ເຂົ້າ​ງົບປະມານ​ຂອງ​ລັດ.

ຫລ້າ​ສຸດ ໃນ​ວັນ​ທີ 14 ສິງຫາ ນີ້ ​​ເວ​ບ​ໄຊສູນ​ຂໍ້​ມູນ​ຂ່າວສານ ​ດ້ານ​ການ​ຄ້າ​ ຂອງ​ກະ​ຊວງອຸດສາ ຫະກໍາ ​ແລະ ການ​ຄ້າ ​ເປີດ​ເຜີຍ​ວ່າ: ຜູ້ໂດຍສານ ທີ່ຊື້ເຄື່ອງຂອງຕິດຕົວເຂົ້າມາ ສປປ ລາວ ຜ່ານດ່ານພາສີສາກົນ ຂົວມິດຕະພາບ I ສາມາດຊໍາລະຄ່າອາກອນມູນຄ່າເພີ່ມ 10% ດ້ວຍລະບົບ Smart VAT (ສະ​ມາສ​ແວ​ດ) ໂດຍຜ່ານບັດ VISA, ບັດ JCB, ບັດ Master Card, ບັດ BCEL ATM-Union Pay, ບັດ Smart Tax, ແລະ ລະບົບ BCEL One ສໍາລັບຜູ້ໂດຍສານ ທີ່ຍັງບໍ່ມີບັດປະເພດດັ່ງກ່າວ ສາມາດໃຊ້ເງິນສົດໄປແລກເອົາບັດ Smart VAT ທີ່ຈຸດບໍລິການຕ່າງໆ ຂອງທະນາຄານການຄ້າຕ່າງປະເທດ ເພື່ອຊໍາລະຄ່າອາກອນມູນຄ່າເພີ່ມໄດ້.

ກະຊວງການເງິນ ໄດ້ອອກຂໍ້ກໍານົດເລກທີ 2834/ກງ, ລົງວັນທີ 30 ສິງຫາ 2016, ວ່າດ້ວຍການຈັດເກັບອາກອນມູນຄ່າເພີ່ມ ສໍາລັບເຄື່ອງຂອງຕິດຕົວຜູ້ໂດຍສານ ໃນອັດຕາ 10% ຂອງມູນຄ່າເຄື່ອງຂອງຕິດຕົວ ເພື່ອຊົມໃຊ້ໃນຊີວິດປະຈໍາວັນ ທີ່ບໍ່ມີລັກສະນະທາງການຄ້າ ຜ່ານດ່ານພາສີຊາຍແດນ ໃຫ້ຖືກຕ້ອງ ແລະ ທັງເປັນການປະຕິບັດພັນທະຂອງຕົນຕໍ່ລັດ ຕາມລະບຽບກົດໝາຍ. ເຊິ່ງໄດ້ກໍານົດໃຫ້ຜູ້ໂດຍ ສານທີ່ເປັນພົນລະເມືອງລາວ, ຄົນຕ່າງດ້າວ ຫລື ຄົນຕ່າງປະເທດ ທີ່ເດີນທາງເຂົ້າມາໃນ ສປປ ລາວ ຕ້ອງໄດ້ແຈ້ງເສຍອາກອນມູນຄ່າເພີ່ມ ຕາມອັດຕາທີ່ໄດ້ກໍານົດໄວ້, ຖ້າເຄື່ອງຂອງຕິດຕົວນໍາເຂົ້າມາໃນ ສ ປປ ລາວ ທີ່ມີມູນຄ່າເກີນ 50 ໂດລາສະຫະລັດ. ຜ່ານການຈັດຕັ້ງປະຕິບັດຕົວຈິງ ແມ່ນພົບບັນຫາຄວາມຫຍຸ້ງຍາກຫລາຍສົມຄວນ. ດັ່ງນັ້ນ, ເພື່ອອໍານວຍຄວາມສະດວກໃຫ້ແກ່ຜູ້ໂດຍສານ ໃນການຊໍາລະຄ່າອາກອນມູນຄ່າເພີ່ມດັ່ງກ່າວ ກະຊວງການເງິນ ຈຶ່ງໄດ້ອອກບົດແນະນໍາສະບັບເລກທີ 3643/ກງ, ລົງວັນທີ 31 ຕຸລາ 2016 ກ່ຽວກັບກົນໄກການຄຸ້ມຄອງ ການນໍາໃຊ້ບັດຊໍາລະອາກອນມູນຄ່າເພີ່ມ 10% ສໍາລັບເຄື່ອງຂອງຕິດຕົວຜູ້ໂດຍສານ ດ້ວຍລະບົບSmart VAT ຢູ່ດ່ານພາສີສາກົນ ໃນຂອບເຂດທົ່ວປະເທດ.
ນອກຈາກນັ້ນ, ຍັງສ້າງສິ່ງອໍານວຍຄວາມສະດວກ, ວ່ອງໄວ ແລະ ໂປ່ງໃສ ໃຫ້ແກ່ຜູ້ໂດຍສານທີ່ເຂົ້າມາ ສປປ ລາວ ໃນການຊໍາລະຄ່າອາກອນມູນຄ່າເພີ່ມ ຜ່ານຫລາຍປະເພດບັດ ແລະ ທັງລະບົບອອນລາຍ ຫລື BCEL One ຕື່ມ​ອີກ.

ພາບ-ຂ່າວ: ຮັກ​ຊາດ
ເນື້ອໃນ: ຂປລ