ທູດສິງກະໂປປະຈໍາລາວ ສະຫລອງວັນຊາດ ຄົບຮອບ 52 ປີ

0
10

ສະຖານທູດ​ສິງກະ​ໂປ ປະຈຳ ສປປ ລາວ ​ໄດ້ຈັດງານລ້ຽງສະເຫລີມສະຫລອງວັນຊາດສິງກະ​ໂປ ຄົບຮອບ 52 ປີ ຂຶ້ນໃນວັນທີ 10 ສິງຫາ ນີ້ ທີ່ນະຄອນຫລວງວຽງຈັນ, ໂດຍມີທ່ານ ບຸນ​ກອງ ສີ​ຫາ​ວົງ ລັດຖະມົນຕີ​ ກະຊວງ​ສາທາລະນະ​ສຸກ, ທ່ານ​ ນາງ ຄຳ​​ເພົາ ​ເອີນ​ທະ​ວັນ ຮອງລັດຖະມົນຕີກະ ຊວງການຕ່າງປະເທດ, ມີບັນດາທູຕານຸທູດ, ຫົວໜ້າກົມ, ຮອງກົມ, ພ້ອມ​ດ້ວຍ​ແຂກ​ຖືກ​ເຊີນ ເຂົ້າຮ່ວມ.

​ໃນໂອກາດ​ດັ່ງກ່າວ, ທ່ານ ໂດເມີນິກ ໂກ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສາທາລະນະລັດ ສິງກະໂປ ປະຈໍາລາວ ກ່າວວ່າ: ການສະເຫລີມສະຫລອງວັນຊາດ ຄົບຮອບ 52 ປີ​ດັ່ງກ່າວ, ເປັນການລະນຶກຫວນຄືນເຖິງສິ່ງທ້າທາຍ, ຄວາມຫຍຸ້ງຍາກຕ່າງໆ ທີ່ພວກເຮົາໄດ້ຜ່ານຜ່າມາ ແລະ ທັງເປັນໂອກາດຊົມເຊີຍຜົນສໍາເລັດ ທີ່ຍາດມາໄດ້​​ຕະຫລອດ​ໄລຍະ​ທີ່ຜ່ານ​ມາ.

ສາທາລະນະລັດ ສິງກະໂປ ແລະ ສປປ ​ລາວ ​ໄດ້​ສ້າງ​ຕັ້ງ​ສາຍ​ພົວພັນ​ການ​ທູດ​ນໍາກັນ ປີນີ້​ພໍດີຄົບຮອບ 42 ປີ ຊຶ່ງເຫັນວ່າ ສປປ ລາວ ມີຄວາມກ້າວໜ້າດ້ານການພັດທະນາ ຫລາຍໆຢ່າງ. ນັບ​ແຕ່​ມື້​ສ້າງ​ຕັ້ງ​ສາຍ​ພົວພັນ​ການ​ທູດ​ຮ່ວມ​ກັນ ສອງປະເທດ ລາວ-ສິງກະໂປ​ ກໍໄດ້​ມີການແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງ ​ເຊິ່ງກັນ ​ແລະ ກັນ ມີການຕິດຕໍ່ພົວພັນກັນຂອງນັກທຸລະກິດ, ການທ່ອງທ່ຽວ ​ແລະ ການສຶກສາ. ​ໃນປີຜ່ານມາ ມີ​ນັກຮຽນອາສາສະໝັກຫລາຍ​ກວ່າ 500 ຄົນ​ ໄດ້​ເດີນທາງ​ມາຊ່ວຍ ເຫລືອຊຸມຊົນ ​ແລະ ອື່ນໆ.

ທ່ານ ໂດເມີນິກ ໂກ ກ່າວ​ຕື່ມ​ວ່າ: ສິງກະ​ໂປ ​ໃຫ້​ຄວາມ​ເຊື່ອ​ໝັ້ນ​ວ່າ ຈະ​ສື​ບຕໍ່​​ໃຫ້ການ​ສະໜັບ​ສະ​ໜູນ​ຊ່ວຍ​ເຫລືອ​ລາວ​ ໃນ​ການ​ພັດທະ​ນາ. ດັ່ງຄໍາ​ເວົ້າ ຂອງ ທ່ານ​ນາຍົກລັດຖະມົນຕີ Lee Hsien Loong ​ເຄີຍ​ໄດ້​ກ່າວ​ກັບທ່ານ ທອງ​ລຸນ ສີ​ສຸ​ລິດ ນາຍົກລັດຖະ ມົນຕີ ​ແຫ່ງ ສປປ ລາວ ວ່າ: ສິງກະ​ໂປ​ຕ້ອງການ​ມີ​ສ່ວນ​ຮ່ວມ​ ໃນ​ການ​ພັດທະນາຂ​ອງ ສປປ ລາວ.

ຂ່າວ: ຂັນ​ໄຊ, ພາບ:ສິດ
ເນື້ອໃນ: ຂປລ